مراجعة موبايل بوكو M3
بوكو M3

نزلت شركة بوكو التابعة لشركة شاومي موبايل بوكو M3، واللي قضى على كل المنافسين في الفئة المتوسطة؛ لأن إصداره كان كويس جدًا، وقدم زي ما بيقولوا “قيمة مقابل سعر”، كعادة شاومي وكان عليه إقبال رهيب من المستخدمين…

وعلشان كده قررنا نعمل مراجعة للموبايل ده ونشوف هل فعلًا الموبايل بيقدم قيمة مقابل سعر ولا لأ!

تصميم موبايل بوكو M3:

أولًا خامات الموبايل:

الموبايل بالكامل مصنوع من البلاستيك البولي كاربونيت سواء الضهر أو الفريم، بلاستيك مطفي وتصميم ضهره مختلف تمامًا وأول مرة نشوفه تقريبًا، الخامات ممكن تديلك إحساس بالفخامة نوعًا ما بس هي طبعًا مش الأفضل وده طبيعي في الفئة السعرية دي.

التصميم الخارجي:

 

تصميم موبايل بوكو M3
تصميم موبايل بوكو M3

 

تصميم الكاميرات:

جزء الكاميرات واخد شكل مستطيل كده بعرض الموبايل من فوق، وفيه كلمة POCO جنب الكاميرات بعرض المستطيل نفسه، تصميمها جديد وغير مألوف، بس ظريف في نفس الوقت وعجبني.

أبعاد الموبايل: 

  • أبعاد الموبايل 9.6 مم مع وزن 198 جرام، فهتحس إن الموبايل سميك شوية وأنت ماسكه بس وزنه معقول مش خفيف ومش تقيل أوي.

شاشة موبايل بوكو M3: 

  • شاشة الموبايل من نوع IPS LCD بحجم 6.53 بوصة بدقة 1080×2340 بيكسل وجودتها FHD+ مع كثافة بكسلات 395 بكسل لكل بوصة وأبعاد عرض 19.5:9.
  • الشاشة بتمثل حوالي 83.4% من الواجهة الأمامية للموبايل، وده بيديك مساحة شاشة كويسة جدًا في الألعاب والتصفح على مواقع السوشيال وغيره.
  • الشاشة مش كاملة والسيلفي في نوتش Water Drop في أعلى الشاشة.
  • موجود طبقة حماية على الشاشة من نوع Corning Gorilla Glass الجيل الثالث.
  • دقة الشاشة FHD+ في حين إن فيه موبايلات في نفس الفئة دي دقة الشاشة فيها FHD فقط، وFHD+ معناها إنك هتشغل فيديوهات 1080 مش 720، يعني هتشغل أعلى جودة في الـ FHD.

أول عيب قابلني أول ما فتحت الشاشة هو سطوعها الـ 346 نوتش، دا معناه إنك مش هتشوف الشاشة بوضوح في الشمس، فلو أنت بتحب تستعمل الموبايل في الشارع كتير هتعاني من السطوع الضعيف للشاشة؛ لأنه مش أحسن حاجة.

 

شاشة موبايل بوكو M3
شاشة موبايل بوكو M3

 

كاميرات موبايل بوكو M3:

الكاميرا الأمامية:

  • كاميرا سيلفي واحدة بدقة 8 ميجا بيكسل بفتحة عدسة F/2.1 بتدعم HDR، وتدعم تصوير فيديوهات بجودة 1080p*30fps، عدسة Wide وبتدعم  أيضًا تصوير البانوراما.

أداء الكاميرا السيلفي مش أحسن حاجة، وما نصحكش تصور بيها فيديوهات؛ لإن مفيش أي تثبيت بصري فيها والكاميرا بتتهز جامد، ودا غير الجودة الضعيفة في التصوير…

 بالنسبة لصوت الفيديو، فهو 96 كيلو بايت وبالتالي بيكون مش واضح، 

الخلاصة إنك لو بتعمل فيديوهات وتنزلها على اليوتيوب وبتستخدم الكاميرا الأمامية يبقى متشتريش الموبايل ده.

الكاميرات الخلفية:

الموبايل فيه 3 كاميرات خلفية:

  • الكاميرا الأساسية، ودي بتصور بدقة 48 ميجا بكسل بفتحة عدسة F/1.8. 
  • الكاميرا التانية، فبتصور بدقة 2 ميجا بكسل بفتحة عدسة F/2.4 ودي الكاميرا الماكرو.
  • الكاميرا الأخيرة بتييجي بدقة 2 ميجا بكسل بفتحة عدسة F/2.4 ودي العدسة المخصصة للعزل والبورتريه.

الكاميرات هنا بتدعم فلاش ليد خلفي وHDR وكمان بتدعم البانوراما.

تقريبًا كده الكاميرا الأساسية، هي الكاميرا الوحيدة اللي تنفع تاخد بيها صور بمعالجة كويسة واللي هتحتاجها بالمقارنة مع الكاميرا الماكرو والمخصصة للعزل؛ لأنهم بيطلعوا صور بجودة مش كويسة خالص وبدون تفاصيل واضحة.

للأسف الموبايل مش موجود فيه كاميرا Ultra wide، وكمان مش بيدعم تصوير الـ4K.

 

كاميرات موبايل بوكو M3
كاميرات موبايل بوكو M3

 

بالنسبة لتصوير الفيديوهات، فالموبايل مش كويس ومفيش أي تثبيت بصري وكمان نقاء صوت الفيديو اللي بيوصل لـ 96 كيلو بايت دا مش أحسن حاجة، وده شيء طبيعي ومتوقع في الفئة السعرية دي.

في المجمل أداء الكاميرا السيلفي مش حلو، خصوصًا في الفيديوهات والكاميرات الخلفية، ومفيش غير الكاميرا الأساسية اللي ينفع تلقط بيها صور كويسة إلى حد ما.

البصمة والزيادات:

البصمة:

بصمة بوكو M3 جانبية في زر الباور، بطيئة نسبيا، أحيانا لما بيتم فتح الجهاز هتلاقي تهنيج بسيط، ودي حاجة متوقعة من المعالج المتواضع اللي في الموبايل ده.

المستشعرات:

  • مستشعر التسارع.
  • مستشعر التقارب.
  • مستشعر البوصلة.

للأسف الموبايل مش بيدعم مستشعر الـNFC.

الموبايل فيه خاصية الـ IR يعني تقدر تتحكم في أي جهاز زي التليفزيون بالموبايل كده وتستخدمه كريموت.

نظام تشغيل أندرويد 10 بواجهة شاومي MIUI 12 بتعديلات الـPOCO.

منفذ الـ USB من نوع الـ Type C.

الموبايل بيتصل بشبكات الواي فاي على الترددات a/b/g/n/ac، ويدعم الـ dual band ،Wifi di ،HotSpot.

نظام البلوتوث من الإصدار الخامس مع دعم للـ A2DP، والـ LE.

الموبايل مزود بخاصية الـ GPS بالأضافة لـ Glonass، و BDS).

الموبايل بيدعم شريحتين اتصال من الجيل الرابع مع كارت ميموري بحجم 512 جيجا في منفذ مخصص له.

الألوان اللي نزل بيها الموبايل “الأصفر اللامع، الأسود الرمادي، الأزرق البارد”.

صوت موبايل بوكو M3:

الموبايل فيه سماعتين، واحدة في الفريم من فوق والتانية تحت، علشان  الصوت يخرج أعلى ويتوزع بشكل أكبر وأفضل.

الموبايل فيه مايك ثانوي، ساعات بيكون مش موجود في فئة موبايلات أعلى  وفايدته هنا بتكون عزل أي ضوضاء حواليك سواء كنت في الشارع أو في زحمة كبيرة وبيحصل تشويش للصوت، يعني المايك ده بيخلي صوتك واضح ونقي للطرف التاني اللي بتكلمه.

الموبايل بيدعم منفذ السماعات الخارجية الـ3.5 مللي.

أداء موبايل بوكو M3:

 

أداء موبايل بوكو M3
أداء موبايل بوكو M3

 

  • معالج كوالكوم سناب دراجون 662 ثماني النواة.
  • معالج رسومي أدرينو 610.
  • دقة التصنيع 11 نانو ميتر.
  • مساحة التخزين 128 جيجا مع رامات 4 جيجا، والذاكرة من نوع UFS 2.2.
  • مساحة تخزين 64 جيجا مع رامات 4 جيجا بايت، والذاكرة من نوع UFS 2.1.

فيه عيب قابلني في الموبايل وهو تهنيج السوفت وير وبطئه، وده أكيد بسبب المعالج اللي أداؤه متواضع شوية فمش قادر يظبط الدنيا، إلا لو بوكو نزلت أبديت للسوفت وير يقدر يعالج الموضوع ده شوية، بس بيني وبينكوا أيًا كان التحديث اللي هينزل، هيفضل المعالج هنا ضعيف شوية.

حاجة غريبة هنا بقي، جميلة في الموبايل، وهي إنك تقدر تلعب عليه ألعاب تقيلة نوعًا ما أو متقدمة ومش هيهنج معاك زي ما السوفت وير بيهنج معاك، وأعتقد إن شركة بوكو هتنزل تحديث للسوفت وير وتحاول تقلل التهنيجات اللي بتحصل في الموبايل ده.

بالنسبة للعبة PUBG تقدر تنزلها وتلعبها كويس جدًا بس مش هتشتغل على الإعدادات المتوسطة، هتشغلها على أضعف إعدادات الـ Graphic، فتقدر تلعب عادي من غير أي مشاكل حتى بعد لعب 30 دقيقة على الموبايل مش هيسخن معاك خالص.

بطارية موبايل بوكو M3:

 

بطارية موبايل بوكو M3
بطارية موبايل بوكو M3

 

بطارية الموبايل من الليثيوم بوليمر بحجم 6000 مللي أمبير.

البطارية بتدعم الشحن السريع بقوة 18 وات، وبيتم شحنها من خلال منفذ الشحن الـ USB Type-C، وكمان بيدعم الموبايل الشحن العكسي السريع لشحن أجهزة تانية.

البطارية تُعتبر من أفضل مميزات البوكو M3؛ لأن حجمها كبير جدًا وتقدر تستخدمها لفترة طويلة قبل ما تحتاج تشحنها مرة تانية.

بالإضافة إلى إن الشاحن المرفق في علبة الموبايل 22.5 وات.

البطارية بتدعم الشحن بقوة 18 وات، الشحن بطيء شوية بصراحة، وبتحتاج للشحن الكامل ساعتين و50 دقيقة ودا وقت طويل طبعًا وكنت أتمنى لو الشحن يكون أسرع من كده، بس ده طبيعي، علشان حجم البطارية الكبير، في فئة الموبايل دا.

في المُجمل البطارية كويسة ومناسبة للناس اللي بتحب تشتغل كتير على موبايلاتها، لأنها هتفضل متواصلة معاك لحد…

583 ساعة من الـ stand-by.

40 ساعة من المكالمات.

196 ساعة استماع للموسيقى.

17 ساعة من مشاهدة الفيديوهات.

أرقام ممتازة ومش هينة خالص على حجم البطارية الـ 6000 مللي أمبير وموبايل في الفئة الاقتصادية دي.

فتح علبة موبايل بوكو M3:

  • جهاز Xiaomi Poco M3.
  • لاصقة بلاستيكية.
  • شاحن مرفق بالعلبة بقوة 22.5 وات.
  • سلك USB من نوع Type C.
  • دبوس معدني.
  • كتيبات دليل بدء الاستخدام.
  • الضمان.
  • جراب ظهر شفاف.

سعر موبايل بوكو M3:

النسخة الأولى الـ 64 جيجا، مع 4 جيجا رام منه بسعر 150 دولار

حوالي 2330 جنيه مصري.

النسخة التانية الـ 128 جيجا، مع 4 جيجا رام بسعر 170 دولار، حوالي 2650 جنيه مصري.

الرأي النهائي في موبايل بوكو M3:

المميزات:

  • سعر منافس جداً.
  • كاميرا خلفية جيدة وتقدم أداء أفضل باستخدام جوجل كاميرا.
  • بطارية كبيرة جدًا تكفي يوم استخدام بأكمله وأكثر بدون الحاجة إلى الشحن أكثر من مرة.
  • يدعم الهاتف الشحن السريع ومنفذ الـ Type C  كما يأتي في علبة الهاتف الشاحن السريع.
  • يدعم تشغيل شريحتين وكارت ميموري في نفس الوقت.
  • شاشة كبيرة بشكل النوتش بدقة الـ FHD+ مع طبقة حماية تقدم أداء جيد جدًا ولكن كالعادة مع سطوع منخفض نسبيًا تحت الشمس.
  • يدعم الـ IR Blaster الخاص بالتحكم في الأجهزة الكهربائية عن طريق الهاتف.
  • من أرخص الهواتف الداعمة لـ صوت ستريو عالي ومميز.

العيوب:

لا يدعم كاميرا التصوير الواسع.
الحافة السفلية للشاشة ما زالت كبيرة ولم يتم العمل على تقليلها.
استخدمت شاومي نفس شاشة Redmi 9 وهي منخفضة السطوع تحت الشمس.
انخفاض جودة الكاميرا السيلفي.
سماعات الأذن غير مرفقة بعلبة الهاتف كعادة هواتف شاومي.
بالرغم من إن المعالج مميز في فئته السعرية إلا إن أداء الموبايل ليس الأفضل بسبب ثقل واجهة شاومي .

الخلاصة:

بوكو M3 هيكون من أفضل الاختيارات في الفئة الأقل من 3000 جنيه…

 بطارية كبيرة وبتحقق أرقام صمود عالية جدًا ومناسبة للأشخاص اللي بيستعملوا موبايلاتهم كتير، ودي بالمناسبة أفضل ميزة في الموبايل، والشاشة مش أحسن حاجة طبعًا بس أدائها مقبول نوعًا ما، وأداء الألعاب على الموبايل كويس جدًا بالمقارنة مع فئته السعرية…

فلو كنت بتدور على موبايل بالمميزات دي، أنصحك بموبايل بوكو M3.

وفي النهاية خليني أفكرك بميزة “اختار موبايلك” اللي بيقدمها موقع نــاس فــونــز ومن خلالها، نقدر نساعدك تختار أنسب موبايل لاحتياجاتك، مع أخذ قدراتك المالية في الاعتبار…

كل اللي عليك، إنك بتحدد المواصفات الأساسية، والإمكانيات اللي يهمك وجودها في موبايلك، وإحنا هانخفف حيرتك، ونرشدك للموبايل اللي يعتبر فرصة بالنسبة لك، وما تندمش على اختياره.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *