مراجعة جديدة وموبايل جديد وهو هونر 10X Lite…
وصلتنا إصدارات جديدة من شركة هونر، اللي اتباعت مؤخرًا لمجموعة مستثمرين صينيين علشان يقدروا يتخطوا موضوع الحظر الأمريكي بس الإصدارات اللي وصلت ونزلت بره مصر من فترة لسه نازلة مصر دلوقتي، فبالتالي هنتوقع إن مفيش خدمات جوجل، وهي دي أصلًا طبيعة هونر في منتجاتها.
خلينا متفقين إن كل موبايل ليه مميزاته وليه عيوبه أيًا كانت ماركته إيه.
تعالوا نتعرف على الجهاز بصورة كاملة ونشوف يا تري فيه جديد ولا لأ!
بس قبلها حابين نفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك“، ودي خدمة هتساعدك في إنك تختار الجهاز المناسب ليك، عن طريق ترشيحاتنا اللي بيكون بِناءًا على طلبك، واللي انت عايزه ومحتاجه في جهازك؛ وعلشان تكون ببساطة قادر تختار الجهاز اللي اتعمل لإشباع احتياجاتك ويتناسب مع ميزانيتك من غير قلق ولا حيرة.
ويلا نبدأ مراجعتنا بتصميم الموبايل…
تصميم موبايل هونر 10X Lite:
أولاً خامات الموبايل:
جودة وخامة التصنيع في الموبايل بتييجي من البلاستيك، بس كخامة نضيفة فهي ميله إلي طبقة الهواتف الرائدة.
لو أنت مش بتحب البلاستيك وبتخاف من خاماته، وجودته أحب أقولك اطمن؛ لأن خامات التصنيع هنا عالية وكويسة جدًا، وشكله حتى يقدر يخليك تنخدع فيه وتفكر خامته زجاج مش بلاستيك، وبالنسبة للتصميم كشكل فهو شيك جدًا.
ثانيًا التصميم الخارجي:
تصميم الكاميرات:
الكاميرات في الموبايل دا رباعية وموجودة في شكل مستطيل، وبتكون بارزة شوية عن ضهر الموبايل، ودا هيدي فرصة لتجريح الكاميرا، بالإضافة إلى وجود فلاش أحادي من نوع ليد فلاش.
بالنسبة لكاميرا السيلفي فهي بتييجي في ثقب في أعلى الشاشة، ودي هنتكلم عنها بعدين بشكل أوضح من كده.
الأبعاد والألوان:
الموبايل بيجي بأبعاد 165.7×76.9×9.3 ملم.
مع وزن حوالي 206 جرام، ودا وزن تقيل نسبيًا، وهيبقي متعب لو استخدمته أو شلته لفترات طويلة، سواء كنت في شغلك أو حتى وقت اللعب.
الموبايل هنا بييجي بألوان مختلفة شوية نقدر نقول عليها مميزة، وهي اللون الجليد الأيسلندي، واللون الأسود، اللون الزمردي.
شاشة موبايل هونر 10X Lite:
الشاشة هنا بتييجي بشكل الثقب من نوع IPS LCD، وتطلق عليها هونر مسمى الـ FullView، بمساحة 6.67 إنش، وبجودة الـ FHD+، بدقة 1080×2400 بكسل، ودي طبعًا جودة كويسة جدًا، بمعدل كثافة بكسلات 395 لكل إنش، بمعدل أبعاد 20:9 لعرض محتوى أكبر على شاشة الموبايل سواء وقت اللعب، أو وقت مشاهدة الفيديوهات مع دعم الـ Dark Mode.
وكمان فيه ثقب خاص بالسيلفي.
الحواف حول الشاشة متوسطة ولكنها مايلة أكتر إلي إنها تكون كبيرة.
بالنسبة لثقب الشاشة الخاص بالسيلفي فهو كبير شوية.
جودة الشاشة كويسة جدًا، والألوان مظبوطة، وكمان الدقة حلوة أوي، ويزيد على دا سطوع ممتاز تحت الشمس.
مفيش إعلان رسمي على وجود طبقة حماية على الشاشة بس فيه اسكرينة هتلاقيها متركبة على الشاشة.
كاميرات موبايل هونر 10X Lite:
الكاميرا الأمامية:
بتييجي بدقة 8 ميجا بكسل، وبفتحة عدسة F\2.0.
الكاميرات الخلفية في الموبايل دا رباعية، هنشرح كل واحدة بالتفصيل:
الكاميرا الأولى، هي الكاميرا الأساسية للموبايل، بدقة 48 ميجا بكسل، بفتحة عدسة F\1.8.
أما عن الكاميرا الثانية، بتيجي بدقة 8 ميجا بكسل، وبفتحة عدسة F\2.4، وهي خاصة بالتصوير الواسع.
الكاميرا الثالثة، بتيجي بدقة 2 ميجا بكسل، بفتحة عدسة F\2.4، وهي خاصة بتصوير الماكرو.
الكاميرا الرابعة، بفتحة عدسة F\2.4، وهي خاصة بعمل العزل والبورترية، وبدقة 2 ميجا بكسل.
يدعم الموبايل تصوير الفيديوهات بجودة الـ FHD، بدقة 1080 بكسل، بمعدل التقاط 30 إطار في الثانية الواحدة.
كما يدعم الموبايل الميكروفون الإضافي الخاص بعزل الضوضاء وقت استخدام الموبايل.
أداء الكاميرات متواضع جدًا، معالجة مش أفضل حاجة، والتفاصيل معقولة لو الإضاءة عالية إنما لو قلت الإضاءة، التفاصيل بتقل كتير والألوان بحسها باهتة شوية وهتحتاج إنك تعدل على الصور.
بالنسبة للتصوير الليلي، فهو اللي نقدر نقول عليه إنه كويس.
كاميرا السيلفي هنا مش حلوة خالص ومتقدرش تنافس الموبايلات التانية اللي في السوق، وعمومًا احنا شايفين إن الكاميرات مش أقوي حاجة في هونر.
بالنسبة لتصوير الفيديوز في هونر فهو بيصور على جودة FHD، بدقة 1080 بكسل، بس للأسف مفيش تثبيت إلكتروني، يعني الصراحة تصوير الفيديوهات هنا بردو مش أحسن حاجة.
البصمة والزيادات:
البصمة:
البصمة هنا بتيجي مدمجة بزرار الباور.
وكمان الموبايل يدعم خاصية Face Unlock، واللي بنسميها بصمة الوجه.
الموبايل بييجي معاه بعض المستشعرات زي:
- مستشعر التسارع.
- مستشعر التقارب.
الموبايل يدعم راديو الـ Fm، والـ NFC.
كما يدعم الميكروفون الإضافي الخاص بعزل الضوضاء وقت استخدام الموبايل.
مع نظام تشغيل أندرويد 10، لكن خدمات جوجل بلاي غير متوفرة بشكل رسمي.
ويدعم الهاتف أيضًا خدمة الاتصال السريع بالواي فاي، مع دعمه للهوت سبوت.
كما يدعم مواقع تحديد الـ GPS، كما يدعم أنظمة الملاحة.
يدعم الموبايل أيضًا البلوتوث اللي بييجي بإصدار 5.1، كما يدعم A2DP، LE.
دا غير إن الجهاز بيدعم منفذ الـ 3.5 الخاص بالهاند فري.
أداء موبايل هونر 10X Lite:
المعالج بييجي من نوع Kirin 710A، بتكنولوجيا الـ 14 نانو.
يوجد معالج رسومي من نوع Y7a، بالإضافة لدعم الموبايل ميزة تعزيز الأداء عن طريق الـ GPU Turbo 3.0 لكي نحصل على أفضل أداء وقت استخدام الهاتف، وكمان وقت اللعب على الموبايل.
الأداء هنا معقول ولكنه مش الأسرع ؛ لإنه مستقر وثابت على نوع واحد من السرعة وفي الوضع الحالي دا، أداء الموبايل مش أفضل أداء بالنسبة للفئة السعرية اللي هو فيها، يعني من الآخر أداؤه يتناسب أكتر مع الاستخدام الخفيف، وتصفح السوشيال ميديا.
بالنسبة للأداء الرسومي، نقدر نقول عليه إنه معقول، بس مش الأفضل، والصوت مش عالي أوي لكنة متواضع.
بطارية موبايل هونر 10X Lite:
البطارية بتيجي بسعة 5000 مللي أمبير، ودا حجم كبير جدًا، وهيساعد على استخدام الموبايل لفترة أطول من غير ما يفصل منك، دا غير إن الموبايل يدعم الشحن السريع علشان بييجي بقوة شحن 22.5 وات.
فتح العلبة موبايل Honor 10x Lite:
موبايل Honor 10x Lite.
اسكرينة تم وضعها بشكل مسبق على شاشة الموبايل.
رأس الشاحن بقوة 22.5 وات.
كابل USB من نوع Type C.
جراب ضهر شفاف لحماية الهاتف.
دبوس معدني لفتح مكان الشريحة والكارت الميمورى.
كتيب الضمان والتعليمات اللي بيوضح ازاي تستخدم الموبايل.
هاند فري.
سعر موبايل هونر 10X Lite:
السعر حوالي 3000 جنيه مصري لنسخة 128 مع 4 جيجا رام.
الرأي النهائي في موبايل هونر 10X Lite:
طبعًا قبل ما أقول رأيي النهائي في الجهاز اللي قدامي لازم أعرف إيه هي المميزات، وإيه هي العيوب اللي تخص الموبايل دا!
المميزات:
البصمة عملية جدًا وسريعة.
تصميم الموبايل شيك جدًا، وبميل إلى الفئة الاقتصادية العالية.
شاشة الموبايل كبيرة بشكل نقدر نقول من خلالها إنها بتقدم أداء مقبول جدًا حتى تحت ضوء الشمس بدقة عالية وهي الـ FHD.
الموبايل بييجي بمنفذ USB من النوع الأحدث الـ Type.
البطارية بتيجي بسعة كبيرة تساعدها على إنها تصمد للعمل لفترة طويلة خلال اليوم.
الجهاز بيدعم الشحن السريع بقوة 22.5 وات، ودا هيسهل توفير الوقت.
ويدعم أيضَا إمكانية استخدام شريحتين اتصال، وكارت ميموري في نفس الوقت.
العيوب:
لا توجد خدمات جوجل.
وزن الجهاز تقيل شوية، على الرغم من صُنعه من البلاستيك.
لا يوجد بالموبايل مستشعر جيروسكوب .
دا غير إن المعالج لا يقدم الأداء الأفضل في فئته السعرية.
ومع الأسف الموبايل لا يوفر تصوير الفيديوهات بجودة الـ 4K.
وأداء الكاميرا السيلفي مش كويس خالص.
الخلاصة:
احنا شايفين إن الموبايل تصميمه شيك وراقي، وخامته نضيفة ولو أنت مش مهتم بالكاميرا والتصوير يبقى الموبايل هيقدم لك أداء كويس…
وبخصوص أداء البطارية والشحن والمساحة، فنقدر نقول إن الموبايل يعتبر مقبول بالنسبة لسعره المعروض.