سامسونج A10s | المراجعة والمواصفات
A10s

بعد النجاح العظيم اللي حققته سلسلة جالاكسي A بعد وصولها لمصر؛ واجه معظم المستخدمين نفس العيوب تقريبًا في الجهاز؛ فقررت سامسونج إطلاق سلسلة موبايلات جديدة “Galaxy A-s”، أو نسخة جديدة تمامًا من كل موبايل من السلسلة؛ فقدمت موبايل A10s الجديد بمميزات وإضافات مختلفة وجديدة، مش موجودة في السلسلة القديمة من موبايل A10، زي البصمة الخلفية أو كاميرا خلفية للعزل، ونزل الموبايل في مصر رسميًا مع تحديد سعره؛ يا ترى سامسونج A10s يستاهل الضجة الكبيرة اللي حصلت عليه؟

دا اللي هتكتشفه في آخر المقالة لو بتفكر تشتري الموبايل ده… أما بقى لو بتدور على موبايل بمواصفات معينة وميزانية معينة فإحنا بنقدملك خدمة “اختار موبايلك” هتبعتلنا كل المواصفات اللي محتاجها في الموبايل وميزانيتك وإحنا هنحددلك كخبراء الموبايل المناسب ليك، كل اللي عليك إضغط هنــــــــــــــا

تصميم موبايل سامسونج A10s: 

أولًا خامات الموبايل:

 أول حاجة بتشدنا للموبايل تصميمه وشكله الخارجي.

بيتميز موبايل سامسونج A10s بشكل الضهر الانسيابي البسيط، وتصميمه من البلاستيك البولي كاربونيت.

طبعًا لو أنت من كارهي الأجهزة البلاستيكية زي حالاتي هتشوف إن التصميم من الخامة دي وحش جدا ومش عملي بسبب إنه هيتخربش بسهولة ولازم تكون حاطه في الجراب طول الوقت علشان الخرابيش ومع ذلك هيتخربش بردو، بعكس الخامات لما تكون من الزجاج مثلا مع طبق حماية محترمة، ولكن حاليًا معظم الموبايلات أصلًا بتتصنع من الخامة دي فمش هنعترض أوي على الخامات خصوصًا في الفئة السعرية دي.

 

تصميم موبايل سامسونج A10s 
تصميم موبايل سامسونج A10s

 

ثانيًا التصميم الخارجي:  

تصميم الكاميرات:

الموبايل فيه كاميرتين موجودين شمال الموبايل فوق في شكل دواير وتحتهم الفلاش، شكلهم مألوف جدًا مفيهاش أي نوع من أنواع الاختلاف اللي يميزهم. 

ولكن نرجع نقول إن التصميم في الفئة دي مش هيكون مميز أوي بسبب السعر، لأن الفئة السعرية دي تعتبر من الفئة الاقتصادية.

أبعاد الموبايل: 

أكتر حاجة عجباني شخصيًا في الموبايل إن وزنه خفيف جدًا، تقريبًا 168 جرام يعني مش هتحس إنك شايل حاجة في إيدك، لو قارنته بوزن موبايلات تانية، فلو إيدك دايمًا مشغولة وبتشيل حاجات كتير هيناسبك وزن الموبايل دا، غير إنه أبعاده كويسة 156.9*75.8*7.8 ملم.

شاشة موبايل سامسونج A10s: 

بييجي سامسونج A10s بشاشة IPS LCD، بقياس 6.2 بوصة.

بتعرضلك 16 مليون لون، بدقة HD بجودة 720*1520 بيكسل، مع كثافة بيكسلات 271 بيكسل لكل بوصة.

تُعتبر شاشته نفس الشاشة الموجودة في سامسونج A10 القديم، بس فرقت في الحجم الأكبر للحواف في النسخة الجديدة.

بتمثل الشاشة حوالي 80.7% من حجم الموبايل كله، وبتدعم خاصية اللمس المتعدد مع نوتش فيها من فوق ممكن تلغيه من الإعدادات بسهولة.

 

شاشة موبايل سامسونج A10s 
شاشة موبايل سامسونج A10s

 

مش هنقول إن أداء الشاشة ممتاز جدًا، بس هو مقبول وكذلك حالة السطوع، لما تستخدمه تحت الشمس هتحس بفرق بسيط في الألوان يمكن تكون الألوان مشبعة أكتر من كدا ولكن بردو نرجع نقول إن الشاشة كويسة على سعر الموبايل.

كاميرات موبايل سامسونج A10s:

الكاميرا الأمامية:

 كاميرا السيلفي لموبايل سامسونج A10s بجودة 8 ميجا بيكسل، مع فتحة عدسة f/2.0.

بالنسبة لتصوير الفيديوز بجودة 1080 بيكسل مع 30 لقطة في الثانية، طبعًا إمكانياتها في التصوير مش الواو اللي هتبهرك بس مقبولة بردو.

الكاميرات الخلفية:

الموبايل له كاميرتين في الضهر…

الكاميرا الأولى، دقتها 13 ميجا بيكسل، بفتحة عدسة f/1.8.

الكامبرا التانية، بتييجي بدقة 2 ميجا بيكسل، مع فتحة عدسة، وفلاش أحادي LED، وبالمناسبة دا مكنش موجود في النسخة القديمة من الموبايل، وتُعتبر من الإضافات في النسخة الجديدة، تصوير الفيديو بيتم بجودة 1080 بيكسل مع 30 لقطة في الثانية.

 

كاميرات موبايل سامسونج A10s 
كاميرات موبايل سامسونج A10s

 

جودة الكاميرات مقبولة في الفئة بتاعتها وتعتبر كويسة ومنقدرش نقارنها بأي فئة تانية.

البصمة والزيادات: 

البصمة:

من ضمن مميزات سامسونج A10s، إنه موجود فيه مستشعر بصمة الإصبع وهتلاقيه في ضهر الموبايل.

يدعم الهاتف الـ GPS كما يدعم أنظمة الملاحة الأخرى مثل الـ A GPS, GLONASS, GALILEO.

ما زال الهاتف يحتفظ بمنفذ الـ 3.5 ملم الخاص بسماعات الاذن.

الموبايل يدعم تشغيل شريحتين اتصال من نوع Nano Sim، ويدعم شبكات الاتصال بدايةً من الـ 2G، والـ 3G، والـ 4G.

أما عن البلوتوث فبييجي بالإصدار الأحدث 5.0، بالإضافة إلى دعمه لخاصيتي الـ A2DP, LE.

يدعم الموبايل الواي فاي بترددات الـ b/g/n، كما يدعم الـ Wi-Fi Direct, hotspot.

منفذ الـ USB بييجي من النوع التقليدي، من نوع MicroUSB بالإصدار الثاني.

الموبايل بييجي بنظام تشغيل Android Pie، مع واجهة One UI.

ألوان الموبايل المتوفرة هي اللون الأسود، واللون الأحمر، وكمان الأزرق، والأخضر.

المستشعرات: 

  • مستشعر البصمة. 
  • مستشعر التسارع. 
  • مستشعر التقارب.

صوت الموبايل:

في التصميم الجديد انتقلت السماعة الخارجية للموبايل من ضهره  لأسفل الموبايل، ده ميزته أنه هيمنع كتم الصوت لو كنت شايل الموبايل في جيبك أو محطوط على مكتب أو أي سطح ممكن يغطي السماعة ويكتم صوتها.

بس فيه عيب بردو!

النسخة الجديدة صوتها بقى أضعف من صوت النسخة القديمة A10، بس مازال مقبول.

صوت سماعة المكالمات عالي ومتأثرش، يعني هتسمع صوت عالي وواضح في نفس الوقت فمش هتقلق من الناحية دي خالص.

أداء موبايل سامسونج A10s:

  • في النسخة الجديدة من A10 سامسونج بدلت معالج الـ Exynoss 7884 القديم بمعالج Mediatek MT6762 Helio P22 الجديد، تقريبًا المعالج دا هتلاقيه موجود في أغلب الموبايلات الاقتصادية المتقاربة في الاستخدام، ونقدر نقول إنه معالج كويس في كل من برامج المكالمات والسوشيال ميديا.
  • معالج الموبايل ثماني النواة بيشتغل بقوة تردد 2.0 جيجا هرتز Cortex-A53 وتكنولوجيا 12 نانومتر مع معالج رسوميات وجرافيك PowerVR GE 8320.
  • رام 2 جيجا بايت.
  • ذاكرة داخلية 32 جيجا

 

أداء موبايل سامسونج A10s 

 

باعتبار إن سامسونج أول مرة تستخدم المعالج دا، هنا بقى قابلها مشكلة صغيرة، يعني عندك لو روحت جربت المعالج دا في موبايلات تانية الأداء هيختلف للأحسن بس بنسبة بسيطة جدًا عن الموبايل دا.

بطارية موبايل سامسونج A10s: 

بيتميز سامسونج A10s ببطارية كبيرة بسعة 4000 مللي أمبير، بس عيبها أنها بتاخد وقت كبير في الشحن حوالي 3 ساعات، وبتفضل شغالة معاك حوالي 5-6 ساعات دا لو بتستخدامها بشكل مضغوط شوية.

 

بطارية موبايل سامسونج A10s 
بطارية موبايل سامسونج A10s

سعر موبايل سامسونج A10s:

الجهاز سعره حاليًا في مصر 1700 جنيه مصري، ودا للنسخة الـ 32 جيجا بـ2 جيجا رام.

محتويات علبة موبايل سامسونج A10s:

  1. موبايل سامسونج A10s.
  2. شاحن بقوة 7.5 وات.
  3. كابل الـ USB.
  4. كتيب التعليمات يشرح كيفية استخدام الموبايل مع الضمان.
  5. دبوس معدني لفتح مكان شريحتي الاتصال.
  6. هاند فري.

الرأي النهائي في موبايل سامسونج A10s:

سامسونج حاولت تقدم نسخة أفضل مفيهاش العيوب اللي كانت موجوة في السلسلة القديمة، بس كان فيه عيوب زي:

  • جودة أقل للصوت عن النسخة القديمة.
  • ضعف أداء المعالج الرسومي عن النسخة القديمة.
  • سعره عالي نوعًا ما بالنسبة للإمكانيات اللي بيدعمها.
  • مفيهوش لمبة إشعارات.

ونقدر نقول إن الموبايل مزيج مش بطال من كذا حاجة ومحاولة مقبولة من سامسونج بس مش الأفضل خالص ومش أحسن حاجة للشراء في الفئة دي، وهننتظر من سامسونج محاولات أفضل من كدا في النسخ اللي جاية.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *