مراجعة موبايل سامسونج نوت 20
سامسونج نوت 20

من فترة لقينا شركة سامسونج بتعلن عن موبايل في سلسلة الـ Note واللي بيفضلها كتير من الناس ويمكن أنا منهم؛ لأنهم دايمًا بيكون اهتمامهم بالسلسلة دي وبيجمعوا في السلسلة ما بين أحسن المميزات الموجودة في سلسلة الـ S، مع ميزة تانية حلوة وهي قلم الـ S Pen وكانت سامسونج مهتمة جدًا بتطويره باستمرار علشان تفضل كسبانة ثقة ورضا المستخدمين، فكان لازم سامسونج نوت 20 يبقى الإصدار الأفضل والمحسن من سامسونج نوت 10؛ فزادت مساحة شاشة الموبايل، واستخدمت سامسونج معالج أحسن علشان يتفوق الموبايل وتحس فيه بفرق حقيقي.

وقبل ما ندخل في المراجعة خليني أقترح عليك خدمة من الخدمات اللي بنقدمها وهي خدمة “اختار موبايلك” واللي بيقدمها موقع ناس فــونـــز والخدمة دي عن طريقها هنرشحلك الموبايل المناسب لاحتياجاتك ببساطة علشان تلاقي أفضل موبايل وسط بحر الموبايلات اللي في السوق حاليًا، كل اللي عليك تعمله اضغط هنــــــــــــا… وابعتلنا ميزانيتك والمواصفات اللي بتعوزها في الموبايل وإحنا هنرشحلك المناسب ليك.

خلينا ندخل في المراجعة…

تصميم موبايل سامسونج نوت 20:

أولا خامات الموبايل:

الموبايل مصنوع من الجلاستيك، مع معدن الألومنيوم للفريم بتاع الموبايل.

الخامة هنا صحيح من الجلاستيك ولكن سامسونج عملت حسابها بطبقة زيادة من المط علشان تعطيك طابع الرقي والإحساس بالفخامة وإن كنت أنا بفضل الخامات الزجاجية طبعًا في موبايل زي ده.

التصميم الخارجي:

تصميم الكاميرات: 

الموبايل فيه 3 كاميرات خلفية في شكل دواير محطوطين في بوكس مع بعض ومعاهم الفلاش، وبتغطيهم طبقة من الزجاج الشفاف علشان تحميهم من الأتربة ويقلل تعرضهم للخدش وغيره.

التصميم بصراحة معجبنيش أوي وشايف إن تصميم النوت 10 بلاص كان أفضل في النقطة دي.

 

تصميم موبايل سامسونج نوت 20
تصميم موبايل سامسونج نوت 20

 

أبعاد الموبايل: 

  1. بييجي الموبايل بأبعاد 161.6×75.2×8.3 ملم.
  2. وزنه 192 جرام.

أبعاد الموبايل ممتازة ووزنه الخفيف هنا هيخليك تحب تستعمله لفترات طويلة من غير ما يتعب إيدك أو يخليك محتاج راحة كل شوية زي موبايلات تانية كتير تحس إنك ممكن تروح تتخانق بيها.

شاشة موبايل سامسونج نوت 20:

  • شاشة الموبايل جاية بنوتش الثقب اللي بتقول عليه سامسونج الـ Infinity O.
  • والشاشة هنا من نوع Super AMOLED PLUS.
  • مساحة الشاشة 6.7 إنش بجودة الـ FHD+ بدقة 1080×2400.
  • الشاشة بتدعم خاصية الـ HDR، وخاصية Always on display علشان تظهرلك أي إشعارات على الشاشة لما تكون مقفولة وطبعًا مفيش لمبة إشعارات واكتفت سامسونج بخاصية الـ Always on display  وخلاص في موبايلها سامسونج نوت 20.

بتمثل شاشة سامسونج نوت 20 حوالي 89.2 % من حجم الموبايل كله ودي نسبة استحواذ بشوفها ممتازة جدا للناس اللي بتحب الشاشات الكاملة واللي مش بتحب الزيادات الكتير في الشاشة.

 

شاشة موبايل سامسونج نوت 20
شاشة موبايل سامسونج نوت 20

 

تجربة الشاشة بقى، التجربة هنا كانت عالية جدا، الألوان كانت مشبعة وواخدة حقها، التفاصيل كانت عميقة وتحس إنك بتشوف الحاجة قدامك على الحقيقة وده المعتاد أصلا من شركة سامسونج في الشاشة، بس الغريب هنا في الموبايل ده بالذات إن الشاشة مبتدعمش ترددات عالية ولا دقة عالية ومش عارف ليه سامسونج عملت كدا بالرغم إن دي نقاط القوة بتاعتها أصلا!

كمان بنشوف لأول مرة في سلسلة النوت حواف دائرية، وده شيء متعودناش عليه وعايشين في الحواف المستطيلة من زمان ومحدش اشتكى لأنها مناسبة لمعمارية بناء الموبايل بعكس الحواف الدائرية اللي معجبتنيش خالص هنا.

آخر حاجة ضايقتني هنا كانت الثقب بتاع الكاميرا الأمامية واللي كان كبير بشكل ملحوظ وبالتالي أثر على تجربة الشاشة بالسلب.

كاميرات موبايل سامسونج نوت 20:

الكاميرا الأمامية:

  • بتصوربدقة 10 ميجا بكسل مع فتحة عدسة F/2.2.
  • بتدعم الكاميرا خاصية تصوير الفيديوهات بجودة الـ 4K، معدل تصوير 30 و60 إطار في الثانية بدقة 2160 بكسل.
  • مزودة بخاصية التصوير بجودة الـ FHD بدقة 1080 بكسل بمعدل التقاط 30 إطار في الثانية.

الكاميرات الخلفية:

  • الموبايل مزود بـ3 كاميرات خلفية، الكاميرا الأولى والأساسية للتصوير دقتها 12 ميجا بكسل مع فتحة عدسة F/1.8.   
  • الكاميرا التانية بتصور بدقة 64 ميجا بكسل وفتحة عدسة F/2.0، ودي الكاميرا الخاصة بالزوم الـ 3X والزوم الديجيتال وبتدعم المثبت البصري الـ OIS.
  • الكاميرا التالتة والأخيرة بتصور بدقة 12 ميجا، وهي الكاميرا الأساسية للتصوير العريض، كانت بتساعدني أصور فيديوهات بأقصى تثبيت ممكن تلاقيه عن طريق الـ Super Steady video.

الكاميرات هنا بتيجي بفلاش أحادي من نوع الليد فلاش علشان يساعد شوية في الإضاءات الضعيفة.

 

كاميرات موبايل سامسونج نوت 20
كاميرات موبايل سامسونج نوت 20

 

لما جربت الكاميرات بقى كنت مستني أداء مختلف بصراحة وكنت حاطت أمل كبير على الأداء في النسخة دي ولكن للأسف مكانش الأفضل، الموبايل ما زال عملاق وبيقدم تجربة مرضية ولكن مش اللي كنت متوقعه من سامسونج في سلسلة عملاقة زي النوت!

مش عارف إيه سر احتفاظ سامسونج بكاميرات الـ X3 ومعظم المنافسين دلوقت بيحطوا X5 فإذا كانت سامسونج مش بتحطها في جهاز زي النوت فمش عارف هي ناوية تحطها إمتى الحقيقة.

البصمة والزيادات:

البصمة:

الجهاز مزود ببصمة الإصبع في قلب الشاشة من تحت، بمجرد ما تحط بصمتك عليها هتفتح وده خلاص مبقاش شيء مبهر وبقينا نشوفه حتى في الأجهزة المتوسطة، بصمة الوجه في الموبايل هنا مميزة شوية وسريعة ومبتعلقش وده شيء يحسب لسامسونج.

المستشعرات:

  • مستشعر التسارع.
  • مستشعر التقارب.
  • مستشعر الجيروسكوب.
  • مستشعر البوصلة.
  • مستشعر البارومتر.

صوت الموبايل:

سواء كنت بتسجل ريكورد أو بتصور فيديو أو بتعمل مكالمة؛ المايك الثانوي الموجود في الجهاز هيعزل أي دوشة أو صوت تاني حواليك، غير المايك التالت الموجود في إطار الكاميرا الخلفية، واللي بيخلي تجربة تصوير الفيديوز هنا متميزة جدًا.

السماعات الخارجية في الموبايل هنا ستيريو كالعادة من سامسونج في الفلاج شيبس بتاعتها وعجبني جدا تجربة الموبايل في الألعاب من غير هاند فري واللي شوفت إنها قدمت أداء كويس جدًا وصوت مجسم.

يدعم الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.

أيضًا يدعم الواي فاي بترددات الـ ac/a/ax/b/g/n، كما يدعم خاصية الـ Dual-band, Wi-Fi Direct, hotspot.

أم بالنسبة لمنفذ الـ USB فييجي من النوع الأحدث واللى هو الـ ، Type C، مع دعمة لخاصية الـ OTG.

الموبايل جاي بألوان جذابة زي اللون الأسود المط، والأخضر المط، وكمان البرونزي المط.

يدعم الموبايل شبكات الجيل الثاني، والجيل الثالث، والجيل الرابع.

بييجي البلوتوث بالإصدار الخامس، مع دعمه لـ خاصية الـ A2DP، aptX، والـ LT.

الموبايل جاي بأحدث نظام تشغيل Android 10.0 مع واجهة سامسونج الـ One UI 2.1.

يدعم الموبايل امكانية تشغيل شريحتين اتصال في نفس الوقت من نوع Nano Sim.

أداء موبايل سامسونج نوت 20:

  • معالج من نوع Exynos 990 بتكنولوجيا 7 نانو، ومعالج رسومي Mali-G77 MP11.
  •  مساحة الموبايل 128 أو 256 جيجا بايت.
  • رامات 8 جيجا بايت.

 

أداء موبايل سامسونج نوت 20
أداء موبايل سامسونج نوت 20

 

المعالج الإكزينوس في موبايلات سامسونج بصراحة بيشكل مشكلة حقيقية بالنسبة ليا، يعني إمتى نشوف اليوم اللي سامسونج هتستخدم فيه معالج سناب دراجون مثلا علشان ترقى بموبايلاتها للمنافسين؟

المعالج هنا صحيح معالج كويس وبيقدم أداء عالي وبيقدر يشغل أي حاجة بشكل كويس ولكن من غير المعقول إنه يتقارن مثلا بمعالج زي سناب دراجون 865 بلاص!

بطارية موبايل سامسونج نوت 20:

بييجي سامسونج نوت 20 ببطارية سعتها 4300 مللي أمبير، من الليثيوم بوليمر وهي غير قابلة للإزالة من الجهاز.

البطارية في الموبايل هنا بتدعم الشحن اللاسلكي بقوة 15 وات وكمان بتقدر إنها تشحن شحن لاسلكي عكسي بقوة 4.5 وات.

البطارية بتشحن شحن سلكي باستخدام الشاحن السريع بسرعة 25 وات، ودي نقطة أنا باخدها على سامسونج الحقيقة لأن البطارية وسرعة الشحن متمش تطويرهم خالص عن النسخة السابقة في سلسلة النوت.

 

بطارية موبايل سامسونج نوت 20
بطارية موبايل سامسونج نوت 20

سعر موبايل سامسونج نوت 20:

السعر حوالي 14000 جنيه للنسخة 256 جيجا مع 8 جيجا رام بمعالج إكسينوس بيدعم شبكات الجيل الرابع وما قبله فقط!

محتويات علبة موبايل سامسونج Note 20:

  1. موبايل سامسونج Note 20.
  2. شاحن بقوة 25 وات، و15 وات للشحن اللاسلكي، و 4.5 وات للشحن اللاسلكي العكسي.
  3. كابل الـ USB من نوع Type C.
  4. كتيب التعليمات مع الضمان يشرح كيفية استخدام الموبايل.
  5. دبوس معدني لفتح مكان شريحتي الاتصال.
  6. هاند فري من نوع AKG.
  7. قلم الـ S Pen.
  8. منفذ OTG.
  9. جراب ضهر شفاف لحماية الموبايل.
  10. اسكرينة بلاستيك تم وضعها بشكل مسبق على الجهاز.

الرأي النهائي في سامسونج نوت 20:

الموبايل بصراحة معجبنيش، التطوير فيه مش كافي ولا فيه مميزات متفردة تخليه ينافس بنفسه بعيدًا عن مميزات النوت الأساسية، كنت أتمنى أشوف حاجات كتير في الموبايل أو حتى أشوف الموبايل بمعالج غير إكزينوس بس للأسف ده محصلش!

فلو هتسألني عن رأيي هقولك إن الموبايل ده مش أحسن اختيار في الفئة دي خصوصًا إنه مش موبايل رخيص علشان أقولك جربه…

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *