مراجعة موبايل سامسونج جالاكسي Z Fold 2
سامسونج جالاكسي Z Fold 2

أعلنت شركة سامسونج في المؤتمر الخاص بيها عن أحدث إصدار ليها في سلسلة الفولد، واللي كان سامسونج جالاكسي Z Fold 2 الجديد القابل للطي واللي كان محور الاهتمام الشديد وقتها من جميع الحاضرين والمتفرجين اللي كانوا منتظرين الجهاز دا بعد فشل النسخة الأولى منه وسحبها من الأسواق، فهل سامسونج قامت بتعديل النسخة دي لدرجة تخليها جاهزة للطرح في الأسواق؟

هنعرف الإجابة على السؤال دا بعد ما نشوف مع بعض إيه هي خدمة “اختار موبايلك” واللي بيقدمها موقع نــاس فــونــز والخدمة دي عبارة عن خدمة قوية جدًا بنقدمها، والغرض منها إنك متحتارش في اختيار موبايلك القادم، يعني لو عاوز تجيب موبايل وتايه مش عارف هتختار إيه يبقى الخدمة دي هتفيدك، دا لأنك هتبعتلنا ميزانيتك المتوقعة والمواصفات اللي أنت محتاجها عن طريق الضغط هنـــــــــــــا… وإحنا هنرد عليك بالموبايل المناسب ليك والمناسب لاستخدامك.

 خلونا بقى نشوف موبايل سامسونج جالاكسي Z Fold 2 يستاهل ولا لأ.

تصميم موبايل سامسونج جالاكسي Z Fold 2:

أولًا خامات الموبايل:

الموبايل بييجي من خامات زجاجية بريميم جدًا، يتوسطه فريم من الألومنيوم واللي هنتكلم عنها بالتفصيل حالًا.

ثانيًا التصميم الخارجي: 

هنلاقي هنا إن الموبايل اتصمم بشكل خرافي ومميز عن المعتاد في إصدارات سامسونج القديمة ودا لأنه؛ بيتميز بتصميم قابل للطي فريد من نوعه ودا أيضًا بيديله مساحة أصغر في الحجم بكل سهولة والشاشة الخارجية هنا عليها طبقة حماية جوريلا جلاس الجيل السادس.

لما تفتح الموبايل بقى بيظهر الإبهار الحقيقي، شاشة كاملة بدون حواف خالص، هو مجرد الثقب الخاص بالكاميرا، يعني كأنك بتستخدم تابلت بالظبط!

تصميم الكاميرات: 

الكاميرات هنا شوفناها بنفس التصميم في السامسونج نوت S20 ألترا واللي كان تصميم مميز جدًا بالنسبة ليا وعجبني استخدامه هنا في السامسونج جالاكسي Z Fold 2 لأنه مناسب للموبايل بشكل رهيب وده طبعًا بيرجع لكون الموبايل طويل.

 

تصميم موبايل سامسونج جالاكسي Z Fold 2
تصميم موبايل سامسونج جالاكسي Z Fold 2

 

أبعاد الموبايل: 

  • أبعاد الموبايل د تساوي 159.2×128.2×6.9 ملم.
  • الموبايل هنا وزنه تقريبًا 282 جرام واللي هيشوفه بعض الناس تقيل، ولكن بالعكس تجربته هنا تستاهل كل جرام لأن أنت زي ما تكون ماسك موبايل وتابلت مع بعض.

شاشة موبايل سامسونج جالاكسي Z Fold 2:

الموبايل وهو مقفول بيوفرلك شاشة AMOLED، واللي تبان رفيعة بعض الشيء بقياس 6.2 إنش، والشاشة دي دقتها حادة واللي كانت 2,260 x 816  بكسل، ودا بيدل على أن الشاشة ألوانها مشبعة، ودا بيرجع لإنها بتيجي بحوالي 386 بكسل في الإنش الواحد، ونقدر نقول إن استخدامها في ضوء النهار كان سلس جدًا، والشاشة هنا بتييجي بمعدل تحديث 60 هرتز، ونسبة سطوع عجبتني، كمان بتوفر للمستخدمين تجربة رؤية مميزة، والكاميرا هنا جت مخفية في الموبايل من فوق.

 

شاشة موبايل سامسونج جالاكسي Z Fold 2
شاشة موبايل سامسونج جالاكسي Z Fold 2

 

الشاشة الخارجية للموبايل هي شاشة زجاجية بأبعاد طويلة جدًا 5 إلى 9، وهي شاشة مميزة جدًا للاستخدام الخفيف زي قراءة الرسايل، متابعة الإشعارات وغيرها من الاستخدامات اللي ممكن متحتاجش الشاشة الداخلية ليها.

ممكن تكون المشكلة الأكبر اللي كانت بتواجهنا مع شاشة الهاتف السابق Galaxy Fold هي ثقب الكاميرا الأمامية اللي كان بيشغل الزاوية اليمنى من الشاشة بالكامل، وسامسونج طبعًا قامت بحل المشكلة دي وقامت بتصغير الثقب لدرجة إنك مش هتاخد بالك منه.

ساسمونج اشتغلت على تصميم الشاشة الداخلية بقياس 7.6 إنش، لتعمل بدقة 2,208 x 1,768 بكسل، بحيث يحتوي الإنش الواحد في الشاشة على 373 بكسل، وبالتالي فإن البكسلات بتتوزّع بشكل متناسق في كل أجزاء الشاشة.

الشاشة بتييجي بمعدل تحديث 120 هرتز، ودا بيخلي استخدام الموبايل حاجة خيالية في التصفح والحاجات اللي بتحاج فيها الشاشة بشكل رئيسي، وكمان معدل التحديث مش بيكون ثابت لأن سامسونج هنا عملت حاجة اسمها معدل التحديث المتغير، ودا بيوزع معدل التحديث بما يناسب المهمة المطلوبة علشان الموبايل ينظم استهلاك الطاقة.

كاميرات موبايل سامسونج جالاكسي Z Fold 2:

الكاميرا الأمامية:

كاميرا سيلفي بتييجي بدقة 10 ميجا بكسل. 

الكاميرا الخلفية:

الكاميرات الخلفية ثُلاثية…

 الكاميرا الأولى، بتييجي بدقة 12 ميجا بيكسل، بفتحة عدسة F/1.8 تدعم مثبت بصري.

الكاميرا الثانية، دقتها 12 ميجا بيكسل، بفتحة عدسة F/2.4، وهي Telephoto للزوم وتدعم مثبت بصري أيضًا.

 والكاميرا الثالثة، بتييجي بدقة 12 ميجا بيكسل، بفتحة عدسة F/2.2، وهي Ultra Wide للتصوير العريض.

هنلاقى هنا أن الكاميرا بتدعم تسجيل 4 كيه لالتقاط مقاطع فيديو بتفاصيل نابضة بالحياة، في حين كمان تقدر تحط وضع الثبات الفائق علشان تاخد مقاطع فيديو ثابتة لإظهار لقطات الحركة بشكل أكثر سلاسة وسهولة.

 أما خاصية فلتر التخصيص فدي بقي  بتمكنك من إنشاء الفلاتر الخاصة بيك ودي طبعًا وفقًا لألوان الصورة.

 

كاميرات موبايل سامسونج جالاكسي Z Fold2
كاميرات موبايل سامسونج جالاكسي Z Fold 2

 

الكاميرات هنا بشوفها مش أفصل حاجة في الجهاز بس لما استخدمت الجهاز والكاميرات بشكل شبه يومي، لقيت إن الموبايل فعلًا تطور في الجزء الخاص بالكاميرات أكتر بكتير من الموبايل الأول في السلسلة.

الكاميرات طبعًا مش بتقدم أحسن أداء في الفئة ولكن أداء الكاميرات كان محترم جدًا، بالذات مع الميزة الرهيبة في الموبايل وهي استخدام الشاشتين وأنت بتاخد الصور علشان تقدر تظبط الكادرات كويس.

كاميرا السيلفي كان عندي مشكلة معاها وهي إنها بتنعم الضوء ودا كان بيأدي لظهور بقع ضوئية في الصور ومعجبتنيش معظم الوقت.

البصمة والزيادات:

البصمة: 

بصمة اللإصبع في الموبايل دا جاية في زرار الباور واللي بشوفه مكان حلو جدًا للبصمة بالذات في الموبايل دا، وكمان المستشعر كان سريع جدًا وعجبني تجربته جدًا.

المستشعرات

  1. مستشعر التقارب.
  2. مستشعر التسارع.
  3. مستشعر البوصلة.
  4. مستشعر الإضاءة.
  5. مستشعر البصمات. 
  6. مستشعر جيروسكوب الخاص بنظارات الواقع الافتراضي الـ VR.

صوت الموبايل:

الموبايل هنا بييجي بسماعتين واحدة موجودة أعلى الفريم المعدني والتانية موجودة من تحت، والحقيقة بيقدم صوت ستيريو مميز وكنت على طول بستخدم صوت الجهاز وبسيب الهاند فري.

تقنيات الاتصال:

يدعم الموبايل تشغيل شريحة اتصال واحدة من نوع Nano Sim والـ ESim.

أيضًا يدعم شبكات الاتصال الجيل الثاني الـ 2G، والجيل الثالث الـ 3G، والجيل الرابع الـ 4G.

يدعم الموبايل الـ Samsung DeX لمشاركة بياناتك على الكمبيوتر.

البلوتوث بييجي بإصدار 5.0، مع دعمه لخاصيتي الـ A2DP, LE, aptX HD.

بالإضافة إلى دعمه الواي فاي بترددات الـ a/b/g/n/ac/ax، بالإضافة لدعمه إلى الـ Dual-band, Wi-Fi Direct, hotspot.

يدعم الموبايل تحديد الموقع الجغرافي الـ GPS كما يدعم أنظمة الملاحة الأخرى مثل الـ A-GPS, GLONASS, GALILEO, BDS.

يدعم منفذ الـ USB، وبييجي من النوع الأحدث الـ Type C.

الموبايل بييجي بنظام تشغيل اندرويد 10، مع واجهة سامسونج الأحدث الـ One UI 2.5.

يتوفر الموبايل باللون البرونزي ميستيك، وباللون الأسود ميستيك.

أداء موبايل سامسونج جالاكسي Z Fold 2:

نيجي بقى لاهم حاجة بنركز عليها في أي جاهز هنلاقي إن موبايل سامسونج جالاكسي Z Fold2، بييجي بمعالج من أفضل المعالجات المتوفرة حالياً Snapdragon 865 Plus، واللي بتييجي بمعالج رسومي Adreno 650.

ضيف على المعالج 12 جيجابايت من ذاكرة التخزين العشوائي “الرام”، و256 جيجابايت من ذاكرة التخزين الدائم UFS 3.1.

 

أداء موبايل سامسونج جالاكسي Z Fold2:
أداء موبايل سامسونج جالاكسي Z Fold 2

 

وعلشان كدا بنقول إن عتاد الموبايل هنا خرافي وبيقدم تجربة أداء عالية جدًا وبيتميز بالسرعة الكبيرة في إنجاز المهام اليوميّة، واتخلصت سامسونج فيه من جميع أشكال البطئ والتهنيج.

تجربة الموبايل مع الألعاب بقى كانت خرافية، الثلاثي المدمر “ببجي، كول أوف ديوتي، وفورت نايت” كل الألعاب دي كانت شغالة بسرعة وسلاسة خرافية، وشغالة على إعدادات مش هتقدر توصلها غير بموبايل قوي زي دا.

بطارية موبايل سامسونج جالاكسي Z Fold 2:

بطارية ليثيوم بوليمر بحجم 4500 مللي أمبير تدعم الشحن السريع بقوة 25 وات عن طريق منفذ USB Type C وتدعم الشحن اللاسلكي بقوة 11 وات وتدعم الشحن العكسي بقوة 9 وات.

الشاحن المرفق مع البطارية بيقدر يشحن البطارية خلال ساعة ونص تقريبًا ودا شيء كويس جدًا لو أنت كنت محتاج تستخدم الموبايل لوقت طويل ومتواصل.

 

أداء موبايل سامسونج جالاكسي Z Fold2:
أداء موبايل سامسونج جالاكسي Z Fold 2:

سعر موبايل سامسونج جالاكسي Z Fold 2:

سعرالموبايل حاليًا في مصر حوالي 31333 جنيه مصري.

محتويات علبة موبايل سامسونج جالاكسي Z Fold 2:

  1. موبايل سامسونج جالاكسي Z Fold 2.
  2. شاحن بقوة 25 وات.
  3. كابل USB من نوع Type C.
  4. جراب ظهر لحماية الموبايل.
  5. كتيب التعليمات مرفق مع الضمان.
  6. دبوس معدني لفتح مكان الشريحة.
  7. هاند فري مع صوت بنظام AKG.
  8. غطاء للهاند فري.

 الرأي النهائي في موبايل سامسونج جالاكسي Z Fold 2:

الموبايل بيقدم مستوى عالي من الاستخدام وكمواصفات بشوف إن مش ناقصه أي شيء تقريبًا. 

الخامات الخارجية مميزة والتجربة ممتازة جدًا.

تجربة الشاشات سواء الشاشة الأساسية أو الشاشة الثانوية بعد طي الموبايل فكل واحدة فيهم كانت بتقوم بدورها بشكل مثالي ومزعلنيش في الموبايل أي حاجة غير سعره طبعًا اللي بييجي في مستوى الوزراء ورجال الأعمال.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *