كل جهاز موبايل أيًا كانت ماركته ليه مميزات وعيوب حسب كل شخص محتاج إيه من الجهاز اللي هيشتريه، والجهاز اللي هنتكلم عن مراجعته وتفاصيله النهارده هو Oppo reno 4، فالجهاز دا جديد في الفئة المتوسطة العليا من Oppo بتصميمه المتميز العصري، ووزنه الخفيف العملي، وإضافات الكاميرا الوهمية…
مميزاته أكتر من مميزات غيره ودا اللي هنوضحه أكتر مع كل مواصفات، وإمكانيات الجهاز دا من حيث كل حاجة فيه بالتفصيل عشان تقدر تقرر الجهاز قيمته إيه بالنسبالك وتعرف الفرق بينه وبين الإصدارات المنافسة الأخرى من باقي إصدارات سلسلة الرينو.
تصميم موبايل Oppo reno 4:
أولًا خامات الموبايل: خامات الجهاز دا من البلاستيك كعادة سلسلة Oppo reno، ولكن في الجهاز دا خامة البلاستيك فيه قريبة من الزجاج في الجودة…
ودي ميزة لأنها بتكون عملية أكتر ومش بتبصم وهي سبب وزنه الخفيف، لكن في نفس الوقت دا عيب؛ لأن فيه أجهزة منافسة بخامات زجاجية فخمة وبنفس السعر والإمكانيات تقريبًا.
ثانيًا التصميم الخارجي:
أبعاد الجهاز 160.3×73.9×7.7 ملم.
مع وزن 165 جرام.
ودا وزن خفيف جدًا، تقريبًا أخف وزن جهاز في سلسلة الرينو.
بالإضافة لوجود بروز بسيط في ضهر الكاميرا الخلفية الرباعية بالطول.
الجهاز متوفر باللون الأزرق وباللون الأسود والنسخة الخاصة بمحمد صلاح باللون الأحمر.
شاشة موبايل Oppo reno 4:
شاشة الجهاز دا من نوع Super AMOLED على شكل الثقب المزدوج بمساحة 6.4 إنش مع جودة الـ FHD+ بدقة 1080×2400 بكسل بمعدل كثافة بكسلات 409 بكسل لكل إنش.
أما أبعاد العرض فيها فنسبتها 20:9، ودا بيخلي المحتوى اللي بتعرضه أكبر وأوضح، سواء في التصفح أو مشاهدة الفيديوهات والأفلام.
تحتل الشاشة من الواجهة الأمامية نسبة 90.7% مع دعم الشاشة لمعدل التحديث الـ 60Hz فقط
بالإضافة إلى دعم ما يلي:
وضع الـ Smart AirControl للتحكم في الشاشة عن بعد بدون لمس.
وضع الـ OSIE Ultra Clear Visual Effect لضبط الألوان بشكل أفضل أثناء استخدام الموبايل.
الشاشة هنا بتقدم أداء قوي وبكون مبسوط جدا وأنا بستخدم موبايل فئة متوسطة بيقدم تجربة شاشة محترمة بالذات إن الشاشة في معظم الموبايلات مش بتكون موضع إهتمام ما عدا سامسونج مثلًا.
كاميرات موبايل Oppo reno 4:
الكاميرا الأمامية في الجهاز دا: دقتها 32 ميجا بكسل بفتحة عدسة F/2.4 وكمان مستشعر من نوع Sony IMX616.
بتدعم كمان وضع التصوير الـ Ultra Night Selfie Mode للحصول على صور أفضل في الإضاءة الضعيفة وبجودة ساحرة.
بالإضافة لدعمها لمستشعر AI enhanced Smart Sensor لاستخدام الهاتف بدون اللمس ودا بيكون عن طريق استخدام الذكاء الاصطناعي لحركة الإيد.
أما عن الكاميرا الخلفية، فهي كاميرا رباعية حيث:
الكاميرا الأولى: دقتها 48 ميجا بكسل بفتحة عدسة F/1.7 بمستشعر من نوع Sony IMX 586
الكاميرا الثانية: فا دي بقا دقتها 8 ميجا بكسل بفتحة عدسة F/2.2 ودي خاصة بالتصوير الواسع وتأتي بمستشعر من نوع HYNIX HI 846
الكاميرا الثالثة: دقتها 2 ميجا بكسل بفتحة عدسة F/2.4 وبتكون خاصة بالتصوير الماكرو.
الكاميرا الرابعة: ودقتها 2 ميجا بكسل بفتحة عدسة F/2.4 وهي خاصة بالتصوير الـ Mono للعزل، و طبعًا مع الفلاش الأحادي من نوع ليد فلاش.
كما تدعم أيضًا الكاميرات الخلفية مايلي: تصوير الفيديوهات الـ Ultra Steady Video 3.0 للحصول على تثبيت أفضل في تصوير الفيديوهات من غير اهتزاز يُضعف جودة الفيديو عن طريق المثبت الالكتروني الـ EIS.
التصوير بأكثر من وضع آخر مثل الـ Ultra Night Mode للحصول على تصوير ساحر في الليل وفي الإضاءة الضعيفة بالذات.
وضع الـ Slow Motion بمعدل التقاط 960 في إطار الثانية.
و الوضع الجديد الـ AI Color Portrait، ودا وضع خرافي وبيضيف كتير للكاميرا بصراحة، لأنه بيمكنك من تغيير لون الخلفية بالأبيض أو الأسود مع التركيز طبعًا على الشخص اللي بيتصور، يعني هي فكرته تشبه شوية فكرة البورتريه بس طبعًا على أحسن وبشكل ممتاز أكتر.
والميزة هنا في أداء الكاميرا إنك تقدر تاخد صورة بدقة 108 ميجا بكسل على الرغم من إن أعلى دقة للكاميرا الأمامية 48 ميجا بكسل بس، ودا بيكون عن طريق التقاط الصورة بعدد متتالي ودمجها في صورة واحدة، وطبعًا الفضل في دا بيرجع لتطوير Oppo الملحوظ في الذكاء الإصطناعي، وبالنسبة لأداء الكاميرات عمومًا فالأداء نقدر نقول عليه إن جودته ودقته ممتازة حتى وقت التصوير في الأجواء المعتمة والإضاءات الضعيفة، وكذلك الفيديوهات أدائها اتميز جدًا في الجهاز دا بعد الإضافات الكتير اللي جدت عليه فبقت تجربة تصوير الفيديوهات أكتر دقة، جودة.
البصمة والزيادات:
بصمة الجهاز دا مدمجة في الشاشة، وكالعادة دي ميزة بتخلي البصمة سهلة، سريعة وعملية أوي…
بالإضافة لدعمه لخاصية الـ face unlock بصمة الوجه، ودا بيأكد لنا إن كل وسائل الأمان والحماية سهلة وسريعة وعملية جدًا.
دعم الجهاز لعدة مستشعرات أخرى منها:
- مستشعر التسارع
- مستشعر القرب
- مستشعر البوصلة
- مستشعر الجيروسكوب
يدعم الجهاز GPS بالإضافة لدعمه أيضًا ل QZSS
GALILEO ،BDS ،GLONASS ،A-GPS.
Oppo reno 4 جاي بنظام تشغيل Android 10 ، مع واجهة Coloros 7.2.
الموبايل بيدعم إمكانية تركيب شريحتين اتصال من نوع Nano Sim.
الموبايل بيدعم شبكات اتصال الجيل التاني 2G، والجيل التالت 3G، والجيل الرابع الـ 4G.
منفذ الـ USB الأحدث من نوع Type C، بالإضافة لدعم خاصية الـ OTG.
مع نظام التشغيل الأحدث أندرويد 10 مع واجهة Oppo الأحدث الـ Coloros 7.2.
الموبايل يدعم الواي فاي بترددات الـ a/b/g/n/ac بالإضافة لدعمه إلى الـ Dual-band, Wi-Fi Direct, hotspot.
البلوتوث بييجي بإصدار 5.1 مع دعمه لخاصيتي الـ A2DP, LE.
صوت موبايل Oppo reno 4:
يدعم الجهاز منفذ الـ 3.5 ملم الخاص بسماعات الأذن بالإضافة لدعمه لخاصية الـ Dolby Atmos.
بالإضافة للميزة الممتازة جدًا وهي دعمه للميكروفون الثانوي العازل للضوضاء أثناء استخدام الهاتف، ودا بيمكنك من إدخال صوتك دون أي أصوات حوله زي مثلًا أصوات الهواء والضوضاء الخارجية.
وحقيقي الجهاز بيقدم تجربة صوتية أفضل من خلال سماعات الأذن وأداء الصوت عمومًا ساحر، وعميق يتميز بالعلو والنقاء.
ولكن لو كنا شوفنا مثلا سماعات ستيريو في الجهاز كان هيقدم تجربة صوتية حلوة جدا.
أداء موبايل Oppo reno 4:
سعة الذاكرة الصلبة للجهاز دا 128 جيجابايت من نوع UFS 2.1، مع ذاكرة عشوائية بسعة 8 جيجا بايت من نوع LPDDR 4X، دا وبالإضافة لدعمه إمكانية زيادة المساحة التخزينية عن طريق كارت الميمورى حتى 256 جيجابايت، وبكدا يبقي الجهاز حقق لنا سعة تخزينية ضخمة جدًا.
نظام التشغيل في الجهاز هو أندرويد 10 ودا أحدث نظام تشغيل، مع واجهة Oppo الأحدث ال 7.2 coloros.
بالنسبة لأداء الموبايل فهو بييجي بمعالج ثماني النواه من شركة كوالكوم من نوع Snapdragon 720G بتكنولوجيا الـ 8 نانو، مع معالج رسومي من نوع Adreno 618 فهو نفس المعالج الموجود في الـ Oppo Reno 4 Pro، لكن نقدر نقيَمه ونقول إن أداءه مقبول وإنه للأسف مش أحسن حاجة في الفئة السعرية دي.
أما بالنسبة لأداء الألعاب على الجهاز دا، فهو بيدعم وضع الـ game space المتخصص في دعم وتعزيز أداء الألعاب ودي ميزة مهمة جدًا مانقدرش نتجاهل وجودها لأنها تهم فئة كبيرة جدًا من الناس وهما الجيمرز.
طبعًا كون إن أوبو أصلا تستخدم معالج من نوع سناب دراجون في موبايل في الفئة دي، فدي حاجة كويسة جدا وتجربة محترمة نتمنى نشوفها كتير.
بطارية موبايل Oppo reno 4:
بطارية الجهاز دا ليثيوم بوليمر غير قابلة للإزالة سعتها 4015 مللي أمبير، دا بجانب دعمها لميزة الشحن السريع بقوة 30 وات بتقنية الـ VOOC Flash Charge 4.0 واللي بيتم شحنها في حوالي 55 دقيقة تقريبًا، وهو وقت قليل نسبيًا.
أما بالنسبة لأدائها فنقدر نقول إنها نوعًا ما أقل من أداء بطاريات الأجهزة المنافسة مقارنةً بالسعر، فلو يهمك أداء عالي للبطارية في الألعاب فمنصحكش بالجهاز ده.
فتح علبة موبايل Oppo reno 4:
- موبايل Oppo Reno 4.
- سكرين تم وضعها بشكل مسبق على شاشة الموبايل.
- رأس الشاحن ويأتي بقوة 30 وات.
- كابل USB من نوع Type C.
- دبوس معدني.
- سماعات الأذن وتأتي بمنفذ الـ 3.5 ملم.
- كُتيب التعليمات يوضح كيفية إستخدام الموبايل.
- ضمان الموبايل.
- جراب ظهر.
سعر موبايل Oppo reno 4:
سعر الجهاز في السوق المصري حوالي 5990 جنيه للنسخة العادية وحوالي 6090 جنيه للنسخة الخاصة لمحمد صلاح.
الرأي النهائي لموبايل Oppo reno 4:
المميزات:
- تصميم جميل وعصري وخفيف وسهل حمله.
- يدعم تصوير الفيديوهات بجودة الـ 4K مع وجود ثبات إلكتروني.
- كاميرات محسنة بشكل كبير كما هو معتاد عن أوبو.
- يدعم تشغيل شريحتين وكارت ميموري في نفس الوقت.
- شاشة بشكل الثقب المزدوج من نوع Super AMOLED تقدم تجربة ممتازة.
- يدعم الشحن السريع الـ VOOC 4.0 بقوة 30 وات ويتم شحن البطارية في حوالي 55 دقيقة.
- كعادة أوبو البصمة المدمجة بالشاشة سريعة وعملية جدًا.
العيوب:
- تم التخلي عن كاميرا الزوم.
- خامات بلاستيكية.
- لا يدعم أي معدل تحديث أعلى للشاشة وتم الاكتفاء بالـ 60Hz.
- لا يدعم لمبة الاشعارات ولكن يمكنك تعويض ذلك عن طريق الـ Always on Display .
- المعالج يقدم أداء مقبول جداً ولكن يعيبه أنه ليس الأفضل في فئته السعرية حيث يوجد في هواتف أرخص مثل الـ Xiaomi Redmi Note 9s.
الخلاصة:
طبعًا بعد ما وضحنا كل إمكانيات ومواصفات الجهاز تقريبًا مانقدرش ننكر إن المميزات فيه أكتر من عيوبه وتهم فئة كبيرة من المستخدمين اللي بالنسبالهم يُعتبر قيَم، ولكن أداء البطارية والخامات بالنسبة للسعر غالي جدًا، ودا طبعًا مقارنةً بالموبايلات المنافسة.
الأداء في الموبايل ده مش موجه لفئة الألعاب يعني البطارية والمعالج مش الأفضل خالص في الفئة دي لو محتاج تلعب على الموبايل.
لو بتفكر تشتري موبايل جديد فبنصحك تستخدم خدمة “اختار موبايلك” واللى بيقدمها مــوقــع نـاس فــونــز، علشان تقدر تاخد أفضل موبايل في السوق حسب ميزانيتك وبالإمكانيات اللي أنت طالبها.