مراجعة موبايل سامسونج جالاكسي M11
سامسونج جالاكسي M11

التطوير ومعالجة العيوب في الفئات القديمة للموبايلات أهم سر يخلي الشركة محتفظة بثقة المستخدم وتخليه يشتري أي موبايل عليه لوجو الشركة وهو مطمن.

عشان كدا شركة سامسونج أعلنت عن موبايل سامسونج جالاكسي M11  وبقى خليفة موبايل سامسونج M10، مع شوية إضافات زي البصمة وتطوير دقة الكاميرات وحاجات تانية هنعرفها بتفصيل أكبر في المقالة دي...

تصميم موبايل سامسونج جالاكسي M11:

أولًا خامات الموبايل:

زي معظم الفئات الاقتصادية هنلاقي الموبايل مصنوع بالكامل من البلاستيك سواء الضهر أو الفريم، والحقيقة في الفئة دي مكنتش متوقع حاجة أكتر من كدا، وتعتبر خامات عادلة جدًا بالنسبة للسعر.

 

تصميم موبايل سامسونج M11
تصميم موبايل سامسونج M11

 

ثانيًا التصميم الخارجي:

تصميم الكاميرات:

  • الكاميرات الخلفية على شكل دواير، محطوطة في بوكس كدا قريب من التصميم البيضاوي شوية وبتغطيهم طبقة من الزجاج، شكلهم شيك ومش واخدين مساحة كبيرة من ضهر الموبايل.
  • البصمة موجودة في منتصف ضهر الموبايل من فوق وهي بصمة إصبع تقليدية كعادة سامسونج في الفئة دي. 

أبعاد الموبايل:

الموبايل بييجي بأبعاد 161.4×76.3×9 ملم.

وزنه 197 جرام، متوسط مش التقيل اللي يتعب إيدك في استعماله، ولا الخفيف أوي.

شاشة موبايل سامسونج جالاكسي M11:

  • شاشة كبيرة هتستمتع بيها وأنت بتتفرج على فيديوهات وتصفح مواقع السوشيال ميديا بسهولة جدًا.
  • شاشة الموبايل بتيجي بكاميرا أمامية في شكل ثقب، أو زي ما بتسميها سامسونج الـInfinity O.
  • الشاشة من نوع PLS TFT، ومساحتها 6.4 إنش.
  • وضوح الشاشة بيكون بجودة الـ HD وبدقة 720×1560 بكسل في الثانية، بمعدل كثافة بكسلات 268 إنش.
  • الشاشة بتمثل تقريبًا 81.6% من واجهة الموبايل الأمامية.
  • تقدر تلغي أزرار التحكم وتبدلها بالإيماءات، ودا هيسمحلك بالتحكم في مساحة أكبر من الشاشة.
  •  بتدعم الشاشة خاصية الـ Dark mode اللي هتقلب نظام الموبايل كله للون الأسود علشان تحافظ على عينيك من الإضاءة القوية في استعماله بالليل.

 

شاشة موبايل سامسونج جالاكسي M11:
شاشة موبايل سامسونج جالاكسي M11

كاميرات موبايل سامسونج جالاكسي M11: 

الكاميرا الأمامية:

الموبايل مزود بكاميرا أمامية واحدة، بتصور بدقة 8 ميجا بكسل، بفتحة عدسة F/2.0.

الكاميرات الخلفية:

  • كاميرا ثلاثية الأولى، بدقة 13 ميجا بكسل، بفتحة عدسة F/1.8، ودي كاميرا الموبايل الأساسية.
  • الكاميرا التانية، دقتها 5 ميجا بكسل، بفتحة عدسة F/2.2، وهي خاصة بالتصوير الواسع.
  • الكاميرا التالتة، دقتها 2 ميجا بكسل، بفتحة عدسة F/2.4، وهي خاصة بعمل عزل في التصوير، ومخصصة لتصوير البورتريه.
  • بيدعم الموبايل  إمكانية تصوير الفيديوهات بدقة 1080 بكسل، بمعدل التقاط 30 إطار في الثانية.
  • والتصوير الـ HD، بدقة 70 بكسل، بمعدل التقاط 30 إطار في الثانية.

 

كاميرات موبايل سامسونج M11
كاميرات موبايل سامسونج M11

 

طبعًا الكاميرات في الموبايل هنا متواضعة جدًا جدًا، ومقدرش أقول إنها بتقدم أداء كويس أو وحش علشان فئة الموبايل بتحصر سامسونج في اختيارات ضيقة جدًا، ببساطة مش هنتوقع منها أكتر من كدا.

البصمة والزيادات:

البصمة:

الموبايل مزود ببصمة في ضهره، أدائها مش الأسرع في الفئة دي بس مقبول نوعًا ما.

أيضًا مزود بخاصية الـ Face Unlock علشان تقدر تفتح الجهاز عن طريق بصمة الوجه كمان، يعني عندك وسيلتين لحماية وأمان موبايلك.

المستشعرات:

  1. مستشعر الإضاءة.
  2. مستشعر التقارب.
  3. مستشعر التسارع.

الزيادات:

  • البصمة من ضمن الزيادات في موبايل سامسونج جالاكسي M11، ومكنتش موجودة في موبايل M10.
  • سعة التخزين تضاعفت، وبقت 32 جيجا بدل 16 جيجا.
  • بيتوفر الموبايل باللون الأسود، والأزرق، والبنفسجي.
  • بيدعم شبكات الاتصال بالجيل الثاني الـ 2G، والجيل الثالث الـ 3G، والجيل الرابع الـ 4G.
  • بييجي البلوتوث بالإصدار 4.2، مع خاصيتي الـ A2DP.
  • يدعم الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.
  • أما عن الواي فاي في موبايل سامسونج M11 فهو يدعمه بترددات الـ b/g/n، كما يدعم الـ Dual-band, Wi-Fi Direct, hotspot.
  • يدعم الموبايل منفذ الـ 3.5 ملم الخاص بسماعات الاذن.
  • أم بالنسبة لمنفذ الـ USB فييجي من النوع الأحدث واللى هو الـ Type C.
  • الموبايل جاي بأحدث نظام تشغيل Android 10، مع واجهة سامسونج الأحدث الـ One UI 2.
  • يدعم الموبايل امكانية تشغيل شريحتين اتصال في نفس الوقت، بالإضافة لوجود كارت ميموري تصل سعه إلى 512 جيجا بايت.

صوت الموبايل:

الموبايل مزود بميكروفون إضافي علشان يعزل أي دوشة أو صوت حواليك في التسجيل والمكالمات، وهنقف هنا شوية ونقول إن صوت الموبايل ضعيف للأسف، بس بالمقارنة بفئته السعرية هنلاقي إن جودة الصوت مقبولة من سامسونج مع إن كنت أتمنى أنها تكون أقوى من كدا.

أداء موبايل سامسونج جالاكسي M11:

  • معالج كوالكوم من نوع Snapdragon 450 بتكنولوجيا 14 نانو.
  • معالج رسومي من نوع Adreno 506، وهو نفس معالج الـ Huawei Y7 2019، والـ A20s، والـ Realme C1.
  • مساحة التخزين 32 جيجا بايت من النوع eMMC 5.1.
  • رام 3 جيجا بايت.

 

أداء موبايل سامسونج M11
أداء موبايل سامسونج M11

 

طبعًا الأداء هنا ضعيف جدًا زي ما هو متوقع من موبايل في الفئة دي ببساطة، الموبايل مش موجه للألعاب أو الاستخدام القوي خالص فطبيعي الأداء يكون كدا.

بطارية موبايل سامسونج جالاكسي M11:

من أكتر مميزات موبايل سامسونج M11، إن بطاريته قوية وهتفضل شغالة معاك طول اليوم، سواء في لعب خفيف أو شغل، وسيرش طول اليوم على النت…

سعة البطارية عملاقة لأنه بييجي ببطارية 5000 مللي أمبير وبتدعم الشحن بقوة 15 وات.

 

بطارية موبايل سامسونج M11
بطارية موبايل سامسونج M11

سعر موبايل سامسونج جالاكسي M11:

سعر موبايل سامسونج جالاكسي M11 حوالي 2155 جنيه مصري للنسخة 32 جيجا مع 3 جيجا رام.

محتويات علبة موبايل سامسونج جالاكسي M11:

  1. موبايل سامسونج M11.
  2. شاحن بقوة 15 وات.
  3. كابل الـ USB من نوع Type C.
  4. كتيب التعليمات مع الضمان يشرح كيفية استخدام الموبايل.
  5. دبوس معدني لفتح مكان شريحتي الاتصال.
  6. هاند فري بمنفذ الـ 3.5 ملم.

الرأي النهائي في موبايل سامسونج جالاكسي M11:

سامسونج قدمت موبايل كويس بالنسبة لفئته، وبطارية ممتازة، كمان شاشة كبيرة، إضافة مستشعر بصمة وغيره…

في نفس الوقت الموبايل فيه عيوب ممكن تتغاضى عنها لو مش هتكون مشكلة ليك حسب استعمالك، ومنها:

– ضعف درجة سطوع الشاشة.

– المعالج مش أحسن حاجة لأنه قديم وضعيف في أدائه.

– مش موجود في الموبايل لمبة الإشعارات.

– مفيش مستشعر بوصلة في الموبايل، يعني مش هيساعدك تحدد الاتجاهات بدقة.

بس كموبايل موجه للفئة الاقتصادية شايف إنه مش بطال وخصوصًا للناس اللي بتحترم موبايلات سامسونج ومش بتعترف غير بيها، ولكن لو أنت بتدور على موبايل لاستخدام معين مثلًا ومعاك بادجيت معينة فإحنا بنقدملك خدمة مميزة جدًا وهي خدمة “اختار موبايلك” اللي  بيقدمها موقعنا المتميز ناس فـونــز، واللي من خلالها تقدر بسهولة تبعتلنا المواصفات اللي أنت محتاجها مع الميزانية المحدد وهنرشحلك أفضل موبايل تقدر تشتريه في السوق حسب احتياجاتك، لمعرفة هذه الخدمة إضغط هنــــــــــــــــا

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *