مراجعة موبايل Oppo A12
oppo A12

شركة Oppo بالإصدار دا قدرت تنتج حرفيًا أرخص أجهزتها من الفئة الإقتصادية وهو Oppo A12 بأدائه المحترم وتصميمه الجذاب وشاشته الممتازة قدر يتفوق على الأجهزة المنافسة من نفس الفئة السعرية دي، فخلونا نتعرف على كل إمكانيات الجهاز دا بالتفصيل ونراجعه ونوضح كل عيوبه ومميزاته عشان تقدر تعرف الفرق بينه وبين الإصدارات المنافسة واللي من نفس فئته الإقتصادية.

بس قبل ما نبدأ المراجعة دي خلينا الأول نتكلم عن خدمة “اختار موبايلك” واللى بيقدمها مــوقـــع نـاس فــونــز، الخدمة دي بنقدمها لأول مرة علشان تساعدك في اختيار الموبايل الخاص بيك بدون حيرة ومجهود، كل اللي عليك تعمله إنك هتبعتلنا ميزانيتك المتوقعة وتبعتلنا الإمكانيات اللي عاوز تشوفها في الموبايل بتاعك وإحنا هنرشحلك أفضل موبايل يناسبك.

خلينا دلوقتي نرجع لمراجعتنا…

تصميم موبايل Oppo A12:

 

تصميم موبايل Oppo A12
تصميم موبايل Oppo A12

 

أولًا الخامات: الخامات هنا من البلاستيك المطفي والعملي جدًا والنوع دا من البلاستيك بيخلي بصمات الإيد ما تظهرش عليه أبدًا وتقدر تستخدمه من غير cover وهيكون بردو شكله حلو وجذاب وبيديك إحساس بالاحترافية بسبب اللون المطفي.

ثانيًا التصميم الخارجي:

أبعاد الموبايل:

  1.  الجهاز بيجي بأبعاد 155.9×75.5×8.3 ملم.
  2.  وزن 165 جرام.

ودا وزن حلو وخفيف وعملي وسهل في الحمل والاستخدام لفترات طويلة، من الحاجات اللي بشوفها مميزة في الإصدار دا إنه بيتوفر بعدة ألوان: “الأزرق، الأسود، والبنفسجي” مع وجود رسومات لأشكال هندسية على الضهر بلون أغمق من لون الضهر نفسه وشكلها ظريف وجديد.

شاشة موبايل Oppo A12:

  • الشاشة بتيجي بشكل النوتش على هيئة الـ  Water Drop notch ودي نوتش بحجم قطرة الماء.
  •  أما الشاشة فهي من نوع IPS LCD، بمساحة 6.22 إنش بجودة الـ HD+ بدقة 720×1520 بكسل يعني بمعدل كثافة بكسلات 270 بكسل لكل إنش.
  • الشاشة بتدعم أبعاد عرض بنسبة 19:9، وبتشغل نسبة 89% من الواجهة الأمامية للجهاز، بالإضافة لدعمها لخاصية اللمس المتعدد مع انحناء في الأطراف بيخلي شكل الجهاز انسيابي أكتر.

 

شاشة موبايل Oppo A12
شاشة موبايل Oppo A12

 

ونقدر نقول إن مع صفات الشاشة وطبقة الحماية اللي عليها إن أدائها كويس، وتشبع الألوان والحدة فيها أدائهم حلو جدًا بردو ودقتهم عالية.

وبالرغم من قلة البكسلات في الشاشة فدرجة سطوعها هايلة حتى تحت آشعة الشمس المباشرة، وكانت لفتة حلوة من أوبو إنهم يحطوا سكرين على الشاشة خصوصًا في الفئة دي.

كاميرات موبايل Oppo A12:

الكاميرا الأمامية: دقتها 5 ميجا بكسل وفتحة عدستها F/2.0.

الكاميرا الخلفية:

الجهاز بييجي بكاميرتين… 

الكاميرا الأولى: و دقتها 13 ميجا بكسل بفتحة عدسة F/2.2 وهي الكاميرا الأساسية طبعًا. 

والكاميرا الثانية: ودي بدقة 2 ميجا بكسل بفتحة عدسة F/2.4 وبتكون خاصة بعمل العزل والبورتريه، مع فلاش خلفي أحادي من نوع ليد فلاش.

أما بالنسبة لتصوير الفيديوهات:

فالكاميرا بتدعم التصوير بجودة الـ FHD بدقة 1080 بكسل بمعدل التقاط 30 إطار في الثانية.

 بالإضافة لدعمها التصوير بجودة الـ HD بدقة 720 بكسل بمعدل التقاط 30 إطار في الثانية.

 

كاميرات موبايل Oppo A12
كاميرات موبايل Oppo A12

 

تجربة أداء الكاميرات في الإضاءات العالية أو الخارجية هتكون حلوة بالنسبة للفئة اللي فيها الموبايل ده وعجبتني مقارنة ببعض المنافسين، الصور بتطلع بدرجة حدة وتشبع في الألوان مقبولة وتفاصيل نوعًا ما جيدة.

أما جودة الصور في الإضاءات المنخفضة أو الضعيفة بتقل جدًا، ولكن دا الطبيعي بالنسبة لكاميرات أجهزة الفئة الإقتصادية، وهنا نقدر نقول إن أداء الكاميرات بشكل عام مُرضي ومقبول داخل الفئة دي.

البصمة والزيادات:

البصمة:

الجهاز بيدعم مستشعر البصمة وبتيجي في ضهر الجهاز بالإضافة لدعمه لخاصية الـ Face Unlock من خلال الكاميرا الأمامية وده شيء مش جديد في الموبايلات خلاص وبقينا نشوفه في كل الفئات.

المستشعرات:

الموبايل كمان بيدعم مستشعرات تانية زي:

  • مستشعر التسارع. 
  • مستشعر التقارب.
  • مستشعر البوصلة.
  • مستشعر الجيروسكوب علشان تقدر تستخدم نضارات الواقع الافتراضي ال VR.

منفذ الـ USB هنا من النوع القديم أو التقليدي الـ Micro USB، دا وبالإضافة لدعمه لخاصية الـ OTG لتشغيل أي USB Driver على الجهاز.

الجهاز بيدعم شبكات الجيل التاني الـ 2G والجيل التالت الـ 3G والجيل الرابع الـ 4G.

نظام التشغيل في الجهاز  Android 9.0 Pie مع واجهة Oppo الـ Coloros 6.1.

الواي فاي هنا بيجي بترددات الـ a/b/g/n/ac ده بالإضافة لدعمه للـ Dual-band, Wi-Fi Direct, hotspot.

البلوتوث بيجي بإصدار 5.0 مع دعمه لخاصيتي الـ A2DP, LE.

الجهاز كمان بيدعم تحديد الـ GPS بجودة كويسة وسريعة جدًا، ودا بجانب دعمه بردو لأنظمة الملاحة الأخرى زي: 

الـ A-GPS, GLONASS, BDS.

الموبايل بيدعم شريحتين من نوع Nano Sim.

الجهاز مابيدعمش لمبة الإشعارات، وطبعًا صعب يكون بديل ليها في الفئة الاقتصادية.

صوت موبايل Oppo A12:

التجربة الصوتية للأسف هنقول مقبولة بدون أي إضافات، تقريبًا الشركة نسيت إن إحنا خلاص بقينا بنسابق الزمن في التكنولوجيا وكل يوم فيه جديد، للأسف الشركة اكتفت براديو FM مع فتحة 3.5 ملي للهاند فري وخلاص!

لكن كتجربة صوتية محسيتش أبدًا إن فيه فرق بينه وبين الموبايلات أم زراير القديمة، يمكن علشان اتعودت على المايك عازل الضوضاء في معظم الأجهزة وخلاص مبقيتش أقدر أستخدم جهاز بييجي من غيره!

التجربة الصوتية للأسف معجبتنيش على الإطلاق.

أداء موبايل Oppo A12:

 

أداء موبايل Oppo A12
أداء موبايل Oppo A12

 

يتوفر الجهاز بنسختين…

  • النسخة الأولى سعة ذاكرتها الصلبة 32 جيجابايت من نوع eMMC 5.1 مع ذاكرة عشوائية بسعة 3 جيجا رام.
  • النسخة التانية سعة ذاكرتها الصلبة 64 جيجابايت مع ذاكرة عشوائية بسعة 4 جيجا رام.

بالإضافة لدعم الجهاز لإمكانية زيادة المساحة التخزينية عن طريق كارت ميموري حتى سعة 256 جيجابايت.

المعالج هنا ثماني النواة من شركة ميديا تيك من نوع Helio P35 بتكنولوجيا 12 نانو مع معالج رسومي من نوع PowerVR GE8320، ودا نفس المعالج الموجود في هاتفي الـ Oppo A5s والـ Huawei Y6s

تقييم المعالج هنا مش الأفضل ونوعًا ما ضعيف شوية، لكن بيقدم أداء كويس جدًا في الاستخدام اليومي لتطبيقات السوشيال ميديا ومشاهدة الفيديوهات أو الأفلام.

وبالنسبة لأدائه في الجيمز فهو أداء كويس مادام نوع الألعاب خفيف، أما الألعاب التقيلة أو اللي الجرافيك فيها بيكون عالي فهتلاقي فيه ضعف في الأداء وسقوط في الفريمات، يعني المعالج هنا نقدر نقول إنه بيقدم أداء متزن في الفئة الاقتصادية، ولكنه متواضع جدا مع المهام اللي بتحتاج أداء رسومي عالي وعتاد قوي حتى لو كنت بتستخدم أقل إعدادات ممكنة.

بطارية موبايل Oppo A12:

البطارية سعتها 4230 مللي أمبير واللي بتدينا 8 ساعات من الاستخدام المتواصل، لكن في المقابل مابتدعمش خاصية الشحن السريع وممكن تشحن في مدة بتوصل لـ3 ساعات تقريبًا بقوة شحن 10 وات.

طبعًا تجربة البطارية كانت لطيفة جدا لحد ما حسيت إن أنا لازم أشحنها في الوقت الهلامي ده، يعني لو كان بيشحن بسرعة  18 وات حتى كانت فرقت كتير.

 

بطارية موبايل Oppo A12
بطارية موبايل Oppo A12

 

فتح علبة موبايل Oppo A12:

  • موبايل Oppo A12 مع سكرين تم وضعها بشكل مسبق.
  • رأس الشاحن بقوة 10 وات.
  • كابل USB من نوع Micro USB.
  • جراب شفاف لحماية ظهر الهاتف.
  • دبوس معدني.
  • كتيب دليل بدء الاستخدام السريع.
  • ضمان الموبايل.

سعر موبايل Oppo A12:

سعر الموبايل في السوق المصري حاليًا 2440 جنيه مصري.

الرأي النهائي في موبايل Oppo A12:

المميزات:

  • يدعم مستشعر البصمة.
  • تصميم جذاب وما زال مقبول حالياً.
  • بطارية كبيرة تصمد للعمل لفترة طويلة خلال اليوم بأكمله.
  • يدعم تشغيل شريحتين اتصال وكارت ميموري في وقت واحد.
  • شاشة نوتش كبيرة بدقة HD+ مع طبقة حماية تقدم أداء مقبول ولا بأس به.

العيوب:

  • لا يدعم لمبة الاشعارات.
  • نظام التشغيل ليس الأحدث في الوقت الحالي.
  • لا يدعم الشحن السريع لذلك ستحتاج إلى وقت أطول.
  • لا يتوفر في علبة الهاتف جراب ظهر.
  • المعالج ليس الأقوى حالياً في ظل وجود منافسين بمعالجات أفضل.
  • لا يدعم الميكروفون الثانوي الخاص بعزل الضوضاء والضجيج.
  • لا يأتي الهاتف باي تطوير محسوس عن هاتف اوبو السابق Oppo A5s.

الخلاصة:

الجهاز دا بينافس redmi 9 من شاومي، لكنه بصراحة بيتفوق عليه في كل حاجة تقريبًا سواء في الشاشة أو الأداء وكمان سعة البطارية الأكبر… 

وبما أن Oppo مابتظهرش فيه عيوب تصنيع مع الاستخدام على عكس الإصدار المنافس من شاومي، فأنا برشح طبعًا Oppo A12 من الفئة السعرية دي وبقوة بشرط يكون استخدامك خفيف جدًا ومش هتضايق من إن الموبايل يقعد يشحن لفترة طويلة.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *