سلسلة النوت من سامسونج ليها طابع خاص ودائمًا هي الأكثر نجاحًا وسط كل الموبايلات الفلاجشيب التانية وإحنا دلوقتي هنراجع موبايل سامسونج نوت 20 ألترا بطل جديد من أبطال سامسونج أو ممكن يكون هو البطل الأقوى عندها دلوقتي سامسونج بتحاول على قد ما تقدر متزعلش حد في موبايلات جالكسي نوت وبتمسك العصاية من النص فهل دا حصل في النوت 20 ألترا؟
هل الموبايل يستاهل لقب أفضل موبايل أندرويد في 2020 ؟
دا اللى هنشوفه في مراجعتنا للموبايل دا…
تصميم موبايل سامسونج نوت 20 ألترا:
أولًا خامات الموبايل:
التصميم من الزجاج الصريح والفريم من الـ Stainless Steel، وهو فريم صغير جدًا يمين وشمال الموبايل وبيكبر بس عند أزرار الباور والتحكم في الصوت.
ثانيًا التصميم الخارجي:
تصميم الكاميرات:
تصميم الكاميرات هنا بصراحة مميز جدًا، عارف لما يكون مصمم أزياء عنده كولكشن جديدة بيطلعها للنور وعامل فيها إبداعات رهيبة وعايز يوريها لكل الناس؟
سامسونج هنا عملت كده بالظبط، عملت الديزاين وأبدعت فيه، ولكن للأسف دا مكملش بسبب البروز الكبير اللي في ضهر الموبايل!
يعني ليه الإنسان هيشتري فلاجشيب؟ هل علشان يحطه في جراب ويقفل عليه؟ ولا علشان يستمتع بيه؟
بصراحة البروز دا عمل حاجز شوية بيني وبين الموبايل بالرغم إن سامسونج أعلنت عن إن فيه طبقة حماية على الكاميرات ولكن دا مش كفاية بالنسبة ليا.
أبعاد الموبايل:
الموبايل بييجي بأبعاد 164.8×77.2×8.1 ملم.
ووزن 208 جرام.
شاشة موبايل سامسونج نوت 20 ألترا:
الشاشة هنا بحجم عملاق 6.9 بوصة من نوع Dynamic AMOLED واللى بتكون من الجيل التاني، بدقة بتوصل لـ QHD+، مع حواف فيها انحناء بسيط ومعدل تحديث الشاشة بيوصل لـ 120 هيرتز مع معدل سطوع عالي بيوصل لـ 1500، كمان مع ثقب للسيلفي في منتصف الشاشة.
وأنا هنا طبعًا بقول إنه “بيوصل” لأن الدقة العالية الـQHD+ والـ 120 هيرتز كالعادة مش بيشتغلوا مع بعض ومينفعش يشتغلوا مع بعض لأن وقتها مش هتحس إن الموبايل فيه بطارية لأنك هتعلقه عالشاحن طول اليوم بسبب الاستهلاك اللي هيكون عالي جدًا وقتها علشان كدا لما بترفع التردد لـ 120 هيرتز هتلاقي الدقة نزلت لـFHD+ فقط بشكل أوتوماتيكي.
عمومًا الشاشة هنا بتييجي تكمل التماثل الرهيب في التصميم الشيك جدًا لموبايل سامسونج نوت 20 ألترا، مع ثقب في النصف حجمه صغير جدًا.
الشاشة هنا طبعًا شاشة فلاجشيب من شركة سامسونج ودي لوحدها كفيلة إنها ترفع أي موبايل بمجرد وضعها عليه، سامسونج كمان هنا زودت الشاشة بطبقة حماية جوريلا جلاس الجيل السابع يعني حماية عملاقة بصراحة، والشاشة طبعًا كالعادة بتقدم أفضل أداء في السوق من حيث الألوان وتشبعها ومعالجتها، ودا طبعًا بيرجع لحاجات كتير صعب تلاقيها في مكان تاني غير سامسونج، كمان التفاصيل اللي الشاشة دي بتطلعها هي تفاصيل أقل ما يُقال عنها إنها خرافية.
كاميرات موبايل سامسونج نوت 20 ألترا:
الكاميرا الأمامية:
بالنسبة لكاميرا السيلفي فللأسف هي معجبتنيش، ودا لأن لازم الإضاءة تكون كويسة وكويسة جدًا كمان علشان تاخد صور توصل إن يتقال عليها صور فلاجشيب، الكاميرا عجبتني أكتر في الإضاءات الداخلية وطلعت صور مقبولة بالنسبة ليا.
الـ Night Mode التفاصيل بتكون متوزعة على الصورة كلها مش على الشخص نفسه، وسامسونج عملت كدا علشان الصورة كلها تبقى واضحة ودا بيبقى على حساب إن تفاصيل الأشخاص مش هتبقى كتير.
السيلفي بصراحة معجبنيش ومكانش أحسن حاجة في الموبايل خالص وكمان المنافسين يتفوقوا في النقطة دي بسهولة للأسف.
الكاميرا الخلفية:
النوت 20 الترا جاي بـ3 كاميرات بتصميم جديد زي ما قولنا…
- الكاميرا الرئيسية، بتييجي بدقة 108 ميجا بيكسل، مع فتحة عدسة F/1.8، وكمان بمثبت بصري.
- الكاميرا التانية Telephoto، دقتها 12 ميجا بيكسل، بفتحة عدسة F/3.0، والمسؤولة عن الزووم الحقيقي وهو هنا 5 إكس Optical ودا اللي كان نفسي أشوفه من سامسونج وأخيرًا شوفته قبل ما أموت وبيوصل الزوم دا لحد 50 إكس Digital، وبتدعم المثبت البصري.
- والكاميرا الأخيرة، بتييجي بدقة 12 ميجا بيكسل، مع فتحة عدسة F/2.2، وهي خاصة للتصوير الواسع.
الكاميرات هنا بقى سامسونج قررت تدعمها بالـ Laser Auto focus واللي بنشوفه لأول مرة، الموبايل دا بيقدم أداء عالي في كل ما يتعلق بالزوم، ودا لأن سامسونج أخيرًا قررت إنها تحط عدسة X5 في موبايلاتها، والجميل في الموضوع هو دعمها بزوم ديجيتال لحد 50 إكس.
بالنسبة لتشبع الألوان، الألوان هنا هتكون حقيقية بشكل كبير مع شوية إضافات ظريفة من سامسونج علشان تحلي الصورة وتظهرها بتفاصيل غنية، حتى في اللإضاءات الليلية والخافتة بتكون الصور جودتها حلوة وتفاصيلها غنية، لما جربت أصور بليل وأستخدم النايت مود لقيت إن الزوم آخره 10 إكس بس ودا علشان التفاصيل بليل بتكون قليلة لكن دا شيء مقبول جدًا بالنسبة ليا.
البصمة والزيادات:
البصمة:
بصمة الإصبع Ultrasonic تحت الشاشة، وسامسونج كان عندها مشكلة في السرعة في المستشعر طول عمرها لكن هنا السرعة اتحسنت كتيرعن الأجيال اللي فاتت وبقيت تقدر تعتمد عليها أكتر إنها تفتح بشكل سريع.
الـ Face Unlock لسه سرعته مش حلوة و بيتأخر شوية ودا كان غريب في موبايل زي دا الحقيقة!
المستشعرات:
- مستشعر التقارب.
- مستشعر التسارع.
- مستشعر البوصلة.
- مستشعر الـ Gyroscope.
- مستشعر الإضاءة.
- مستشعر البصمات.
صوت الموبايل:
صوت موبايل سامسونج نوت 20 ألترا هو صوت ستيريو محترم، صوته عالي ومجسم والصوت بيطلع من السماعة السفلية وسماعة المكالمات زي ما شوفنا في أكتر من موبايل، تجربة صوتية محترمة، ومفيش مدخل 3.5 ملم ودا اللي بدأنا نشوفه في سلسلة النوت بداية من النوت 10+.
فيه ميزة مهمة وعظيمة الحقيقة وهي الـDex.
تقدر توصل الموبايل بشاشة Wireless بدون أسلاك… تكونوا بس على نفس شبكة الـ WiFi وتقدر توصل الموبايل عليها وهيفتحلك كل الـ Data اللي على الموبايل في شكل وواجهة مُختلفة قريبة من شكل الـ Windows شوية وكمان تقدر تستخدم القلم على شاشة الموبايل بطريقة تحاكي الـ Mouse ودي من أكتر الحاجات اللي عجبتني في الموبايل دا لأنه بيكون عملي جدًا لحد زيي بيحتاج يستخدم الموبايل على طول في شغله وبيحتاج شاشة كبيرة علشان تناسبه أكتر.
تقنيات الاتصال:
يدعم الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.
أيضًا يدعم الواي فاي بترددات الـ ac/a/ax/b/g/n، كما يدعم خاصية الـ Dual-band, Wi-Fi Direct, hotspot.
أم بالنسبة لمنفذ الـ USB فييجي من النوع الأحدث واللى هو الـ Type C، مع دعمة لخاصية الـ OTG.
الموبايل بييجي بألوان جذابة زي اللون الأسود اللامع، والأبيض اللامع، وكمان البرونزي المط.
يدعم الموبايل شبكات الجيل الثاني، والجيل الثالث، والجيل الرابع.
يدعم موبايل سامسونج Note 20 Ultra الميكروفون الإضافي الخاص بمنع الضوضاء وقت استخدامك للموبايل سوات وقت المكالمات أو التسجيل، كما يدعم ميكروفون ثالث موجود في إطار الكاميرا الخلفية.
بييجي البلوتوث بالإصدار 5.0، مع دعمه لـ خاصية الـ A2DP، aptX، والـ LT.
أداء موبايل سامسونج نوت 20 ألترا:
معالج Exynos 990 بمعمارية 7 نانو داعم لشبكات الجيل الرابع فقط وهنا بصراحة سامسونج قتلت الفرحة جوايا بما نزلت المعالج دا، سامسونج مصرة على إثبات أنها متأخرة بخطوة بمعالجات إكسينوس، المعالج الموازي للـ 990 من نوع سناب دراجون هنا بيسبقه بشكل كبير.
الغريب هنا بقى كان سخونية الموبايل الغريبة، يعني إيه يكون فلاجشيب وبيسخن؟
تقنيات التبريد بقت موجودة في الموبايلات العادية في الفئة المتوسطة خلاص وسامسونج لسة بتنزل فلاجشيب بيسخن!
ما علينا، سامسونج أصلًا بوظت الموبايل بالمعالج دا، ودا أنا كنت متوقعه بسبب الضغط الكبير على المعالج.
بطارية موبايل سامسونج نوت 20 ألترا:
بطارية متواضعة جدًا جدًا بدون أي إضافة أو تطوير عن النسخ السابقة، البطارية هنا 4500 مللي أمبير يعني لو واحد استخدامه قوي شوية الموبايل مش هيكمل في إيده 5 ساعات ودا طبعًا شيء سيء جدًا.
سعر موبايل سامسونج نوت 20 ألترا:
سعر النسخة الـ 256 جيجا و8 جيجا رام حاليًا هو 18555 جنيه مصري.
سعر النسخة الـ 128 جيجا و12 جيجا رام هو 18800 جنيه مصري.
محتويات علبة موبايل نوت 20 ألترا:
- موبايل سامسونج نوت 20 ألترا.
- شاحن بقوة 25 وات، و15 وات للشحن اللاسلكي، و 4.5 وات للشحن اللاسلكي العكسي.
- كابل الـ USB من نوع Type C.
- كتيب التعليمات مع الضمان يشرح كيفية استخدام الموبايل.
- دبوس معدني لفتح مكان شريحتي الاتصال.
- هاند فري من نوع AKG.
- قلم الـ S Pen.
- منفذ OTG.
- جراب ضهر شفاف لحماية الموبايل.
- اسكرينة بلاستيك تم وضعها بشكل مسبق على الجهاز.
الرأي النهائي في موبايل سامسونج نوت 20 ألترا:
الموبايل للأسف مش مفهوم، يعني مش قادر أقول إن الموبايل كامل أو بيقدم تجربة قوية متكاملة!
لكن فيه حاجات قوية جدًا وفيه حاجات تانية كانت مخيبة للآمال الحقيقة، الموبايل دا هيحبه سامسونج فانز والناس اللي بتحب سلسلة النوت عمومًا، ولكن منصحكش أنك تشتريه لو بتدور على Up Great محترم واستنى حاجة أفضل منه لمصلحتك.
لو أنت بتدور على ترشيح لموبايل مناسب ومحتار في الأنواع اللي في السوق فإحنا بنقدملك خدمة “اختار موبايلك“، واللي بيقدمها موقعنا ناس فـونز الخدمة دي عن طريقها تقدر تبعتلنا ميزانيتك المتوقعة والحاجات اللي بتحتاجها في الموبايل وإحنا هنرشحلك الموبايل المناسب لاحتياجك، كل اللي عليك إنك تبعنلنا هنــــــــــــا…
اعرف برضه: