مراجعة موبايل ريدمي نوت 9 برو
ريدمي نوت 9 برو

في البداية ريدمي نوت 9 برو هو نفس موبايل ريدمي نوت 9s ومفيش فروق جوهرية أوي بينهم، لكن مع تحسين الكاميرا الخلفية الأساسية يعني هتاخد صور تفاصيلها واضحة أكتر مع معالجة أفضل للألوان، بالإضافة إلى زيادة سرعة الشحن لـ30 وات…

كمان مش بيتوفر من نوت 9 برو نسخة برامات 4 جيجا، النسختين اللي نازلين رامات 6 جيجا، ففي المجمل أقدر أقول إن فعلًا شعار شاومي هو إنك بتاخد “قيمة مقابل سعر”، وده اللي هنشوفه من خلال مراجعة الموبايل كامل دلوقتي…

تصميم موبايل ريدمي نوت 9 برو:

 

تصميم موبايل ريدمي نوت 9 برو
تصميم موبايل ريدمي نوت 9 برو

 

أولًا خامات الموبايل:

ريدمي نوت 9 برو الموبايل جاي بضهر زجاجي لامع مع فريم بلاستيكي مطفي، وطبقة حماية Corning Gorilla Glass 5، تصميم الموبايل شيك وجذاب في كل الألوان وتقريبًا نفس تصميم النوت 9s بس الفرق في كلمة 64 ميجا بكسل الموجودة تحت كاميرات النوت 9 برو، والـ 48 ميجا بكسل اللي في النوت 9s وطبعًا كمان فيه فرق في الألوان.

التصميم الخارجي

تصميم الكاميرات:

الموبايل فيه أربع كاميرات خلفية، ونافذة الكاميرا بارزة أوي في ضهر الموبايل، بس الجراب بيظبط المشكلة دي شوية بعد ما يتركب، وأنصحك تجيب جراب تاني من اللي فيه باب بيقفل خالص على الكاميرات علشان مشكلة الأتربة اللي بتدخل في الكاميرات واللي حصلت مع ناس كتير.

وفي الفريم من تحت، شاومي حطت المايك والاسبيكر في نفس الناحية ودا أثر على صوت المكالمات لما شغلت الاسبيكر ومكانش حلو بصراحة.

أبعاد الموبايل: 

الموبايل بييجي بسمك 8.8 ملم.

مع وزن 209 جرام.

واللي تعتبر بردو نفس أبعاد النوت 9s، الموبايل وزنه تقيل وحجمه كبير، فهتاخد وقت شوية لغاية ما تتعود على مسكته في إيدك.

شاشة موبايل ريدمي نوت 9 برو:

  • الموبايل بييجي بشاشة نوعها IPS LCD.
  • حجمها 6.67 بوصة بدقة 1080×2400 بكسل.
  • بجودة FHD+ مع كثافة بكسلات 395 بكسل لكل بوصة.
  • بأبعاد عرض 20:9 وشاشة كاملة والسيلفي موجود في ثُقب في نص الشاشة.
  • الشاشة عليها طبقة حماية Gorilla الجيل الخامس.

شاشة ريدمي نوت 9 برو مش أقوى نقطة فيه، الشاشة كبيرة وده

 واضح جدًا، وفيها لمبة إشعارات ولاحظت كمان إن نورها ضعيف خالص.

الشاشة مش نقطة قوة في الموبايل غير في حتة الحجم دي زي ما قولنا، خصوصًا إن فيه منافسين بيقدموا شاشات أموليد أو شاشات IPS بتردد أعلى.

الشاشة داعمة لمحتوى HDR 10 على اليوتيوب ولكن مش مدعومة على نتفليكس.

لقيت إن تجربة الشاشة عادية جدًا سواء في ألوان الشاشة أو درجة السطوع…

 شاومي خلت درجة السطوع أو الإضاءة الكاملة في الشاشة بتوصل لحد 90 أو 95% بس، علشان يخلي الشاشة تديك أفضل أداء لأطول فترة ممكنة، علشان كدا لقيت الشاشة فيها نسبة بهتان بسيطة، بس مش هتبقى مشكلة للناس اللي مش بتعلي إضاءة الموبايل على الآخر.

تحت الشمس تقدر تشوف في الموبايل بوضوح بس هتحتاج تعلي الإضاءة للآخر.

وبالمناسبة الموبايل بييجي في العلبة متركب عليه اسكرينة.

 

شاشة موبايل ريدمي نوت 9 برو
شاشة موبايل ريدمي نوت 9 برو

 

تعليق على الشاشة وكان موجود بردو في شاشة نوت 9s، وهو إن زر المسح اللي تحت على اليمين في الكيبورد بيعلق وساعات مش بيستجيب أصلًا.

مشكلة الواي فاي اللي بيفصل أول ما بسيب الموبايل من إيدي لسه موجودة، لو بنزل أي تطبيق أو بعمل داونلود لأي حاجة من على الإنترنت كنت أفضل ماسك الموبايل في إيدي ودي من أرخم الحاجات اللي مينفعش أعديها الصراحة.

كاميرات موبايل ريدمي 9 برو:

الكاميرا الأمامية:

  • كاميرا السيلفي 16 ميجا بكسل بفتحة عدسة F/2.0، موجودة في ثقب الشاشة، لقيت أداء الكاميرا كويس وبتصور Full HD بـ120 فريم في الثانية.

الكاميرات الخلفية:

  • ريدمي نوت 9 برو بييجي بكاميرا خلفية رباعية، الكاميرا الأساسية بدقة 48 ميجا بكسل بفتحة عدسة F/1.8.
  • الكاميرا التانية دقتها 8 ميجا بكسل بفتحة عدسة F/2.2 ودي عدسة Ultra Wide للتصوير في الأماكن المفتوحة.
  • الكاميرا التالتة دقتها 5 ميجا بكسل بفتحة عدسة F/2.4 ودي عدسة ماكرو.
  • أخيرًا الكاميرا الرابعة، ودقتها 2 ميجا بكسل بفتحة عدسة F/2.4 ودي الكاميرا المُخصصة للعزل.

عملت مقارنة بين معالجة الصور في نوت 9 برو ونوت 9s؛ وكانت المعالجة قريبة من بعضها يعني ممكن تلقط صورتين بنوعين الموبايل ومش هتلاحظ فرق كبير بينهم، بس لما تيجي تعمل زوم بقى في الصور هتحس بالفرق وتلاقي إن التفاصيل في البرو أعلى بكتير، وهيبان بردو في وضع النايت مود إن الأفضل في نسخة البرو كمان.

 

كاميرات موبايل ريدمي 9 برو
كاميرات موبايل ريدمي 9 برو

 

طلعت بجوجل كاميرا صور هايلة وبالنسبة لتصوير الفيديوهات في ريدمي نوت 9 برو، بيصور الفيديوهات على 4k بـ30 فريم، وبيشتغل عليه كمان التثبيت الإلكتروني.

مجمل أداء الكاميرات في الجهاز كويس أوي وفيها تحسن ملحوظ عن النوت 9s ولما تعمل زوم هتلاحظ دا، فلو أنت من الناس اللي بتهتم بالتصوير وجودة الكاميرات، أرشحلك النوت 9 برو أكتر من النوت 9s هتلاقي تفاصيل أكتر وألوان مشبعة أكتر وصور أفضل.

البصمة والزيادات:

البصمة:

ريدمي نوت 9 برو مزود بالبصمة المدمجة بزر الباور، الموبايل طويل والبصمة مرتفعة شوية، فلو إيدك صغيرة هيكون صعب عليك توصل ليها إلا لما تعدل مسكة الموبايل في إيدك.

أداء البصمة مقبول وكويس بس مش سريع أوي بسبب أنيميشن الواجهة وكذلك برده في بصمة الوجه، هتلاقيها بطيئة شوية.

المستشعرات:

  • مستشعر بصمة الإصبع.
  • مستشعر التسارع.
  •  مستشعر بوصلة.
  • مستشعر الجيروسكوب.
  • مستشعر التقارب.

الموبايل جاي بنظام تشغيل اندرويد 10.0 مع واجهة المستخدم الخاصة بشاومي MIUI 11.

الموبايل مزود بشبكات اتصال الجيل التاني 2G، والجيل التالت 3G، والجيل الرابع 4G.

يدعم الموبايل نظام تحديد الموقع الجغرافي الـ GPS، ويدعم أنظمة الملاحة المختلفة زيGPS, BDS وغيرها من الأنظمة.

البلوتوث بييجي بالإصدارالرابع مع نظامين  (A2DP و LE) .

يدعم الموبايل الواي فاي بترددات a/b/g/n/ac، ويدعم الـ dual-band, Wifi direct HotSpot.

منفذ الشحن من نوع USB Type-C.

ميزة قوية جدًا في الموبايل وناس كتير مش بتوجه ليها اهتمام في الوقت الحالي، لكن ليها مستقبل كويس جدًا في مصر والشركات حاليًا بتجهزلها، وهي ميزة الـ NFC أو الاتصال قريب المدى والسريع…

فكرتها إنك تقدر تدفع فواتيرك بالموبايل بتاعك عن طريق التلامس بس أو إنك تقرب الموبايل بتاعك من جهاز الدفع، وتقدر تنقل البيانات بتاعتك من موبايل للتاني عن طريق شريحة NFC بمجرد ما بتقرب الموبايلين من بعض، وتطبيقات كتيرة جدًا تقدر تستفيد منها في وجود الـ NFC في الموبايلات اللي هتنزل الفترة الجاية.

للأسف الموبايل مش بيدعم خاصية تسجيل المكالمات، ناس كتير جدًا وأنا منهم بيحبوا الخاصية دي وناس تانية مش مهمة عندهم وبالتالي مش هيأثر على رأيهم في الموبايل.

صوت موبايل ريدمي نوت 9 برو:

صوت الموبايل عالي ومجسم، يعني هتسمع صوت واضح ونقي في نفس الوقت.

أداء موبايل ريدمي نوت 9 برو:

 

أداء موبايل ريدمي نوت 9 برو
أداء موبايل ريدمي نوت 9 برو

 

  • معالج كوالكوم سناب دراجون 720G الجديد ثماني النواة بقوة توصل لـ 2.3 جيجا هيرتز.
  • دقة التصنيع 8 نانو. 
  •  معالج رسومي أدرينو 618.
  • مساحة تخزين 128 جيجا مع 6 جيجا رام.
  • مساحة تخزين 64 جيجا مع 6 جيجا رام والذاكرة من نوع UFS 2.1.

لما جربت الموبايل لقيت إن أداؤه حلو وسلس إلى حد ما، ومكنش فيه تقصير منه خالص، بس بردو واجهتني مشكلة إن أبلكيشن الكاميرا بتاع شاومي كان بيعلق ومش بيفتح بسرعة، وأتمنى إن شاومي تعمل تحديث يحل المشكلة دي بسرعة.

حتة الألعاب بقى لقيت المعالج بيشتغل فيها كويس جدًا ومش بيسقط فريمات، زي لعبة PUBG كانت بتشتغل معايا كويس جدًا.

ملخص الأداء إن ريدمي نوت 9 برو، أداؤه مرضي بس مش الممتاز أوي ولا الفظيع اللي هيبهرك، لكن لو قارنته بالفئة بتاعة الموبايل هتلاقيه كويس جدًا.

سخونة معالج سناب دراجون 720G أقل بشكل ملحوظ من معالج الميدياتيك G90T.

بطارية موبايل ريدمي نوت 9 برو:

بطارية الليثيوم بوليمر كبيرة جدًا وسعتها بتوصل لـ 5020 مللي أمبير، وغير قابلة للإزالة.

من التجربة لقيت إن البطارية بتستحمل معايا من 7-10 ساعات شاشة مفتوحة بس بتفرق من شخص للتاني حسب الاستخدام، وأنا كنت بستهلكها صراحةً علشان أعرف كفاءة البطارية هتكمل معايا لفين!

الشاحن المرفق في العلبة  33 وات، والموبايل بيدعم الشحن السريع بقوة 30 واط، وبيشحن البطارية بالكامل في ساعة وربع، ودا وقت ممتاز جدًا وميقلش حاجة عن منافسه المباشر من ريلمي.

 

بطارية موبايل ريدمي نوت 9 برو
بطارية موبايل ريدمي نوت 9 برو

 

فتح علبة موبايل ريدمي نوت 9 برو:

  • موبايل شاومي ريدمي نوت9 برو ملصق علية لاصقة حماية تم لصقها مسبقا على شاشة الهاتف.
  • رأس الشاحن وهي تدعم الشحن السريع بقوة 33 وات.
  • كابل USB للشحن ونقل البيانات ويأتي من نوع Type C.
  • كتيب التعليمات وطريقة الاستخدام ويأتي بأكثر من لغة.
  • ورقة ضمان الهاتف.
  • جراب شفاف من السيلكون لحماية ظهر الهاتف.

سعر موبايل ريدمي نوت 9 برو:

  • النسخة الأولى مساحة الذاكرة 64 جيجا مع رامات 6 جيجا بايت بـ 3888 جنيه مصري.
  • النسخة التانية مساحة الذاكرة 128 جيجا مع رامات 6 جيجا بايت بـ 4299 جنيه مصري. 

الرأي النهائي في موبايل ريدمي نوت 9 برو:

المميزات:

  • تصميم جذاب مثل الهواتف الرائدة.
  • بطارية عملاقة و تعمل لفترة طويلة.
  • كاميرا خلفية تقدم أداء ممتاز.
  • رأس الشاحن المرفق في العلبة تأتي بقوة 33 واط ويتم شحن الهاتف بالكامل في حوالي ساعة وربع فقط.
  • يدعم تشغيل شريحتين وكارت ميموري في نفس الوقت.
  • يدعم لمبة اشعارات.
  • يدعم الـ NFC .
  • شاشة ثقب بجودة مقبولة تقدم أداء جيد جداً ولكن كنا نطمح أن تأتي بـ Super AMOLED أو معدل تحديث أعلى 90 هرتز.

العيوب:

  • وزن الهاتف ثقيل لذلك يصعب حمله واستخدامه بيد واحدة.
  • قدوم الكاميرا الخلفية بشكل بارز يعرضها للخدش والكسر ولكن الجراب المرفق في العلبة يغطي البروز بالكامل.
  • شكاوي من بعض مالكي الهاتف من دخول تراب في الكاميرات.
  • العلبة ليس بها سماعات الأذن للأسف.
  • يفتقد الهاتف إلى الشاشة الـ 90Hz بعكس الـ Realme 6 وتم الاكتفاء بالـ 60Hz فقط.
  • لا يعد الهاتف تطوير كبير عن النسخة السابقة Xiaomi Redmi Note 8 Pro.
  • الهاتف يعتبر نسخة من هاتف Redmi Note 9s مع اختلاف سرعة الشحن والعدسة الرئيسية للكاميرا الخلفية ودعم الـ NFC فقط لا غير.
  • انخفاض جودة الكاميرا السيلفي في الاضاءات الضعيفة.

الخلاصة:

طبعًا مستنيين الرأي النهائي، فأنا بقولك إن المميزات في الموبايل دا مغرية جدًا في فئة الـ 4000 جنيه وبتخليه تقريبًا ملوش منافس على مستوى المواصفات، وبرشحه جدًا لأى حد بيفكر يشتري موبايل في الفئة دي.

لكن لو أنت فعلًا محتار في اختيار الموبايل القادم الخاص بيك، بننصحك باستخدام خدمة “اختار موبايلك” واللي بيقدمها موقع نــاس فــونــز، والخدمة دي عن طريقها هتقدر إنك تبعتلنا البادجيت بتاعتك والإمكانيات اللي أنت مهتم تكون في موبايلك وإحنا هنرشحلك الموبايل المناسب ليك.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *