كل جهاز موبايل أيًا كانت ماركته إيه، فهو ليه مميزات وعيوب حسب كل شخص محتاج إيه من الجهاز اللي هيشتريه، والجهاز اللي هنتكلم عن مراجعته وتفاصيله النهارده هو سامسونج جالاكسي M51.
فالجهاز دا من سلسلة الـ M في سامسونج، اللي اهتمت فيها الشركة جدًا بالبطارية والشاشة، لكن في M51 الوضع اختلف شوية لأن الاهتمام بالأداء بقى أعلي …
ودلوقتي هنوضحلك كل حاجه عن سامسونج جالاكسي M51 من حيث المميزات والعيوب وكل حاجة فيه بالتفصيل عشان تقدر تقرر هو بالنسبالك إيه، وإيه اللي بيميزه عن غيره من سلسلة الـ M في سامسونج…
ولكن قبل ما نبدأ في المراجعة خليني أكلمكوا عن خدمة هتغير طريقة اختياركوا للموبايل، وهي خدمة “اختار موبايلك” واللي بيقدمها ناس فــونـــز، وهي خدمة بنقدمهالك علشان نساعدك في اختيار موبايلك عن طريق اهتماماتك والميزانية اللي أنت محددها، كل اللي عليك تعمله إنك تبعتلنا المعلومات دي من هنـــــــــــــا… وإحنا هنرشحلك الموبايل المناسب ليك.
تصميم موبايل سامسونج جالاكسي M51:
أولا خامات الموبايل:
خامات الجهاز دا من البلاستيك كعادة سامسونج، فغالبا كل تصاميم سامسونج للفئة المتوسطة شبه بعضها وميزتها إنها بتكون عملية أكتر في الاستخدام القوي بس للأسف في سامسونج جالاكسي M51 ومعظم الموبايلات في الفئة دي من سامسونج خامة الضهر بتتخربش بسهولة.
التصميم الخارجي:
تصميم الكاميرات:
موبايل سامسونج جالاكسي M51 بييجي بأربع كاميرات خلفية مرصوصين في شكل مستطيل، وكل كاميرا موجودة على شكل دايرة، ومعاهم فلاش أحادي من نوع ليد فلاش.
أما بالنسبة للكاميرا الخلفية فهي موجودة على شكل الثقب على الشاشة.
أبعاد الموبايل:
- لو جينا بقى لأبعاده فهي 163.9×76.3×9.5 ملم.
- والوزن بالتفصيل حوالي 213 جرام.
الموبايل مقارنةً بباقي موبايلات الفئة دي بييجي تقيل شوية، ووزنه داخل على الربع كيلو، بس دا طبعًا بيرجع للبطارية الضخمة من سامسونج.
شاشة موبايل سامسونج جالاكسي M51:
- الشاشة في الجهاز دا من أفضل أنواع الشاشات، وهي شاشة Super Amoled Plus من سامسونج، بمساحة 6.7 إنش بجودة الـ FHD+، بدقة 1080×2340 بكسل، بمعدل كثافة بكسلات 385 بكسل لكل إنش، وبتييجي علي هيئة شاشة كاملة مع ثقب في منتصف الشاشة، وبتطلق سامسونج عليها اسم الـ Infinity O.
- أبعاد العرض في الشاشة دي 19.5:9 ودا بيخلي عرض المحتوى على الشاشة يكون بشكل أكبر وأوضح، ودي ميزة ممتازة جدًا في الشاشة.
- الشاشة دي كمان عليها طبقة حماية من نوع Corning Gorilla Glass الجيل الثالث، وعلى الرغم من إنها من أفضل أنواع الشاشات إلا أن ترددها 60 هرتز، بس يعني مش أعلى حاجة.
الشاشة هنا ممتازة، وتشبع ألوان رائع، وكمان تفاصيل ممتازة وتخليك تعرف تتفرج على أي حاجة وتستمتع بيها مهما كانت جودتها عالية فمش هتفرق معاك لأن الشاشة دي بتدي كل جودة حقها غير أنواع تانية من الشاشات اللي ممكن يكون آخرها جودة معينة ومش هتحس بفرق لو عليت الجودة أكتر.
كاميرات موبايل سامسونج جالاكسي M51:
الكاميرا الأمامية:
دقتها 32 ميجا بكسل، بفتحة عدسة F/2.0.
الكاميرات الخلفية فهي كاميرا رباعية وهنناقشها هنا بالتفصيل…
الكاميرا الأولى، دقتها 64 ميجا بكسل، بفتحة عدسة F/1.8، و مستشعرها Sony IMX 682، وهي الكاميرا الأساسية في الموبايل.
الكاميرا الثانية، بتييجي بدقة 12 ميجا بكسل، بفتحة عدسة F/2.2، وهي الخاصة بالتصوير الواسع الألتر وايد.
الكاميرا الثالثة، دقتها 5 ميجا بكسل، بفتحة عدسة F/2.4، وهي الخاصة بتصوير الماكرو والتفاصيل الصغيرة لهواة التفاصيل.
الكاميرا الرابعة، دقتها 5 ميجا بكسل، بفتحة عدسة F/2.4، وهي الخاصة بعمل العزل والبورتريه.
يدعم الجهاز أيضًا تصوير الفيديوهات بجودة الـ 4K بدقة 2160 بكسل، بمعدل التقاط 30 إطار في الثانية، كما يدعم التصوير بجودة الـ FHD بدقة 1080 بكسل، بمعدل التقاط 30 إطار في الثانية.
وطبعًا الفلاش خلفي من نوع ليد، وهو فلاش أحادي.
طيب هنا بصراحة لما جربت الكاميرات كنت مستمتع، عاوزك تعيش معايا كدا اللي هحكيلك عليه دا، تخيل مستشعرات الكاميرات بتاعة سامسونج مع معالجة الألوان الشهيرة من سامسونج، مضاف عليها نايت مود قوي أكتر من أي جهاز في سلسلة الـ M، تخيل هتاخد إيه؟
هتاخد جهاز كاميراته خالية من العيوب بتاعة السلسلة كلها مع تحسن ملحوظ أوي في التصوير الليلي والتصوير في الإضاءة الداخلية والخارجية القوية والضعيفة، من الآخر هتاخد كاميرات متكاملة مع تجربة تصوير فوق الممتازة.
البصمة والزيادات:
- وسائل الأمان والحماية الموجودة بالهاتف، الموبايل بيدعم مستشعر البصمة واللي بييجي مدمج في زرار الباور كمان بيدعم خاصية الـ Face Unlock لفتح الموبايل عن طريق التعرف على وجهك وتعمل عن طريق الكاميرا الأمامية.
- يدعم شبكات الاتصال الجيل الثاني الـ 2G، والجيل الثالث الـ 3G والجيل الرابع الـ 4G، لكنه ضعيف في استقبال الواي فاي.
- الذاكرة الصلبة بتييجي بسعة 128 جيجا بايت، مع ذاكرة عشوائية “الرام” بسعة 8 جيجا بايت.
- يدعم الهاتف إمكانية زيادة المساحة التخزينية حتى سعة 512 جيجا بايت، ودا عن طريق مكان لكارت الميموري.
- يدعم الموبايل الميكروفون الثانوي الخاص بعزل الضوضاء والضجيج أثناء استخدام الموبايل سواء في المكالمات أو التسجيل أو التصوير.
- كما يدعم الهاتف الواي فاي بترددات الـ a/b/g/n/ac، بالإضافة لدعمه الـ Dual-band, Wi-Fi Direct, hotspot.
- البلوتوث يأتي بإصدار 5.0 مع دعمه لخاصيتي الـ A2DP, LE.
- يدعم تحديد الموقع الجغرافي الـ GPS، كما يدعم أنظمة أخرى مثل الـ A-GPS, GLONASS, GALILEO, BDS لتحديد الموقع بشكل أكثر أسرع وأفضل من حيث الدقة.
- يدعم تشغيل شريحتين اتصال من نوع Nano Sim.
طبعًا أداء مستشعر بصمة الإصبع هنا عجبني جدًا، لأنه بقى أسرع ومدمج في زرار الباور ودا بيسهل العملية كتير وبيغنيك كمان عن شكل البصمة المزعج في ضهر الموبايل واللي كتير من الناس مبتحبوش، كمان بصمة الوجه في سامسونج جالاكسي M51 أداءه سريع ودقيق وعجبني جدًا حتى مع التجارب المتكررة والسريعة كان كل مرة بنفس الكفاءة.
أداء موبايل سامسونج جالاكسي M51:
الموبايل هنا بييجي بمعالج من نوع Snapdragon 730G، بتكنولوجيا الـ 8 نانو، مع معالج رسومي من نوع Adreno 618، ود نفس المعالج الموجود في Samsung Galaxy A71.
هنا طبعًا سامسونج لأول مرة من فترة كبيرة تستخدم نفس المعالج اللي المنافسين بيستخدموه وميبقاش فيه تقصير من عندها في النقطة دي، المعالج دا نفس المعالج المستخدم في موبايل سامسونج A71 زي ما قولنا، وكمان بيقدم أداء قوي زي أداء A71 ومحستش بفرق ما بينهم في الأداء خالص حتى لما استخدمت الموبايل في الألعاب كان الموبايل بنفس أداء الـA71 القوي، وأنا بصراحة هنا أرفع لسامسونج القبعة على المعالج دا في الفئة دي.
المعالج بيشغل ثلاثي الألعاب الحالي “ببجي، فورتنايت، كول أوف ديوتي” بشكل كويس ومرضي لمعظم الناس في الفئة المتوسطة، ممكن فورتنايت بس اللي بتشتغل على ميديام، لكن الأداء هنا عمومًا مقبول مش وحش.
السخونية بتاعة الموبايل من الضهر مش عالية، يعني مش هتضايقك أوي وأنت بتلعب، في المجمل الأداء كان كويس وعجبني ودي خطوة كويسة ياريت سامسونج تحافظ عليها.
بطارية موبايل سامسونج جالاكسي M51:
البطارية سعتها 7000 مللي أمبير، مع دعم الموبايل للشحن السريع بقوة 25 وات.
البطارية هنا بقى خرافية فعلًا، تكاد تكون الأكبر في الفئة دي إذا ما كانتش الأكبر في الفئات المجاورة كلها!
البطارية دي ممكن تقعد يومين كاملين ولو هتستخدم الموبايل بشكل عنيف شوية فأنت هتكون مبسوط أوي أوي من البطارية بالذات، وكمان مع شحن سريع الحمدلله 25 وات مش 15 وات زي عادة سامسونج، فالبطارية هنا طفرة تستحق الاسم اللي تم إطلاقه على الموبايل وهو وحش البطارية!
سعر موبايل سامسونج جالاكسي M51:
السعر الحالي حوالي 6200 جنيه مصري للنسخة الـ 128 جيجا مع 8 جيجا رام.
محتويات علبة موبايل سامسونج M51:
- موبايل سامسونج M51.
- شاحن بقوة 25 وات.
- كابل USB من نوع Type C.
- جراب ظهر لحماية الموبايل.
- كتيب التعليمات مرفق مع الضمان.
- دبوس معدني لفتح مكان الشريحة.
- هاند فري.
الرأي النهائي في سامسونج جالاكسي M51:
طبعًا بدون تفكير خالص في أي حاجة الموبايل ممتاز، مش عارف بصراحة أبدأ منين في التحفة الفنية دي!
سامسونج المرة دي تفوقت على نفسها، وعلى المنافسين وعلى أي حد بيفكر ينافس في الفئة دي، سامسونج قدرت توصل للخلطة المناسبة اللي تخليها ببساطة تاكل السوق!
الموبايل بيقدم شاشة فوق الممتازة ومش هنقدر نشوف شاشة زي دي غير من سامسونج وحش الشاشات، واللي شاشاته بقا علامة مميزة خلاص لا يعلى عليها في السوق، والأداء هنا المرة دي سامسونج ظبطته بعكس كل مرة وقدمت معالج مميز يقدر فعلًا ينافس فئته!
كاميرات الموبايل فوق الممتازة زي ما قولنا وحتى الأخطاء اللي كانت دايمًا عند سامسونج في التصوير زي التصوير الليلي مثلًا، هنا سامسونج قدرت تمحيها وتتغلب عليها!
فلو أنت بتفكر في الجهاز دا فأنا برشحهولك بشدة.