يلا بينا نبدأ مراجعتنا النهاردة مع موبايل هونر 9X Lite…
الفئة السعرية اللي من 3000 لـ 4000 جنيه دي أكتر فئة الناس بتبحث فيها عن الموبايلات، وإحنا هنا بقى هنتكلم عن موبايل هونر 9X Lite، الموبايل دا خلطة كدا غريبة، وطبعًا معروف عن شركة هونر إنها بتنزل موبايلاتها من غير أي خدمات جوجل، بس أصدرته بمواصفات أقل من العادة؛ علشان تحاول التقليل في السعر لأقل حد ممكن، وبالتالي يقدر الموبايل يناسب كل المستخدمين في الفئة الاقتصادية اللى هو فيها.
بس هنا فيه ميزة مختلفة عن إصدارات هونر لهواتفها، وهي إن الموبايل بييجي مدعوم بكل خدمات جوجل، ودي حاجة مش متعودين عليها من شركة هونر ودا عملته؛ علشان تحاول استرجاع قوتها مرة تانية في السوق المصري.
خلوني الأول أكلمكم عن “اختار موبايلك“، واللي أنت من خلال الخدمة دي وبكل بساطة تقدر تعرف أي حاجة أنت عايز تعرفها بخصوص الموبايل اللي انت عايز تشتريه…
كل اللي المفروض تعمله، هو إنك تكتب المواصفات والإمكانيات اللي عايز تشوفها في موبايلك وإحنا هنقدم لك الموبايل المناسب ليك، بالسعر اللي أنت تحدده حسب ميزانيتك، مع كل المواصفات اللي نفسك تبقى في موبايلك.
بس علشان نبقي متفقين كل موبايل لية مميزاتة وعيوبة…
يلا بينا نتعرف علي الموبايل بشكل أوضح من كده، ونشوف هل هو يستحق الشراء ولا لأ، وإيه هي مميزات وعيوب موبايل هونر 9X Lit!
تصميم موبايل هونر 9X Lite:
أولاً خامات الموبايل:
خامات وجودة التصنيع هنا كلها من الزجاج اللامع من الأمام ومن الخلف، بالإضافة إلي إن الإطار بيكون من المعدن.
طبعًا الموبايل هنا من الزجاج يعني تصميم وشكل حلو أوي هيخليك تحس إنك ماسك حاجة شيك كدا، و خامة كويسة جدًا.
بس أكيد فيه سلبيات، وهي إن البصمة مازالت في الخلف وهي كده مش سلبية أوي بس مش معاصرة، وكمان الموبايل هنا بيبصم جدًا علشان من الزجاج اللامع.
ثانيًا: التصميم الخارجي:
تصميم الكاميرات:
موجود في الموبايل ثلاث كاميرات في شكل فريم مستطيل، وخارج الفريم الستطيل فيه فلاش أحادي من نوع ليد فلاش.
هنا الكاميرات تصميمها شيك ومش مبالغ فيه يعني متحسش إنك ماشي بمجموعة كاميرات في إيدك، بس الكاميرات هنا بارزة بشكل مش لطيف خالص، ودا هيدي فرصة أكبر لتجريح الكاميرا.
الأبعاد والألوان:
- أبعاد الموبايل بتكون 160.4×76.6×8.0 ملم.
وكمان مع وزن خفيف جدًا وهو 175جرام وده هيساعدك في إنك تسنخدم الموبايل لفترات كبيرة من غير أي تعب.
- الموبايل يتوفر باللون الأخضر الزمردي، واللون الأسود، ودي الألوان المعتادة في معظم الموبايلات يعني مفيش أي جديد.
شاشة موبايل هونر 9X Lite:
- الشاشة Full View، من نوع النوتش القديم والكبير، كمان بتيجي من نوع IPS LCD، مساحة 6.5 بوصة بجودة الـ FHD، وبدقة 1080*2340 بكسل، بمعدل كثافة 397 بكسل لكل إنش.
- كما تدعم أبعاد العرض بنسبة 19.5:9.
وأيضًا الشاشة تحتل الواجهة الأمامية بنسبة 91 %.
- نظام التشغيل أندرويد 9.0.
خلينا متفقين على حاجة مهمة وهي إن مفيش حد هيقدم الشاشة دي بالحجم ده في الفئة السعرية دي ودي حاجة مميزة جدا في الجهاز، بس برده فيه عيوب في الشاشة وأول عيب فيها هي إن النوتش كبير وقديم جدًا، وكمان زوايا الرؤية بتاعتها سيئة جدًا.
كاميرات موبايل هونر 9X Lite:
الكاميرا الأمامية:
تأتي بدقة 8 ميجا بكسل، بفتحة عدسة F\2.0.
الكاميرا الخلفية:
بتكون بارزة شوية عن ضهر الهاتف وفي اتنين منها…
الأولي:
هي الكاميرا الأساسية للهاتف، جاية بدقة 48 بكسل، بفتحة عدسة F\1.8.
الثانية:
هي الخاصة بعمل البورتريه والعزل وتأتي بدقة 2 ميجا بكسل، بفتحة عدسة F\2.4، كما يوجد فلاش أحادي من نوع ليدي فلاش.
كما يدعم تصوير الفيديوهات بجودة FHD، بدقة 1080، بمعدل التقاط 30 أو 60 إطار في الثانية الواحدة.
وأيضا الكاميرا تدعم خلفية الذكاء الاصطناعي بالإضافة إلى دعمها (Super Night Mode) علشان تحصل على صورة أفضل الاضاءات الضعيفة.
بالنسبة لأداء الكاميرات، فهي يُعتمد عليها وهتبقى حلوة طول ما أنت في إضاءة كويسة.
بالنسبة للبورتريه، لأ مش حلو متعتمدش عليه لأنه مش الأفضل هنا.
الألوان بتبقي مشبعة زيادة عن اللزوم معجبتنيش الصراحة، وكمان السيطرة على الإضاءة مش موجودة أصلًا.
لكن المبهر هنا في الكاميرا، هو التصوير بالإضاءة الليلية بالنسبة للفئة السعرية دي.
نيجي بقى للكاميرا الأمامية ودي سيبك منها؛ لإن أدائها مش كويس خالص، ومش بتقدر تظهر تفاصيل الصورة على حقيقتها.
- البصمة والزيادات:
البصمة هنا جاية في ضهر الموبايل، بالإضافة إلى خاصية Face Unlock أو بصمة الوجه اللي بتشتغل عن طريق الكاميرا الأمامية.
بس للأسف البصمة هنا مش سريعة أوي.
المستشعرات:
الموبايل بيجي فيه بعض المستشعرات زي:
- مستشعر التقارب.
- مستشعر التسارع، وهو يُستخدم في عمل الحركة والاهتزازات.
إلى جانب مستشعر البوصلة اللي بيساعد على تحديد الاتجاه.
كما يدعم الموبايل الميكروفون الخاص بعزل الضوء أثناء استخدامه بصفة عامة سواء في التصوير أو التسجيل، أو أثناء التحدث.
ويدعم شبكات 4G ،3G ،2G، وكذلك الاتصال السريع بالواي فاي بترددات n,a,b ac,g، إلى جانب الهوت سبوت.
مع دعم الموبايل للبلوتوث بإصدار 4.2، ودعمه للـ A2DP, LE.
دا غير إن الموبايل فيه شرحتين اتصال من نوع Nano SIM، مع وجود كارت ميموري يعمل على زيادة المساحة بسعة تصل إلى 510 جيجا، مع دعمه لمنفذ الـ 3.5 الخاص بسماعات الأذن، وكمان منفذ الـUSB.
بطارية موبايل هونر 9X Lite:
البطارية بتيجي بسعة 3750 مللي أمبير، ودي سعة عادية جدًا مع قوة شاحن 10 وات، يعني مش هتفضل وقت كتير معاك وكمان سرعة الشحن بطيئة شوية وده هياخد وقت طويل في الشحن.
أداء موبايل هونر 9X Lite:
يعتبر الأداء أكتر حاجة مهمة المشتري بيبص عليها ويهتم بيها.
الجهاز بيجي بمعالج من تصميم هواوي من نوع الـ HiSilicon Kirin 710 بتكنولوجا 12 نانو.
معالج رسومي من نوع Mali-G51 MP4.
دا بالإضافة إلى إن الهاتف يدعم وضع تعزيز الأداء عن طريق الـ GPU Turbo 3.0 للحصول على أداء أفضل في الألعاب.
المعالج يعتبر أكتر معالج تم استخدامه في كتير من الموبايلات، لكن الأداء هنا مواجهتش معاه أي مشكلة الصراحة…
هو مش أقوي حاجة في الأداء، لكنه ميفرقش كتير عن المنافسين، وبالأخص في الفئة السعرية دي.
وبالنسبة لأداء شبكة الموبايل، فهي ممتازة وتنظيم استهلاك الموبايل للبطارية كويس جدًا.
أما الأداء في الألعاب، فمش أقوي حاجة لأن الـ GBU بتاعته قليلة شوية.
سعر موبايل هونر 9X Lite:
سعر الموبايل لنسخة 128 جيجا، مع 4 جيجا رام حوالي 2750 جنيه مصري.
الرأي النهائي في موبايل هونر 9X Lite:
إحنا شايفين إن الموبايل عملي جدا وشيك، بالنسبة لسعره وأداؤه والشاشة نقدر نقول إن الموبايل صفقة حلوة أوي.