موبايل Xiaomi Redmi Note 9s هو أكتر موبايل طلع عليه إشاعات قبل ما ينزل، والأغرب إنه أكتر موبايل برده لاقيت عليه إقبال وطوابير حجز كتير من المستخدمين؛ وده لإن شاومي أكتر شركة تقدر تغري المستخدم بجملتها السحرية الشهيرة “القيمة مقابل السعر”.
تخيل لما تدفع حوالي 3000 جنيه مقابل موبايل بمعالج خطير وتصميم زجاجي يخليك تضعف قدام شكل الموبايل الشيك والجذاب في فئة سعرية معالجتها أضعف بشكل ملحوظ وبتصميم بلاستيك رديء…
فيه ناس قالوا إنه يستحق لقب “موبايل ثوري”، علشان كدا قررنا نعمل مراجعة للموبايل الثوري ده ونعرف هل يستاهل اللقب ويُفضل تشتريه ولا لأ!
تصميم موبايل Xiaomi Redmi Note 9s:
أولًا خامات الموبايل:
ضهر الموبايل زجاجي، لامع جدًا وجذاب وجاذبيته بتزيد مع انعكاسات الضوء اللي بتيجي عليه، بس بالرغم من ده لاقيت ملمسه مش فخم وخامة الزجاج مش أحسن حاجة، دا غير الإطار البلاستيكي اللي مش بيساعد في جزئية الفخامة دي.
ثانيًا التصميم الخارجي:
- تصميم الكاميرات:
نافذة الكاميرات اللي في ضهر الموبايل مميزة جدًا، تقدر تعرفها من بعيد وتميز الموبايل ده عن أي موبايل فئة متوسطة، وللأسف النافذة دي بارزة جدًا عن جسم الموبايل بس إحنا تقريبًا اتعودنا من شاومي على الكاميرات البارزة واللي بتتظبط لما تركب جراب للموبايل.
أبعاد الموبايل:
- الموبايل وزنه كبير 209 جرام وسُمكه 8.8 ملم وأبعاده كبيرة ودا بيرجع للحجم الكبير لشاشته، يعني لو إيدك صغيرة شوية مش هتبقى مريحة في الاستخدام ، وده يُعتبر عيب بس في نفس الوقت ميزة وهنعرف ليه في اللي جاي…
شاشة موبايل Xiaomi Redmi Note 9s:
- حجمها 6.67 بوصة من نوع IPS LCD، شاشة عملاقة فعلًا ودي بقى الميزة اللي قولتلك عليها فوق لو بتستخدم الموبايل كتير الشاشة الكبيرة هتساعدك في استخدامك بتجربة ممتازة جدا.
- شاشة الموبايل شاشة كاملة وبحواف قليلة جدًا، وفيها ثقب الكاميرا فوق، ودا مش مريحني الحقيقة كنت أفضل لو يروح ناحية الشمال ودي كانت ميزة في ريدمي نوت 9 العادي اللي راجعناه قبل كدا لو فاكر.
- ألوان الشاشة معتدلة جدًا، وبتشغل فيديوهات HDR على اليوتيوب فقط، يعني مش بتشغل على Netflix أي حاجة HD واللي ممكن شاومي تظبطها بأبديت للسوفت وير.
- عليها طبقة حماية Corning Gorilla Glass 5، ولأول مرة من شاومي لاقيت على الشاشة اسكرينة وأنا بطلع الموبايل من العلبة.
الشاشة دي فيها كام مشكلة غريبة ضايقتني، زي زوايا الرؤية تُعتبر الأسوأ في الفئة السعرية دي وأنصحك متشغلش الدارك مود في السوفت وير هنا؛ لأنه هيحسسك إن الجهاز رخيص أو قيمته قليلة نوعًا ما.
فيه ظِل أسود في مكان التقاء الشاشة بحواف الجهاز وثقب الكاميرا، المشكلة دي كانت موجودة قبل كدا في النوت 7، عمومًا هي حاجة مش بتأثر على تجربة الاستخدام ولكن شكلها غريب وبيديني إحساس مُنفر كدا وأنا بستعمل الموبايل.
أكتر حاجة أثرت معايا في تجربة الاستخدام هي حساسية ملمس الشاشة، يعني وأنا بكتب بسرعة شوية على الكيبورد، كل ما أقرب من الناحية اليمين بالذات بحس إن التاتش تقيل شوية وأي حاجة على الطرف اليمين معرضة يحصل فيها لمس خطأ، زي زرار المسح دا بيكون على الطرف اليمين، وكان مرة يشتغل ومرة يعلق معايا.
المشكلة كمان في الـProximity sensor المسئول عن غلق الشاشة لما تقرب الموبايل لودنك، تحسه مجنون تمامًا كل ما أجي أخرج الموبايل من جيبي دايمًا يظهر لي رسالة شيل إيدك من على الـ sensor وساعات بتظهر لوحدها كمان لو الموبايل محطوط على سطح المكتب وبشيله عادي خالص، وتقدر تدخل السوفت وير وتلغي الوضع دا من الوجود أساسًا.
مشكلة تانية قابلتي إني لو حاطط الموبايل على المكتب مثلًا وسيبته ومشيت الواي فاي بيفصل، فلو بنزل لعبة أو تطبيق وسيبته ورجعتله بعد شوية ألاقيه منزلش حاجة وفصل الواي فاي أصلًا؛ لما أفتحه بقا بيشغل الواي فاي تاني، ودا عيب مؤثر جدًا جدًا على تجربة الاستخدام.
مش هنكر طبعًا إني بكون مبسوط وأنا بتفرج في الشاشة دي على فيديوهات وكذلك على الأفلام.
كاميرات موبايل Xiaomi Redmi Note 9s:
من أهم مميزات النوت 9s هي الكاميرات بتاعته؛ لإنه بييجي بسيستم كاميرات مغري جدًا على موبايل بالسعر ده.
- الكاميرا الأمامية:
كاميرا السيلفي بدقة 16 ميجا بيكسل مع فتحة عدسة F/2.5.
وبتطلع صور Sharp مليانة تفاصيل وديناميك رينج مقبول جدًا، بس لون البشرة هو اللي مش عاجبني مِبيض أو فاتح زيادة عن اللزوم.
كذلك فيديوهات السيلفي ألوانها مش عجباني أوي.
الكاميرات الخلفية:
- ريدمي نوت 9s بييجي بأربع كاميرات خلفية الكاميرا الأساسية 48 ميجا بكسل بفتحة عدسة F/1.8، الصور من الكاميرا دي Sharp جدًا جدًا وبألوان معتدلة مش أوفر خالص وحسيتها بتميل للدفء كدا في معظم الظروف.
- الكاميرا التانية 8 ميجا بكسل بفتحة عدسة F/2.2، كاميرا Ultra wide بتدي زوايا أوسع ونتائجها ممتازة جدًا جدًا، ملقتش منها أي مشاكل.
- الكاميرا التالتة 5 ميجا بكسل Macro بتخليك تقرب جدًا من تفاصيل الصورة، وهي كاميرا تسويقية جدًا مش بتطلع صور حلوة أوي.
- الكاميرا الرابعة 2 ميجا بيكسل للعزل، بتطلع صور واسعة مع عزل الخلفية للشخص اللي بتصوره وهي ميزة لطيفة أنصحك تجربها.
- الموبايل هنا بيصور فيديوهات 4K، ألوان الفيديو بس اللي مش عجباني أوي والديناميك رينج ضعيف أوي وكمان مفيش أي تثبيت من أي نوع فلقيت الفيديوهات مهزوزة جدًا.
في المجمل الكاميرات كويسة جدًا ومحترمة في الفئة السعرية دي وبتتميز عن المنافسين كمان بالتفاصيل بتاعتها.
البصمة والزيادات:
البصمة:
مستشعر البصمة هنا في الفريم مدمج مع زرار الباور، هو شغال كويس، لكن لاحظت إن السوفت وير نفسه فيه مشكلة، وهي إن الموبايل بياخد وقت على ما يظهر الأيقونات على الشاشة، انت تحسها مشكلة في مستشعر البصمة ولكن هي مشكلة في السوفت وير نفسه، غير إن مكانه مرتفع في الموبايل، وده بيخليني لازم أعدل مسكتي للموبايل علشان أقدر أوصل لمكان البصمة.
المستشعرات
- مستشعر البصمة.
- مستشعر التسارع.
- مستشعر القرب.
- مستشعر البوصلة.
- مستشعر الجيروسكوب.
يدعم الموبايل شريحتين اتصال من نوع Nano Sim.
يدعم الموبايل شبكات الاتصال الجيل التاني الـ 2G والجيل التالت الـ 3G والجيل الرابع الـ 4G.
البلوتوث بييجي بإصدار 5.0 مع دعمه لخاصيتي الـ A2DP, LE .
ميزة تحديد الموقع الجغرافي الـ GPS، بالإضافة لأنظمة الملاحة المختلفة زي الـ A-GPS, GLONASS, GALILEO, BDS, NavIC.
يدعم الموبايل الواي فاي بترددات الـ a/b/g/n/ac بالإضافة لدعمه إلى الـ Dual-band, Wi-Fi Direct, hotspot.
منفذ الـ USB من نوع الـ Type C.
صوت موبايل Xiaomi Redmi Note 9s:
بالنسبة للصوت، فهو جاي من سماعة واحدة تحت على اليمين، الصوت مجسم والـ Bass فيه حلو جدًا ودرجة العلو بتاعته مقبولة.
صوت سماعة المكالمات عالي وحلو جدًا وصوت سماعات الأذن بردو ممتاز جدًا والصوت اللي بيطلع منها حلو جدًا.
أداء موبايل Xiaomi Redmi Note 9s:
- معالج كوالكوم سناب دراجون 720G.
- دقة تصنيع 8 نانو.
- معالج رسومي من نوع أدرينو 618.
- مساحة تخزين 64 جيجا مع 4 جيجا رام.
- مساحة تخزين 128 جيجا مع 6 جيجا رام.
أنتوا عارفين معالج سناب دراجون 720G الطاقة بتاعته في مستوى السناب دراجون 730G اللي بيتحط في موبايلات بـ 7000 و8000 جنيه، ومع ذلك أداء الموبايل عادي فيه أنيميشنز بتهنج، وفيه تقطيع والمشكلة مش في السوفت وير خالص؛ لأني جربته في موبايلات تانية وكان ممتاز جدًا…
ممكن تكون المشكلة في الشركة نفسها، يعني بقت بتصنع الموبايل كدا وخلاص علشان تلحق السيزون بتاع المنافسة اللي بقى بيحصل كل 3 شهور.
الألعاب من الحاجات اللي مش بتتأثر بالسوفت وير بنسبة كبيرة، وده بفضل معالج الجهاز الممتاز من نوع كوالكوم سناب دراجون 720G، المخصص للألعاب.
وهنا الشركة قدمت تجربة كويسة جدًا في مستوى المنافسين في فئة أسعار الـ 4000 و5000 و6000 جنيه كمان.
بطارية موبايلXiaomi Redmi Note 9s:
- بطارية 5020 مللي أمبير بتفضل فترة كويسة جدًا، مقدرش أقول تكمل أكتر من يوم بس دا على حسب استخدامك ممكن استخدامك يخليها تفضل يوم ممكن تفضل يومين.
- الشحن بقوة 18 وات رغم إن الشاحن اللي بييجي في العلبة بقوة 22.5 وات.
كنت بستخدم الموبايل بشكل مستمر على مدار اليوم، فكانت بتقضي اليوم معايا اليوم كامل، وده شيء كويس جدًا، خصوصًا إن الشاحن مش بيشحن الموبايل بسرعة بيشحن بالظبط 30% في نص ساعة يمكن الشاحن بطيء شوية أو البطارية كبيرة عليه.
فتح علبة موبايل Xiaomi Redmi Note 9s:
- هاتف Xiaomi Redmi Note 9s.
- اسكرينه تم وضعها بشكل مسبق على شاشة الهاتف.
- رأس الشاحن وتدعم الشحن السريع بقوة 22.5 وات.
- سلك USB يأتي من نوع Type C.
- جراب ظهر شفاف لحماية الهاتف.
- كتيب التعليمات وضمان الهاتف.
- دبوس معدني لفتح منفذ شرائح الاتصال وكارت الميموري.
سعرموبايل Xiaomi Redmi Note 9s:
الموبايل بيجي للأسواق المصرية بنسختين:
- النسخة الأولى بمساحة تخزين 64 جيجا مع 4 جيجا رام بسعر 3333 جنيه مصري.
- النسخة التانية بمساحة تخزين 128 جيجا مع 6 جيجا رام بسعر 3777 جنيه مصري.
الرأي النهائي في موبايل Xiaomi Redmi Note 9s:
المميزات:
- تصميم عصري بالوان جذابة ومن الزجاج.
- بطارية كبيرة تصمد لفترة كبيرة خلال اليوم.
- رأس الشاحن المرفق في العلبة تأتي بقوة 22.5 وات.
- يدعم تشغيل شريحتين وكارت ميموري في وقت واحد.
- أداء الهاتف ممتاز فمعالج سناب دراجون 720G قوي واستهلاكه قليل للبطارية.
- أحدث نظام تشغيل اندرويد 10 مع واجهة شاومي الأحدث الـ MIUI 11.
- يدعم الـ IR Blaster الخاص بالتحكم في الأجهزة الكهربائية عن بعد.
- يدعم لمبة اشعارات.
- كاميرا خلفية تقدم اداء قوي جدًا جدًا.
- شاشة ثقب والتي كان من النادر أن نجدها في الفئة المتوسطة مع دقة مقبولة ومستوى مقبول ولكنه ليس الأفضل.
العيوب:
الشاشة لا تدعم الـ 90Hz بعكس الـ Realme 6 .
العلبة ليس بها سماعات الأذن للأسف.
وزن الهاتف ثقيل نسبيًا بسبب استخدام الزجاج وسعة البطارية الكبيرة.
حجم الهاتف كبير بسبب استخدام شاشة عملاقة.
الكاميرا الخلفية بارزة بشكل كبير عن ظهر الهاتف مما يعرضها للكسر و لكن الجراب المرفق بعلبة الهاتف يغطي البروز بالكامل .
شكاوي من بعض مالكي الهاتف من دخول تراب في الكاميرات.
يوجد عدم استقرار بسيط في واجهة تشغيل شاومي ولكن شاومي ستقوم بارسال تحديثات لحل تلك المشاكل البسيطة كما هو المعتاد دائمًا.
البصمة المدمجة بزر الباور احيانا ستجد بها تأخر في الاستجابة بسبب واجهة التشغيل .
لاحظنا صوت خفيف اثناء مسك الهاتف باليد و تحريكه سريعًا.
الخلاصة:
الخلاصة إني شايف الموبايل عادي وكويس ومنافس في الفئة الشرسة دي وبيتفوق على الجميع بوجود معالجه القوي سناب دراجون 720G، لكن المعالج دا نقدر نطلع منه إمكانيات أحسن من كدا، وبالنسبة لك أنت كمشتري أنصحك تشترك في جروبات المستخدمين لشاومي في مصر علشان تعرف إذا كانت شاومي حلت المشاكل دي ولا لأ قبل ما تشتري ويمكن يظهرلك مشاكل تانية مظهرتش ليا في استخدامي للموبايل.
ودلوقت تقدر تختار موبايلك بدون حيرة عن طريق خدمتنا “اختار موبايلك” واللي بيقدمها موقع نــاس فــونــز وهتلاقي البادجيت بتاعتك والإمكانيات اللي أنت محتاجها في الموبايل بتاعك وبكل سهولة هنرشحلك الموبايل المناسب ليك في سوق الموبايلات كل اللي عليك اضغط هنـــــــــا…