مراجعة موبايل ريدمي 9
ريدمي 9

شركة شاومي ركزت أوي في موبايل ريدمي 9، سواء في التصميم أو البطارية أو الصوت وحاجات تانية كتير، بس ده ميمنعش إن الموبايل فيه عيوب مقبولة منه.

بس قبل ما نشوف مواصفات الموبايل ده ونوضح مميزاته وعيوبه، خليني أفكرك بـ “اختار موبايلك“، اللي بيقدمها موقع نــاس فــونــز ودي خدمة بنقدمهالك إذا كنت حابب تشتري موبايل ومحتار بين كل الإصدارات الموجودة في السوق، أو خايف تختار موبايل تندم عليه، فدورنا هنا إننا نساعدك تختار أنسب موبايل ليك، ولاحتياجاتك، وعلى قد السعر اللي أنت عايزه…

كل اللي عليك إنك توضحلنا بالظبط المميزات اللي بتحتاجها في موبايلك، والعيوب اللي ما تقدرش تتقبلها فيه، وإحنا هنقولك على الموبايل الأنسب ليك وهنعرضلك كل تفاصيله. 

يلا بينا نفهم تركيبة إصدار ريدمي 9 ونعرف إيه مميزاته وعيوبه!

تصميم موبايل ريدمي 9:

 

تصميم موبايل ريدمي 9
تصميم موبايل ريدمي 9

 

أولًا خامات الموبايل:

ريدمي 9 جاي بالكامل بخامات من البلاستيك، ودا شيء طبيعي في الفئة السعرية دي، وتقريبًا واخد نفس تصميم نوت 8 برو؛ لأنه واخد نفس طابع التصميم الخلفي وشكل الكاميرات الخلفية. 

هتلاحظ إن الضهر والفريم حتة واحدة مش مستقلين عن بعض.

التصميم الخارجي:

تصميم الكاميرات:

  • شكل الكاميرا في الضهر جاي بنفس تصميم كاميرات النوت 8 برو، 3 كاميرات، بييجي تحتها البصمة والكاميرا الرابعة جاية لوحدها جنبهم.

بروز الكاميرات الخلفية صغير وبيختفي أول ما تركب الجراب، فمش هتلاقي مشكلة التراب اللي بيدخل في نافذة الكاميرات في الموبايل ده.

أبعاد الموبايل:

وزن الموبايل 198 جرام، وسُمكه 9.1 ملم.

حجمه مش كبير أوي ولا صغير، والوزن متوزع كويس يعني مش هتحس بتقل في مسكة الموبايل في إيدك.

شاشة موبايل ريدمي 9:

  • الشاشة من نوع IPS LCD بشكل النوتش حجمها 6.53 إنش.
  • جودة الشاشة FHD+ بدقة 1080×2340 بكسل، بمعدل كثافة بكسلات 395 بكسل لكل إنش.
  • بتدعم الشاشة أبعاد العرض بنسبة 19.5:9 لعرض محتوى أكبر على الشاشة.
  • الشاشة بتمثل نسبة 89.83% من الواجهة الأمامية للموبايل.                     

الشاشة محمية بطبقة Corning Gorilla Glass الجيل الثالث، والموبايل جاي جاهز ومتركب عليه سكرينة.

الـ Dark mode بيشتغل في الموبايل تمام مفيش فيه أي مشاكل، بس للأسف مفيش لمبة إشعارات في الموبايل.

الجديد هنا إنك واخد شاشة FHD+ في الفئة السعرية بتاعت 2200 جنيه، في حين إن معظم الشاشات اللي بتنزل في الفئة دي بتكون HD فقط، لأنه بيحاول يقلل من تكلفة الموبايل فبيديلك شاشة HD.

 

شاشة موبايل ريدمي 9
شاشة موبايل ريدمي 9

 

ألوان الشاشة كويسة إلى حد ما، وتشبعها معقول، بس لاحظت إن سطوع الشاشة أقل بفرق واضح من المنافس المباشر من ريلمي، صحيح شاومي قدمت لنا شاشة بدقة أعلى، بس بسطوع أقل بفرق واضح وهتلاحظه أوي تحت أشعة الشمس، وأعتقد إن شاومي قاصدة تعمل ده علشان الشاشات متطبعش بعد فترة من الاستخدام.

الخلاصة إن الشاشة كويسة بنسبة 90%، وتصميمها كويس مع التعليق على جزيئة الـ U نوتش قديم شوية بس نقدر نتقبل المشكلة دي.

الحواف السفليه للشاشة بتكون كبيرة شوية في الفئة دي، بس في ريدمي 9 كانت كويسة وحجمها مقبول.

كاميرات موبايل ريدمي 9:

الكاميرا الأمامية:

  • الكاميرا الأمامية بتيجي بدقة 8 ميجا بكسل بفتحة عدسة F/2.0.

أداء السيلفي في ريدمي 9 متوازن ومعقول جدًا على سعر الموبايل، لقيت إن لون البشرة فاتح شوية ومحتاج يبقى مشبع أكتر، بس التفاصيل كويسة وتقريبًا كده سيلفي ريدمي 9 تفوقت على سيلفي ريلمي C3.

الكاميرات الخلفية:

ريدمي 9 بييجي بأربع كاميرات خلفية:

  • الكاميرا الأساسية، دقتها 13 ميجا بكسل بفتحة عدسة F/2.2.
  • الكاميرا التانية بتيجي بدقة 8 ميجا بكسل بفتحة عدسة F/2.2، ودي 

الكاميرا الخاصة بالتصوير العريض الـ ultra wide.

  • الكاميرا التالتة بتيجي بدقة 5 ميجا بفتحة عدسة F/2.4، ودي خاصة بتصوير الماكرو.
  • أما الكاميرا الرابعة بدقة 2 ميجا بكسل بفتحة عدسة F/2.4 وهي الكاميرا الخاصة بالعزل والبورتريه مع فلاش أحادي من نوع ليد فلاش.

اعتمادك هنا هيكون على سوفت وير شاومي اللي مفيهوش نايت مود، لأن للأسف المعالج اللي هنا غير مدعوم في جوجل كاميرا لحد دلوقتي.

 

كاميرات موبايل ريدمي 9
كاميرات موبايل ريدمي 9

 

الكاميرا الخلفية كويسة إلى حد ما هتديك صور كويسة مع الإضاءة القوية في النهار، بس هتلاحظ إن الجودة بتقل في التصوير بالليل وممكن الموضوع ده يتعالج مع تحديث السوفت وير، والـ HDR مش كويس أوي، بس خلي بالك إن مع السعر القليل ده مش هتاخد موبايل بأداء متكامل.

بالنسبة لتصوير الفيديوهات الموبايل بيصور فيديو FHD، 

30 فريم في الثانية بالكاميرا الخلفية والأمامية، لاحظت إن الثبات الإلكتروني تقريبًا مش شغال بس نقول تاني إن بالمقارنة مع سعر الموبايل أدائها معقول وكويس جدًا.

البصمة والزيادات:

البصمة:

  • بصمة الموبايل في الضهر، ممكن تتلخبط وتفتكرها الكاميرا الرابعة، لإنها داخلة في فريم الكاميرات، بس مع الوقت هتتعود على مكانها.
  • أداء البصمة سريع ومشوفتش منه أي مشاكل مع فترة الاستخدام والتجربة اللي جربت فيها الموبايل.

المستشعرات:

  • مستشعر التقارب.
  • مستشعر الضوء المحيط.
  • مستشعر تسارع.
  • جيروسكوب.
  • بوصلة رقمية.
  • مستشعر البصمة.
  • مستشعر الـ IR.

الموبايل جاي بنظام تشغيل أندرويد 10 بواجهة MIUI 12.

يدعم الواي فاي بترددات الـ a/b/g/n/ac، بالإضافة لدعم الـ Dual-band, Wi-Fi Direct, hotspot.

قوة شبكات واي فاي كانت مستقرة جدًا وعجبتني مقارنةً بالموبايلات المنافسة.

البلوتوث بييجي بإصدار 5.0 مع دعمه لخاصيتي الـ A2DP, LE.

منفذ الـ USB من نوع Type C مع دعمه لخاصية الـ OTG.

يدعم الموبايل إمكانية تركيب شريحتين اتصال، مع كارت ميموري بحجم 512 جيجا.

الموبايل مزود بشبكات الجيل التاني الـ 2G والجيل التالت الـ 3G والجيل الرابع الـ 4G.

بالنسبة لقوة شبكة المكالمات كانت قوية وكويسة جدًا وملقتش منها أي مشاكل لحد دلوقتي.

تجربة الـ GPS في الموبايل ده كانت كويسة خصوصًا لو أنت من الناس اللي بتهتم بالموضوع ده في شغلها.

صوت موبايل ريدمي 9:

صوت الريدمي 9 يُعتبر أعلى وأفضل صوت هتلاقيه في فئته، صوت سماعات المكالمات عالي وممتاز وواضح جدًا، وصوت سماعة الأذن كويس ومقبول.

موجود في الموبايل مدخل الـ 3.5 مللي.

أداء موبايل ريدمي 9:

 

أداء موبايل ريدمي 9
أداء موبايل ريدمي 9

 

  • المعالج ميدياتيك من نوع Helio G80 بتكنولوجيا 12 نانو، وثماني الأنوية.
  • معالج رسومي من نوع Mali-G52 MC2 وده المعالج الرسومي الموجود في ريلمي 6i، يعني هتحصل على أداء قوي بسعر أقل.
  • النسخة الأولى بتيجي بمساحة تخزين 32 جيجا مع رامات 3 جيجا بايت، ونوع الذاكرة الصلبة eMMC 5.1.
  • النسخة التانية بتيجي بمساحة تخزين 64 جيجا بايت مع رامات 4 جيجا بايت، وذاكرة صلبة من نوع eMMC 5.1.

تقدر تضيف كارت ذاكرة خارجية للجهاز علشان لو جبت النسخة الـ 64 جيجا وحبيت تخليها 128 جيجا هيكون الموضوع سهل معاك.

شاومي وفرت أقوى معالج في الفئة السعرية الأقل من 2500 جنيه، 

أداء المعالج مستقر ومكنش فيه أي مشاكل من اللي لقيتها في الريدمي نوت 9.

لعبة PUBG بتشتغل على High HD، واللعبة بتشتغل كويس جدًا، بس أداء الـ Graphics بيكون قليل شوية.

الموبايل بيسخن شوية من عند الكاميرات الخلفية، وأصلًا معروف إن معالجات ميدياتيك G70 ،G80 ،G85، كلهم بيسخنوا شوية مع الألعاب التقيلة.

إجمالًا لقيت إن أداء المعالج مع السوفت وير سلس، وبسيط  جدًا، ومفيش منه أي مشاكل، المعالج حقيقي مش بس أفضل معالج في الفئة السعرية دي، ده كمان أفضل من الفئة اللي هو موجود فيها.

بطارية موبايل ريدمي 9:

حجم البطارية 5020 مللي أمبير. 

البطارية ضخمة، واستحملت معايا 8 ساعات مستمرين، وممكن المدة دي تزيد معاك على حسب الاستخدام، بالإضافة إلى إن شاشة الجهاز مفتوحة طول فترة الاستخدام.

الموبايل بيدعم الشحن السريع 18 وات، بس الشاحن المرفق في العلبة 10 وات بس، والبطارية بتحتاج 3 ساعات للشحن كامل، وقت كبير طبعًا بس ده كويس بالنسبة لسعر الموبايل. 

أداء البطارية كويس وهتقضي معاك ساعات طويلة في اللعب والتصفح على مواقع السوشيال من غير ما تضطر تشحنها كل شوية.

 

بطارية موبايل ريدمي 9
بطارية موبايل ريدمي 9

 

فتح علبة موبايل ريدمي9:

  • موبايل Xiaomi Redmi 9.
  •   رأس الشاحن بقوة 10 وات.
  • سلك USB يأتي من نوع Type C.
  • كتيب التعليمات والضمان.
  • دبوس معدني.
  •  جراب ظهر شفاف.

سعر موبايل ريدمي 9:

  • النسخة الأولى 32 جيجا، مع 3 جيجا رام بسعر 2350 جنيه.
  • أما النسخة التانية، فهي 64 جيجا مع 4 جيجا رام بسعر 2600 جنيه.

الرأي النهائي في موبايل ريدمي 9:

المميزات:

  • يدعم مستشعر البصمة مع أداء سريع.
  • منفذ USB من النوع الأحدث الـ Type C.
  • تصميم عصري وفريد مع ظهر مضاد للتبصيم.
  • يدعم الميكروفون الثانوي بعكس الـ Realme C3.
  • شاشة FHD+ مع طبقة حماية نادراً ما نجدها في الفئة الاقتصادي.
  • يدعم تشغيل شريحتين الاتصال وكارت الميموري في نفس الوقت.
  • أداء قوي بسعر رخيص أحد ما يميز سلسلة الـ Redmi من شاومي.
  • يدعم الشحن السريع بقوة 18 واط لتتمكن من شحن الهاتف خلال وقت قصير ولكن يتوجب عليك شراء الشاحن.
  • صوت الموبايل عالي ومجسم ومن أفضل الموبايلات من ناحية الصوت في فئته السعرية.
  • بطارية كبيرة يمكنها العمل لفترة طويلة خلال اليوم بأكمله دون الحاجة إلى الشحن بصورة متكررة.

العيوب:

  • لا تحتوي علبة الهاتف على سماعات أذن كعادة شاومي .
  • الشاحن المرفق 10 وات في حين يدعم الهاتف للشحن بقوة 18 وات.
  • لا يدعم لمبة اشعارات.
  • انخفاض جودة الكاميرا الخلفية.
  • انخفاض أقصى درجة لسطوع الشاشة تحت الشمس.

الخلاصة:

ريدمي 9 موبايل قوي جدًا في فئته السعرية مع أداء قوي للمعالج الخاص بيه والأفضل في فئته دي، ودقة شاشته كويسة جدًا وهتساعدك تتفرج على فيديوهات بجودة محترمة مع تجربة لعب ظريفة…

بالإضافة إلى بطارية الجهاز الممتازة، اللي بتدعم الشحن السريع، وجودة الصوت العالية ويمكن تكون الأعلى في الفئة السعرية دي، فلو أنت بتفكر تشتري موبايل بالسعر ده أكيد ومن غير أي تردد أنصحك بريدمي 9.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *