مراجعة موبايل بوكو X3
بوكو X3

سمعنا إن بوكو قدرت تكسب ثقة كتير من المستخدمين بموديل واحد في مصر قبل كده؛ بسبب استخدامها معالج رائد في فئة سعرية متوسطة…

 المرة دي بوكو كررت نفس الموضوع بس مش بالمعالج، إنما من خلال مجموعة من المميزات المتكاملة في الموبايل…

 ومن خلال مراجعة موبايل بوكو X3 اللي معانا النهاردة هقولك بوكو نجحت في إيه وفشلت في إيه، بس خليني في البداية أفكرك بخدمة “اختار موبايلك” اللي بيقدمها موقع نــاس فــونــز بهدف تخفيف حيرة اختيارك لموبايل يناسبك من بين كل الأنواع والإصدارات دي…

كل اللي عليك إنك تبعت لنا مواصفات الموبايل اللي عايزه، وإمكانياته، وإحنا هنوفر لك اختيار أفضل موبايل ليك على حسب حاجتك ورغبتك، وكمان قدرتك الشرائية، وهنعرضلك كل بياناته بالتفصيل.

يلا بينا نبدأ استكشاف الموبايل ده من بوكو…

تصميم موبايل بوكو X3:

 

تصميم موبايل بوكو X3
تصميم موبايل بوكو X3

 

أولًا خامات الموبايل:

ضهر الموبايل مصنوع من البلاستيك بالكامل، جوانب الضهر سادة وفي النص مكتوب كلمة POCO بفونت كبير جدًا، ولما بحرك الموبايل في الإضاءة بلاقي انعكاسات على الكلمة وبتنور زي ألوان الطيف كده.

فريم الموبايل من المعدن وفعلًا تقيل، بس مفيش فيه فواصل الشبكة المعتادة في أي فريم معدني وده خلاني أشك إن الفريم من البلاستيك.

التصميم الخارجي

تصميم الكاميرات:

نافذة الكاميرات الخلفية في شكل دايرة مقطوعة أو مش كاملة، لقيت شكلها غريب جدًا ومش مألوف، غير إن بروز الكاميرات واضح جدًا ولما ركبت الجراب لقيته واصل لنهاية نافذة الكاميرا بالعافية، بس لو أنت مستخدم بتهتم بالأداء مش هيفرق معاك  شكل الكاميرا عمومًا، وبالنسبة للأتربة اللي بتدخل في نافذة الكاميرات فأنا ملاحظتش ده خالص أثناء فترة استخدامي.

بالنسبة للكاميرا الأمامية شاومي صغرت ثقبها جدًا مقارنة بسلسلة ريدمي نوت 9.

أبعاد الموبايل:

  • وزن الموبايل 215 جرام، وسُمكه 9.4 ملم. 

البوكو حجمه كبير؛ بسبب الشاشة الكبيرة ووزنه تقيل، يعني لما تشيله في جيبك هتحس بيه ودي أنا بشوفها ميزة لو بتتحرك كتير وبتحط إيدك تطمن على موبايلك كل شوية فأنت هنا مش هتكون محتاج تعمل كدا لأنك هتكون حاسس بالموبايل في جيبك على طول.

  • الموبايل مقاوم لقطرات الماء بشهادة IP53 يعني الموبايل متقفل كويس، بس ده مش معناه يعني إنك تنزل بيه البحر أو حمام السباحة.

شاشة موبايل بوكو X3:

 

شاشة موبايل بوكو X3
شاشة موبايل بوكو X3

 

  • الشاشة حجمها 6.67 بوصة من نوع IPS LCD.
  • دقة الشاشة FHD+ بتردد بيوصل لـ 120 هيرتز وميزة التردد ده السلاسة الواضحة جدًا في حركة الشاشة، وفكرة دخول الـ120 هيرتز في الفئة المتوسطة حاجة تفرح كل محبين شاومي، بعد ما ريلمي كانت محتكراها وبعدها إنفينكس الـ90 هيرتز.
  • الموبايل فيه لمبة إشعارات والميزة دي صعب تلاقيها في أي منافس في الفئة السعرية دي، هتلاقيها موجودة جوه سماعة المكالمات، أينعم نورها ضعيف شوية بس كويس إنها موجودة.

عيب الشاشة الـ IPS حاجة زي الظل كدا موجودة حوالين ثقب الكاميرا وأطراف الشاشة.

شاومي مختارة شاشة بألوان كويسة وداعمة الـ HDR 10، ومحمية بطبقة Corning Gorilla Glass 5 ومتركب عليها سكرينة من الشركة وده شيء لطيف.

مع تجربة الموبايل برا البيت لقيت إن سطوع الشاشة تحت أشعة الشمس مكنش أحسن حاجة، بس بردو معقول وشغال.

كاميرات موبايل بوكو X3:

الكاميرا الأمامية:

  • كاميرا السيلفي موجودة في ثقب الشاشة 20 ميجا بيكسل فتحة عدسة F/2.2.

السيلفي اللي في بوكو X3 زي سيلفي نوت 9s والنوت 9 برو كمان، لو الإضاءة اللي بتصور فيها عالية هتاخد صور كويسة، بس مع ضعف الإضاءة جودة الصور بتقل والكاميرا بتطلع صور مش حلوة، وهتضطر تستخدم جوجل كاميرا علشان تاخد صور كويسة تقدر تنزلها على السوشيال ميديا.

وساعات كنت بعمل إيديت على الصور اللي باخدها بجوجل كاميرا برده، بس أرجع أقولك إن تطبيق الكاميرا بتاع شاومي بيطلع صور سيلفي تفاصيلها مش واضحة بالذات في الإضاءات الضعيفة.

الكاميرات الخلفية:

الموبايل فيه أربع كاميرات:

  • الكاميرا الأساسية: بتصور بدقة 64 ميجا بيكسل بفتحة عدسة F/1.9 بمستشعر Sony IMX 682.
  • الكاميرا التانية بتصور بدقة 13 ميجا بيكسل وبفتحة عدسة F/2.2 للتصوير الواسع.
  • الكاميرا التالتة، بتصور بدقة 2 ميجا بيكسل ماكرو.
  • الكاميرا الرابعة بتصور بدقة 2 ميجا بيكسل للعزل.

بالنسبة لتصوير الفيديوهات، فالموبايل بيدعم تصوير الفيديوهات بجودة الـ 4K بدقة 30 فريم في الثانية، وكمان بيدعم التصوير الـ FHD بدقة 1080 بكسل بمعدل التقاط 30 إطار في الثانية، وكمان بيدعم التصوير بجودة الـ HD بدقة 720 بكسل بمعدل التقاط 30 إطار في الثانية.

تسجيل الفيديو فيه تثبيت إلكتروني محترم بيشتغل على الـ FHD.

الموبايل بيدعم خاصية التصوير الـ Slow Motion في الفيديوهات، وكمان بيدعم التصوير بجودة الـ FHD بدقة 1080 بكسل بمعدل التقاط 120 إطار في الثانية، وبيدعم التصوير بجودة الـ HD بدقة 720 بكسل بمعدل التقاط 120 و240 و960 إطار في الثانية .

 

كاميرات موبايل بوكو X3
كاميرات موبايل بوكو X3

 

أداء الكاميرات حلو أوي، مع معالجة ممتازة للصور والنايت مود بيزود التفاصيل فعلًا بس شغال مع الكاميرا الأساسية فقط، في حين إنه شغال مع الكاميرا الـ Ultra wide في الماركات التانية.

أخدت لقطات حلوة جدًا بالكاميرا الماكرو والتفاصيل كانت واضحة…

في المجمل يعني أداء الكاميرات ممتاز وتجربتها هايلة في تصوير الفيديوهات مع التثبيت الإلكتروني.

البصمة والزيادات:

البصمة:

بصمة الموبايل جانبية مدمجة في زر الباور، دقيقة في التعرف بس أحيانًا بتتأخر لحظة في فتح الواجهة، ودي مشكلة ممكن تختفي بتحديث السوفت وير.

المستشعرات:

  • مستشعر التسارع.
  • مستشعر البوصلة
  • مستشعر التقارب.
  • مستشعر جيروسكوب.

يدعم الموبايل البلوتوث بأحدث إصدار 5.1، بالإضافة لـA2DP, LE.

يدعم الموبايل شبكات الواي فاي بتردداته المختلفة: a/b/g/n/ac  ويدعم dual-band, Wi-Fi  Direct, hotspot.

ميزة التحديد الجغرافي GPS مع أنظمة الملاحة المختلفة زيA-GPS, GLONASS, BDS.

الموبايل جاي بواجهة شاومي MIUI 12 مبنية على نظام تشغيل Android 10 بلانشر POCO Launch 2.0

منفذ الـ USB من النوع Type C.

الموبايل يدعم تركيب شريحتين اتصال 4G أو شريحة واحدة مع كارت ميموري بحجم 256 جيجا، وبالنسبة للشبكة كانت شغالة معايا كويس جدًا سواء في خط فودافون أو أورانج.

 موجود برنامج اتصال جوجل في الموبايل بيدعم خاصية تسجيل المكالمات، بس لما بضغط على زر التسجيل بيظهر رسالة مسجلة للطرف التاني تعرفه إن المكالمة دي بتتسجل.

صوت موبايل بوكو X3:

أهم ميزة في الموبايل ده إن فيه سماعات مزدوجة “ستيريو”، هتديلك صوت بجودة كويسة جدًا، وإنك تلاقي موبايل بسماعة ستيريو والصوت كمان متوزع مظبوط بين السماعتين في فئة متوسطة دي حاجة نادرة جدًا.

لاحظت حاجة في الموبايل، وأنت كمان هتلاحظها وتحس بزنة في الضهر لما تشغل ميديا بصوت عالي، ولو الزنة ضايقتك تقدر تلغي الستيريو خالص وتخلي الصوت يطلع من السماعة اللي تحت، صحيح الصوت الإجمالي هيقل حوالي 30% لكن، الزنة هتختفي نهائيًا ولا كأن فيه حاجة موجودة.

أداء موبايل بوكو X3:

 

أداء موبايل بوكو X3
أداء موبايل بوكو X3

 

  • دقة التصنيع 8 نانو ميتر.
  • معالج رسومي من نوع أدرينو 618.
  • ذاكرة داخلية مساحتها 64 جيجا مع 6 جيجا.

ولأول مرة نلاقي معالج كوالكوم سناب دراجون 732G، الحقيقة مش حاسس بأي فرق بينه وبين المعالج سناب دراجون 730G غير إنهم مزودين تردد المعالج 100 ميجا هيرتز، وده كلام فاضي ومش هيفرق أوي في تجربة الأداء.

بالنسبة للأداء في ألعاب الأندرويد بقى، هتلاقيها كويسة جدًا واستجابة الشاشة سلسة أوي، ولعبة PUBG بتشتغل على High HD على 30 فريم، فكانت كويسة جدًا مفيش تقطيعات تقريبًا.

الموبايل فيه نظام تبريد محترم، يعني مش هيسخن معاك وأنت بتلعب جيمز عليه، من الآخر أنت لو جيمر الموبايل ده هيبسطك أوي وهتقضي عليه تجربة ألعاب محترمة.

الأداء الرسومي في الموبايل كويس جدًا، ممكن مش الأفضل ولكنه فعليًا ميقلش حاجة في إعدادات الـ Graphics عن المُنافس المباشر من MediaTek، وفي نفس الوقت مش بيسخن زي Mediatek.

جربت أعمل Screen Record وأنا بلعب ومظهرش أي تقطيع في الفريمات ولا أي حاجة، وفضلت ألعب عادي بدون أي مشاكل لأني سمعت ناس بتتكلم عن النقطة دي ولكن مظهرتش معايا بصراحة.

بطارية موبايل بوكو X3:

بطارية الموبايل بتيجي بحجم 5160 مللي أمبير، من الليثيوم بوليمر وغير قابلة للإزالة.

البطارية كبيرة جدًا، بتكمل من 9-10 ساعات استخدام مستريح، يعني تجربة خرافية.

الشحن المرفق مع الموبايل 33 وات، بيشحن 75% من البطارية في نص ساعة وإجمالي زمن الشحن بالكتير بيكون ساعة واحدة، يعني ميهمكش لو البطارية خلصت منك بسرعة؛ لأنك هترجع تشحنها بالشحن السريع، وبالتالي مفيش مشكلة خالص في أداء البطارية.

الموبايل كان بيسخن شوية وهو على الشاحن بس النقطة دي متقلقش منها أوي، لكن يُفضل عدم استخدام الموبايل خلال الشحن.

 

بطارية موبايل بوكو X3
بطارية موبايل بوكو X3

 

فتح علبة موبايل بوكو X3:

1- موبايل Xiaomi Poco X3.

2- رأس شاحن سريع بقوة 33 وات + كابل USB من نوع Tybe C.

3- جراب ظهر شفاف لحماية ظهر الموبايل.

4- كُتيب الإرشادات + ضمان الهاتف.

5- دبوس معدني للتحكم في منفذ الشرائح.

سعر موبايل بوكو X3:

النسخة الأولى ذاكرتها 64 جيجا مع 6 جيجا رام، بسعر 4000 جنيه مصري.

النسخة التانية ذاكرتها 128 جيجا، مع 6 جيجا رام بسعر 4400 جنيه مصري.

الرأي النهائي في موبايل بوكو X3:

المميزات:

  • يدعم صوت ستريو سبيكر لتجربة صوتية أفضل ولكن لاحظنا زنة في ظهر الهاتف عند رفع الصوت لاعلى درجة وهذا ناتح من الصوت الاستريو ونفس الملحوظة موجودة في Realme 7 Pro صاحب الصوت الاستريو.
  • يدعم تصوير الفيديوهات الـ 4K مع ثبات الكتروني على جودة الـ 4K.
  • يأتي بأحدث واجهة من شاومي الـ MIUI 12 .
  • الموبايل بيدعم الـ IR Blaster الخاص بالتحكم في الأجهزة الكهربائية عن طريق الهاتف  كما يدعم لمبة اشعارات.
  • البطارية تأتي بسعة كبيرة لتصمد لفترة مقبولة مع دعمها للشحن السريع بقوة 33 وات .
  • شاشة كبيرة بشكل الثقب مع استغلال الحواف بشكل ممتاز بالإضافة لدعم الشاشة إلى الـ HDR10 ومعدل التردد الـ 120Hz وهو من أرخص الهواتف الداعمة للـ 120 هرتز لسلاسة تصفح أفضل.
  • المعالج يقدم أداء جيد جداً وهو أول هاتف في مصر بمعالج سناب دراجون 732G مع العلم إن فارق الأداء بسيط بين سناب دراجون 732G و 730G.
  • اداء مميز من الكاميرا الخلفية خصوصًا في التصوير بالنهار.
  • سعر ممتاز من شاومي.
  • يعتبر Poco X3 NFC أفضل من Xiaomi Note 9 Pro في المعالج بفرق بسيط جدا مع تردد شاشة أعلى 120 هرتز مع صوت ستريو سبيكر مع كاميرا خلفية أفضل بفرق بسيط ولكن ما زال النوت 9 برو يتفوق في التصميم الأفضل والخامات الزجاجية الشيك جدًا.

العيوب:

  • سماعات الأذن غير مرفقة بعلبة الهاتف كعادة هواتف شاومي.
  • لا يمكنك استخدام شريحتين الاتصال وكارت الميموري في وقت واحد.
  • معدل سمك الموبايل كبير مع وزن كبير لذلك ستحتاج إلى بعض الوقت للتعود على إستخدامه.
  • توجد موبايلات أخرى منافسة بخامات زجاجية ولكن البلاستيك عملي أكثر من ناحية الصدمات .
  • الكاميرا الخلفية بارزة بشكل ملحوظ عن ظهر الموبايل مما يعرضها للخدش والكسر بصورة أكبر لذلك ينصح باستخدام الجراب المرفق .
  • استجابة مستشعر البصمة مقبولة ولكنها ليست الأسرع .
  • ضعف أداء الكاميرا السيلفي ويمكنك تعويض ذلك وتحميل جوجل كاميرا لتحصل على جودة افضل للسيلفي في الاضاءات الضعيف.

الخلاصة:

الموبايل ده لو ما ظهرش فيه عيوب في الاستخدام، هيكون موبايل الموسم من شاومي وهايتفوق على النوت 8 برو اللي كان عليه إقبال كبير.

فلو كنت بتفكر تشتري موبايل ومحتار بين النوت 9s والنوت 9 برو والبوكو X3، أرشحلك بشدة البوكو X3 طبعًا؛ لأنه هيتفوق عليهم بمميزات وإمكانيات كتيرة باستثناء نقطة التصميم الخارجي للموبايل.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *