مراجعة موبايل سامسونج Z Flip
سامسونج Z Flip

خلال المؤتمر اللي أعلنت فيه سامسونج عن سلسلة سامسونج S20 الجديدة؛ كشفت عن مفاجأة تانية من العيار التقيل وأعلنت عن موبايلها الجديد القابل للطي وهو موبايل سامسونج Z Flip الجيل الجديد من موبايل فولد اللي نزل في 2019، وكان أول موبايل قابل للطي في العالم كله، يعني عملي أكتر وسهول أكتر في الاستخدام.

موبايل سامسونج فولد مكانش مثالي بالشكل اللي المفروض يكون عليه فسامسونج سحبته من الأسواق لمعالجة أي عيوب كانت موجودة فيه ونزل الجيل الجديد في موبايل سامسونج Z Flip ومفروض منلاقيش فيه أي عيوب كانت موجودة في سلسلة فولد القديمة، فهل دا حصل ولا لأ؟!

خلينا نشوف مراجعة موبايل سامسونج Z Flip.

تصميم موبايل سامسونج Z Flip:

أولا خامات الموبايل:

تصميم وخامات الموبايل من الزجاج القابل للطي بيدي شكل جذاب جدًا وشياكة عالية هتحس أنك ماسك تحفة في إيدك، وفريم الموبايل مصنوع من الألومنيوم.

طبعًا الخامات هنا هي الأفضل ودا اللي المفروض يتم في موبايل زي دا المفروض سامسونج منزلاه أصلًا علشان تصالح بيه الناس اللي كانت مستنية الفولد.

ثانيًا التصميم الخارجي:

تصميم الكاميرات:

تصميم الضهر، الموبايل فيه كاميرتين بس في الضهر، ومعاهم فلاش أحادي من نوع ليد فلاش، وتحتهم شاشة صغيرة كدا ممكن تستخدمها لعرض التاريخ والوقت ونسبة البطارية وغيرهم من الحاجات الصغيرة.

 

تصميم موبايل سامسونج Z Flip
تصميم موبايل سامسونج Z Flip

 

أبعاد الموبايل:

وهنا نقدر نقول عندنا نوعين من الأبعاد…

  • أبعاد الموبايل بعد فتحه 167.3×73.6×7.2 ملم.
  • أما في حالة الطي بتكون أبعاده 87.4×73.6×17.3 ملم.

من شكل الموبايل وخاماته ممكن كتير يفتكر أن وزنه تقيل، بالعكس بقى الموبايل وزنه 183 جرام يعني وزنه معقول وعملي أوي معاك.

شاشة موبايل سامسونج Z Flip:

شاشة موبايل سامسونج Z Flip واخدة شكل الثقب من النوع Foldable Dynamic AMOLED، بمعنى أنها من الزجاج القابل للطي، وهنا هنلاقي إن الموبايل نافس الموبايلات القابلة للطي التانية في كيفية الطي نفسها، يعني الموبايل أشبه بالكتاب اللي بتفتحه وتقفله كل شوية، وممكن نعتبر دي ميزة تنافسية قوية لسامسونج، مهو مش كل يوم بنشوف موبايلات قابلة للطي!

 

شاشة موبايل سامسونج Z Flip
شاشة موبايل سامسونج Z Flip

 

تجربة الموبايل كانت خرافية، الشاشة أثارت فضولي جدًا، وفتحة الشاشة دي بتخليك عاوز تعرف الميكانيزم اللي بيخلي الشاشة تعمل كدا بدون ما تأثر على الصورة بأي شكل من الأشكال حتى مع الاستخدام التقيل والفتح والقفل الكتير اللي كنت بعمله واللي كنت فرحان بيه الحقيقة لأنه رجعني لموبايلات سامسونج القديمة اللي كانت بتفتح وتقفل دي ولكن بشكل عصري وإمكانيات قوية.

الشاشة بتدعم خاصية اللمس المتعدد 16 مليون لون.

مقاس الشاشة 6.7 بوصة، وبتمثل حوالي 82.5% من جسم الموبايل ككل زي موبايل سامسونج S10 Lite.

دقة عرض الشاشة 2636X1080 بكسل، وكثافة البيكسلات 425 بكسل لكل بوصة كما تدعم HDR10+.

ألوان الشاشة كالعادة وككل شاشات سامسونج هي ألوان ممتازة، التفاصيل كمان كانت عملاقة ولكن دا كان متوقع جدًا في موبايل زي دا.

كاميرات موبايل سامسونج Z Flip:

الكاميرا الأمامية:

الموبايل بيدعم التصوير بجودة الـ 4K، والكاميرا الأمامية بتصور بدقة 10 ميجا بكسل زي أخوه من عائلة سامسونج نوت موبايل سامسونج Note 10 Plus، مع فتحة عدسة F/2.4 وبتتميز بالتصوير الواسع وفلاش أحادي من نوع ليد فلاش.

الكاميرات الخلفية:

الموبايل فيه كاميرا خلفية مزدوجة.

الكاميرا الأولى والأساسية، بتصور بدقة 12 ميجا بكسل، بفتحة عدسة F/1.8.

الكاميرا التانية والأخيرة، في الموبايل بتصور بدقة 12 ميجا بكسل، مع فتحة عدسة F/2.2 دي للتصوير الواسع، ومعاهم فلاش أحادي.

الموبايل بيدعم تصوير الفيديوهات بجودة الـ 4K، وبدقة 2160 بكسل، بمعدل التقاط 30 و60 إطار في الثانية.

كمان بيدعم التصوير بجودة الـ FHD، بدقة 1080 بكسل، بمعدل التقاط 30 و60 إطار في الثانية.

بيدعم كمان تصوير الـ HD، بدقة 720 بكسل، بمعدل التقاط 30 إطار في الثانية، بالإضافة لدعمه لتصوير الفيديوهات الـ Super steady التي سبق وأن رأيناها في سلسلة الـ S10.

كما تدعم تصوير الفيديوهات الـ Slow motion بجودة الـ FHD، بدقة 1080 بكسل، بمعدل التقاط 240 إطار في الثانية، كما يدعم التصوير الـ Super Slow motion، بجودة الـ 720 بكسل، بمعدل التقاط 960 إطار في الثانية، بالإضافة لدعمه للتصوير الـ Hyperlapse بجودة الـ FHD.

 

كاميرات موبايل سامسونج Z Flip
كاميرات موبايل سامسونج Z Flip

 

تجربة الكاميرات هنا مكانتش الأفضل، الكاميرات معجبتنيش خالص، والتصوير مش أفضل تجربة خالص في الفئة دي، بس هنلتمس العذر لسامسونج بسبب الضهر المحدود في الجهاز والسلسلة اللي لسة تحت التطوير وأكيد في المستقبل هنشوف تطوير أكتر من كدا.

البصمة والزيادات:

البصمة: 

الموبايل مزود ببصمة موجودة في زر الباور في جنب الموبايل في الفريم، ومكانش في البصمة حاجة مميزة بس هي بصمة سريعة زي أي بصمة مرفقة في زر الباور.

المستشعرات:

  • مستشعر التسارع.
  • مستشعر جيروسكوب.
  • مستشعر القرب.
  • مستشعر البوصلة.
  • مستشعر بارومتر.

سامسونج قدمت من الموبايل دا أكتر من لون علشان تناسب كل الأذواق والألوان كانت، “اللون الذهبي، والأسود، واللون البنفسجي”.

صوت الموبايل:

سماعات الموبايل من النوع ستيريو، ومفيش منفذ 3.5 ملم للسماعات الخارجية، وده طبيعي جدًا ومتوقعتش إن الموبايل دا ييجي بفتحة الـ 3.5 وبردو كان متوقع جدًا إنه ييجي بسماعات ستيريو بتقدم صوت حلو ونقي زي ما شوفت خلال تجربتي للموبايل.

يدعم الموبايل الاتصال قريب المدى الـ NFC.

يدعم الموبايل شريحتين إتصال، الشريحة الأولى من نوع Nano Sim، والشريحة الثانية من نوع eSIM.

يدعم الموبايل شبكات الجيل الثاني الـ 2G، والجيل الثالث الـ 3G، والجيل الرابع الـ 4G.

يدعم الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.

بالنسبة للواي فاي بييجي بترددات الـ a/b/g/n/ac بالإضافة لدعمه إلى الـ Dual-band, Wi-Fi Direct, hotspot.

أم بالنسبة لمنفذ الـ USB فبييجي من النوع الأحدث واللى هو الـ Type C، مع دعمة لخاصية الـ OTG.

يدعم الموبايل الميكروفون الإضافي الخاص بمنع الضوضاء وقت استخدامك للموبايل سواء وقت المكالمات أو غيره

بييجي البلوتوث بالإصدار 5.0، مع دعمه لـ خاصية الـ A2DP، والـ LT.

أداء موبايل سامسونج Z Flip:

  • دقة تصنيع 7 نانومتر.
  • اسم المعالج Qualcomm Snapdragon 855+ Plus
  • معالج الرسومات Adreno 640.
  • معالج ثماني النواة.
  • رامات 8 جيجابايت.
  • الذاكرة الداخلية مساحتها 256 جيجابايت.

طبعًا المعالج أول ما تقرأ كلمة سناب دراجون في الخانة بتاعته تعرف على طول إنك داخل على عظمة!

الأداء جبار مع معالج رسومي مميز وطبيعي مع رامات 8 جيجا فمش هتواجه أي مشاكل في أي حاجة هتعملها بالموبايل، عاوز تلعب ألعاب عالية، ببجي، فورت نايت، أو كول أوف ديوتي العب ومتقلقش من نقطة الأداء خالص لأن كدا كدا مش هتقابل تقطيع أو غيره يبوظ عليك تجربة اللعب بتاعتك.

 

أداء موبايل سامسونج Z Flip
أداء موبايل سامسونج Z Flip

 

ولكن مش كل حاجة أداء والتجربة مهما كانت حلوة لازم تكون متكاملة…

بطارية موبايل سامسونج Z Flip:

بطارية الموبايل من الليثيوم بوليمر، وغير قابلة للإزالة من الموبايل.

بحجم 3300 مللي أمبير ويدعم الشحن بقوة 15 وات بمنفذ USB Type C، والموبايل مش بيدعم الشحن الـ Wireless.

 

بطارية موبايل سامسونج Z Flip
بطارية موبايل سامسونج Z Flip

 

وهنا زي ما كنت بقول، التجربة مش متكاملة خالص، يعني البطارية هتبوظ عليك شوية حاجات مينفعش الموبايل من غيرها، لو بتلعب مثلًا فالمعالج بتاعك هو معالج رائد وضخم وبيقدم أداء عالي ولكن!

البطارية مش هتكمل مع المعالج دا للأسف، محتاج تكون جنب الشاحن بشكل شبه متواصل علشان تعرف تلعب أو تستخدم الموبايل لفترات طويلة وإلا للأسف هيفصل منك.

سعر موبايل سامسونج Z Flip:

سعر الموبايل حاليًا في مصر حوالي 17000 جنيه مصري.

محتويات علبة موبايل سامسونج Z Flip:

  1. موبايل سامسونج Z Flip.
  2. شاحن بقوة 15 وات.
  3. كابل الـ USB من نوع Type C.
  4. كتيب التعليمات مع الضمان يشرح كيفية استخدام الموبايل.
  5. دبوس معدني لفتح مكان شريحتي الاتصال.
  6. هاند فري من نوع AKG.
  7. جراب ضهر شفاف لحماية الموبايل.
  8. اسكرينة بلاستيك تم وضعها بشكل مسبق على الجهاز.

الرأي النهائي في موبايل سامسونج Z Flip:

الموبايل طبعًا يعتبر خطوة على طريق التطور ومنقدرش نقول عنه وحش ولكن هو بالنسبة ليا موبايل غير كامل، يعني معجبنيش حاجات كتير فيه، غير بعض التركيبات الغير منطقية زي المعالج القوي ده مع البطارية الضعيفة دي، الكاميرات كمان مكانتش في المستوى المطلوب خصوصًا بعد التسعير العنيف ده من سامسونج، رأيي إن الموبايل هيعجب الناس اللي كانت مستنياه وبتدور عليه، ولكن مش هيعجب ناس كتير أوي بتدور على قيمة مقابل سعر.

لو أنت محتاج ترشيح لموبايلك القادم هيكون من المناسب ليك جدًا استخدام أجدد خدماتنا وهي خدمة “اختار موبايلك” واللي بيقدمها

موقع نـــاس فـــونز والخدمة دي بنوفرلك من خلالها ترشيح للموبايل المناسب لميزانيتك واحتياجاتك، كل اللي عليك تعمله هتبعتلنا من هنــــــــــــا… ميزانيتك المتوقعة والحاجات اللي أنت مهتم بيها في الموبايل وإحنا هنرشحلك الموبايل المناسب.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *